ជាតិ
សាសនា / ធម៌
មេដឹកនាំកម្ពុជា សម្តែងការសោកស្តាយចំពោះការបាត់បង់សម្តេច លាស់ ឡាយ សម្តេច ហ៊ុន សែន ជួបសម្តេច លាស់ ឡាយ កន្លងមក (រូបពីគណៈសង្ឃនាយក)
× ថ្នាក់ដឹកនាំសំខាន់ៗរបស់កម្ពុជា បានចេញសាររំលែកទុក្ខនិងសម្តែងការសោកស្តាយចំពោះការយាងចូលទិវង្គតរបស់សម្តេចព្រះធម្មលិខិត លាស់ ឡាយ សម្តេចព្រះសង្ឃនាយករងទីមួយ ប្រធានថេរសភាព្រះសាសនានៅកម្ពុជា និង ជាព្រះចៅអធិការវត្តសន្សំកុលស។
សម្តេចនាយករដ្ឋមន្ត្រី ហ៊ុន សែន បានសរសេរក្នុងលិខិតរំលែកទុក្ខថា៖«...ការទទួលព្រះអនិច្ចធម្មរបស់សម្តេចធម្មលិខិត លាស់ ឡាយ គឺជាការបាត់បង់សមណសង្ឃជាពហុស្សូតដ៏ឆ្នើមបំផុត ក្នុងការលើកស្ទួយតម្លៃព្រះពុទ្ធសាសនា និងជាកវីនិពន្ធពោរពេញដោយព្រះពុទ្ធិជ្រៅជ្រះ ពិសេសសម្តេចធម្មលិខិត លាស់ ឡាយ បានសន្សល់ទុកស្នាព្រះហស្តច្រើនឥតគណនាក្នុងវិស័យពុទ្ធចក្រ អាណាចក្រ និង រួមចំណែកបរិច្ចាគទ្រទ្រង់ចលនាមនុស្សធម៌កាកបាទក្រហមកម្ពុជា ដោយព្រះសទ្ធាជ្រះថ្លាបរិសុទ្ធទៀតផង»។
លិខិតរំលែកទុក្ខរបស់សម្តេច សាយ ឈុំ ប្រធានព្រឹទ្ធសភា សរសេរថា៖«...សម្តេចធម្មលិខិត លាស់ ឡាយ បានបូជាព្រះកាយក្នុងមួយព្រះជន្មរបស់ព្រះអង្គ ឧទ្ធិសដើម្បីព្រះពុទ្ធសាសនាបានគង់វង្ស និងចម្រើនរុងរឿង ពុទ្ធបរិស័ទ្ធចូលរួមគោរពប្រតិបត្តិតាមគន្លងឱវាទ ហើយព្រះអង្គ បានបន្សល់ទុកស្នាព្រះហស្តជាច្រើនឥតគណនាទាំងពុទ្ធចក្រនិងអាណាចក្រ»។
គណបក្សប្រជាជនកម្ពុជា ក៏បានចេញលិខិតរំលែកទុក្ខដែរ។ ខ្លឹមសារនៃការសរសើរសម្តេចធម្មលិខិត លាស់ ឡាយ ក្នុងលិខិតរំលែកទុក្ខរបស់គណបក្សប្រជាជនកម្ពុជា គឺដូចគ្នានឹងខ្លឹមសារនៃលិខិតរំលែកទុក្ខរបស់សម្តេច សាយ ឈុំ។
គ្រប់ស្ថាប័នព្រះសង្ឃ រួមទាំងព្រះសង្ឃជាលក្ខណៈបុគ្គលផងដែរ បានបង្ហាញការសោកស្តាយចំពោះការសោយទិវង្គតរបស់សម្តេច លាស់ ឡាយ។ បរិស័ទ្ធមួយចំនួន ដោយមានទាំងយុវជនផងដែរ ក៏បានបង្ហាញការសោកស្តាយផងដែរ។
សម្តេចធម្មលិខិត លាស់ ឡាយ ត្រូវបានចាត់ទុកជាសមណបញ្ញវន្តជាន់ខ្ពស់មួយអង្គ តាំងពីសម័យសម្តេចសង្ឃរាជ ជួន ណាត មកម្ល៉េះ។ ព្រះអង្គ ទទួលការគោពខ្លាំងពីសំណាក់ព្រះសង្ឃ និងថ្នាក់ដឹកនាំប្រទេស។
សម្តេចនាយករដ្ឋមន្ត្រី ហ៊ុន សែន បានទៅគោរពព្រះវិញ្ញាណក្ខន្ធភ្លាមៗ ក្រោយទទួលដំណឹងថា សម្តេច លាស់ ឡាយ សោយទិវង្គត ក្នុងព្រះជន្មាយុ១០៦ព្រះវង្សា នាល្ងាចថ្ងៃទី២៩ ខែតុលា ឆ្នាំ២០១៩ នៅវត្តសន្សំកុសល៕
© រក្សាសិទ្ធិដោយ thmeythmey.com