លោក វី តារ៉ា ត្រូវបានហ្វីលីពីនតែងតាំងឲ្យធ្វើជាអាជ្ញាកណ្តាលចៅក្រម នៅស៊ីហ្គេមឆ្នាំនេះ

កីឡាជាតិ

ជាតិ

លោក វី តារ៉ា ត្រូវបានហ្វីលីពីនតែងតាំងឲ្យធ្វើជាអាជ្ញាកណ្តាលចៅក្រម នៅស៊ីហ្គេមឆ្នាំនេះ

31, Oct 2019 , 8:59 am

រូបភាព

លោក វី តារ៉ា ពេលធ្វើជាអាជ្ញាកណ្តាលក្នុងការប្រកួតមិត្តភាពអន្តរជាតិរបស់កីឡាករកម្ពុជាជាមួយហ្វីលីពីន

ដោយ:

លោក វី តារ៉ា ជំនួយការគ្រូបង្វឹកក្រុមជម្រើសជាតិគុនល្បុក្កតោ ត្រូវបានហ្វីលីពីន តែងតាំងឲ្យធ្វើជាអាជ្ញាកណ្តាលចៅក្រម ដើម្បីកាត់សេចក្តីក្នុងការប្រកួតកីឡាប្រពៃណីរបស់ហ្វីលីពីន Arnis ក្នុងព្រឹត្តិការណ៍កីឡាស៊ីហ្គេមឆ្នាំនេះ។ សម្រាប់តំណែងនេះ លោក តារ៉ា ជឿជាក់ថា វានឹងផ្តល់ផលប្រយោជន៍យ៉ាងច្រើនសម្រាប់ខ្លួន និងកីឡាករដែលចូលរួមប្រកួតកីឡាស៊ីហ្គេមនៅហ្វីលីពីន។

លោក វី តារ៉ា នឹងធ្វើជាអាជ្ញាកណ្តាលចៅក្រមកាត់សេចក្តីក្នុងការប្រកួតកីឡាដំបងខ្លី Arnis ដែលជាកីឡាវប្បធម៌ប្រពៃណីរបស់ហ្វីលីពីន ក្នុងការប្រកួតកីឡាស៊ីហ្គេមឆ្នាំនេះ។ ការទទួលបានសិទ្ធិនេះ ធ្វើឡើយក្រោយ លោក ត្រូវបានសហព័ន្ធកីឡា Arnis ហ្វីលីពីនតែងតាំងឲ្យធ្វើជាអាជ្ញាកណ្តាលចៅក្រមកីឡាកម្រិតអន្តរជាតិ នៅថ្ងៃទី៣០ ខែតុលានេះ។

ការតែងតាំងនេះ គឺជាលក្ខខណ្ឌតម្រូវរបស់ម្ចាស់ផ្ទះហ្វីលីពីន ដែលតម្រូវឲ្យប្រទេសនីមួយៗចូលរួមប្រកួតលើវិញ្ញាសានេះ ត្រូវតែមានអាជ្ញាកណ្តាលចៅក្រមម្នាក់ចូលរួមកាត់សេចក្តី។ លោក វី តារ៉ា ជាបេក្ខភាពតែម្នាក់គត់ ដែលសហព័ន្ធកីឡាគុនល្បុក្កតោបានដាក់ស្នើទៅសហព័ន្ធកីឡា Arnis ហ្វីលីពីន ដើម្បីសុំធ្វើជាអាជ្ញាកណ្តាលចៅក្រម។ ការជ្រើសរើសលោក តារ៉ា ដោយសារលោកមានបទពិសោធធ្វើអាជ្ញាកណ្តាលចៅក្រមកន្លងមក និងតាមរយៈសមត្ថភាពដែលទទួលបានការបណ្តុះបណ្តាលលើជំនាញនេះ។

សម្រាប់លោក វី តារ៉ា នេះជាឱកាសមួយដ៏ល្អសម្រាប់លោកក្នុងការអភិវឌ្ឍន៍សមត្ថភាព ក៏ដូចជាសិក្សាពីរបៀបរៀបចំ ការដាក់ពិន្ទុ និងកាត់ក្តីរបស់អាជ្ញាកណ្តាលកម្រិតអន្តរជាតិដទៃ ដើម្បីធ្វើជាបទពិសោធក្នុងការអភិវឌ្ឍន៍ប្រព័ន្ធកាត់ក្តីរបស់គុនល្បុក្កតោឲ្យកាន់តែប្រសើរ។ វាក៏ជាមេរៀនសម្រាប់លោកនៅលើឆាកអន្តរជាតិផងដែរ។

«យើងធ្លាប់តែចូលរួមប្រកួតនៅក្រៅប្រទេស តែយើងមិនធ្លាប់ធ្វើជាអាជ្ញាកណ្តាលចៅក្រមនោះទេ។ ដូច្នេះការចូលរួមលើកនេះធ្វើឲ្យយើងបានដឹងពីរបៀបរបបនៃការធ្វើការរបស់គេ បទដ្ឋានបច្ចេកទេសនៃការដាក់ពិន្ទុរបស់គេ ធ្វើយ៉ាងម៉េចឲ្យវាកាន់តែមានសុក្រឹតភាព។ ខ្ញុំគិតថាបទពិសោធនឹងល្អមែនទែន ក្នុងការយកមកអភិវឌ្ឍន៍គុនល្បុក្កតោយើង លើផ្នែកអាជ្ញាកណ្តាលចៅក្រម»។ នេះជាការលើកឡើងរបស់លោក វី តារ៉ា ដែលបានបន្ថែមថា៖«យើងបានធ្វើជាអាជ្ញាកណ្តាលចៅក្រមផ្ទាល់ ដូច្នេះយើងដឹងច្បាស់ពីរបៀបរបបដាក់ពិន្ទុ និងធ្វើឲ្យដឹងថាកីឡាករណាមានប្រៀបជាង ឬមិនមានប្រៀប ហើយវាក៏ជាឱកាសមួយដ៏ល្អផងដែរ ក្នុងការធ្វើឲ្យយើងដឹងពីចំណុចខ្សោយរបស់កីឡាករយើង»។

ក្រៅពីសិក្សាទ្រឹស្តីលើជំនាញអាជ្ញាកណ្តាលចៅក្រម លោក តារ៉ា បានចូលរួមអនុវត្តផ្ទាល់ក្នុងការប្រកួតកីឡា Arnis មិត្តភាពអន្តរជាតិកម្ពុជា-ហ្វីលីពីន ដែលរៀបចំនៅទីស្នាក់ការនៃគណៈកម្មាធិការជាតិអូឡាំពិកកម្ពុជាចាប់ពីថ្ងៃទី២៦-៣០ ខែតុលា ទៀតផង។ សម្រាប់ការប្រកួតមិត្តភាពនេះ ហ្វីលីពីនបានបញ្ជូនកីឡាករកីឡាការិនីចំនួន២០រូប ឲ្យប្រកួតប្រជែងជាមួយកីឡាករកម្ពុជា។

បើតាមលោក អ៊ួ តារា អគ្គលេខាធិការសហព័ន្ធកីឡាគុនល្បុក្កតោកម្ពុជា ការប្រកួតនេះធ្វើឡើងក្នុងគោលបំណងដើម្បីដកស្រង់បច្ចេកទេសគ្នាទៅវិញទៅមក ដើម្បីត្រៀមការប្រកួតកីឡាស៊ីហ្គេម ដែលនឹងឈានចូលមកដល់នៅចុងខែវិច្ឆិកានេះ។ ការបណ្តុះបណ្តាល និងអភិវឌ្ឍន៍សមត្ថភាពអាជ្ញាកណ្តាលចៅក្រម និងបញ្ជ្រាបបទការប្រកួតចុងក្រោយដល់កីឡាករកីឡាការិនី ក៏ជាគោលបំណងនៃការប្រកួតមិត្តភាពអន្តរជាតិនេះផងដែរ៕