អន្តរជាតិ
លោក ចនសុន យកការបោះឆ្នោតមុនអាណត្តិដើម្បីដោះស្រាយបញ្ហា Brexit លោកនាយករដ្ឋមន្រ្តីអង់គ្លេស បូរីស ចនសុន
× នាយករដ្ឋមន្ត្រីអង់គ្លេស បូរីស ចនសុន បានសម្រេចគោលបំណងក្នុងការរៀបចំការបោះឆ្នោតមុខអាណត្តិហើយតាមរយៈការយល់ព្រមពីសភា. ប៉ុន្តែអ្នកជំនាញលើកឡើងថា គឺជាការបោះឆ្នោត ដែលមិនអាចរំពឹងទុកជាមុនបាន។
លោក បូរីស ចនសុន នាយករដ្ឋមន្រីអង់គ្លេស កំពុងស្ថិតនៅក្នុងលក្ខខណ្ឌនៃការខ្វះសម្លេងភាគច្រើននៅក្នុងសភា បានទទួលការយល់ព្រមពីសមាជិកសភា ឲ្យរៀបចំការបោះឆ្នោតមុនអាណត្តិ។ ប៉ុន្តែនៅក្នុងការបោះឆ្នោតមុនអាណត្តិខាងមុខដែលរដ្ឋសភាទើបបើកភ្លើងបៃតង លោកនាយករដ្ឋមន្ត្រីសង្ឃឹមថា បក្សអភិរក្ស នឹងទទួលបានសម្លេងភាគច្រើន ដើម្បីដើរចេញពីសហភាពអឺរ៉ុប។ បើមិនដូចជាការរំពឹងហើយបើបក្សប្រឆាំងឈ្នះឆ្នោតវិញនោះ លោកនាយករដ្ឋមន្ត្រី នឹងជួបបញ្ហាធំមិនខាន។
បើទោះបីជា អឺរ៉ុបព្រមពន្យារ Brexit រយៈពេល៣ ខែក៏ដោយ ប៉ុន្តែវាមានរយៈតែប៉ុន្មានសប្តាហ៍តែប៉ុណ្ណោះ បន្ទាប់ពីការបោះឆ្នោតនៅថ្ងៃទី១២ ធ្នូត្រូវបានបញ្ចប់។ តាមការបញ្ជាក់ដូចសព្វដង លោក ចនសុន សន្យាថា «ដឹកដៃអង់គ្លេសចេញសហភាពអឺរ៉ុបឲ្យបាន» និងគ្មានការពន្យារពេលទៀតឡើយ។ ដោយឡែកសម្រាប់គណបក្សប្រឆាំងវិញសន្យាថា បក្សរបស់ខ្លួននឹងរៀបចំការចរចាលែងលះពីអឺរ៉ុប តាមគោលនយោបាយរបស់ពួកគេ។
ពិតណាស់ថា ការបោះឆ្នោតខែធ្នូ គឺជាគ្រោះថ្នាក់សម្រាប់នាយករដ្ឋមន្ត្រីអង់គ្លេស។ វាគ្រោះថ្នាក់ ព្រោះនេះគឺជាប្រកួតប្រជែងជាសាធារណៈដំបូងបំផុតរបស់លោក ចនសុន ចាប់តាំងពីប្រជែងជាមួយបេក្ខជនបក្សអភិរក្សអំឡុងខែកក្កដាកន្លងមក។ បើទោះបីជាក្នុងពេលបច្ចុប្បន្នបក្សអភិរក្ស កំពុងមានប្រជាប្រិយភាពក៏ពិតមែន ប៉ុន្តែនាយករដ្ឋមន្ត្រីអង់គ្លេស ក៏កំពុងប្រឈមនឹងការរិះគន់ពីសាធារណៈមតិពាក់ព័ន្ធទៅនឹងបញ្ហា មិនអាចដើរចេញពីសហភាពអឺរ៉ុបនៅថ្ងៃទី៣១ ខែតុលានេះដែរ។
ទន្ទឹមជាមួយគ្នានេះដែរ តាមការសិក្សាលើការបោះឆ្នោតនៅក្នុងប្រទេសអង់គ្លេស ប្រជាជន តែងតែប្រែប្រួលក្នុងការបោះឆ្នោតឲ្យគណបក្សនយោបាយ។ ជាក់ស្តែងអត្រានៃការបោះឆ្នោតឆ្នោតផ្លាស់ប្តូរបក្ស ចាប់ពីឆ្នាំ២០១០ ដល់ឆ្នាំ២០១៥ គឺមានអត្រា ៤៣ភាគរយ ខណៈពេលចាប់ពីឆ្នាំ ២០១៥ ដល់ ២០១៧ មាន៣៣ភាគរយ។ នេះគឺបញ្ជាក់ឲ្យឃើញថា អ្វីៗគឺមានការប្រែប្រួលជានិច្ចទៅលើគណបក្សនយោបាយនៅក្នុងចក្រភពអង់គ្លេស។ នេះបើតាមការចុះផ្សាយរបស់ទីភ្នាក់ងារ AFP។
© រក្សាសិទ្ធិដោយ thmeythmey.com