ជាតិ
សាសនា / ធម៌
សមាជិករៀបចំបុណ្យ៖ សពសម្តេច លាស់ ឡាយ តម្កល់ទុក១០០ថ្ងៃ មុនបូជា
× លោក សេង សុមុនី អ្នកនាំពាក្យក្រសួងធម្មការនិងសាសនា និងជាសមាជិកនៃគណៈកម្មការរៀបចំបុណ្យព្រះសពសម្តេចធម្មលិខិត លាស់ ឡាយ អះអាងថា ព្រះសពសម្តេច លាស់ លាយ នឹងត្រូវតម្កល់ទុករយៈពេល១០០ថ្ងៃ នៅក្នុងវត្តសន្សំកុសល។ លោក លើកឡើងថា ការសម្រេចនេះ គឺធ្វើឡើងក្នុងកិច្ចប្រជុំរវាងគណៈកម្មការរៀបចំបុណ្យព្រះសពសម្តេច លាស់ ឡាយ ជាមួយគណៈកម្មាធិការជាតិរៀបចំបុណ្យជាតិ-អន្តរជាតិ និងខាងព្រះបរមរាជវាំង នៅថ្ងៃទី៣០ ខែតុលា ឆ្នាំ២០១៩។
ក្នុងកិច្ចសម្ភាសជាមួយសារព័ត៌មានថ្មីៗតាមទូរស័ព្ទ លោក សេង សុមុនី បញ្ជាក់ដូច្នេះថា៖«រយៈពេល១០០ថ្ងៃហ្នឹង យើងធ្វើបុណ្យជាហូរហែអ៊ីចឹងទៅ ទៅតាមព្រះពុទ្ធសាសនា»។ លោក បន្ថែថា នៅថ្ងៃទី៣ ខែកុម្ភៈ ឆ្នាំ២០២០ ព្រះសពសម្តេច លាស់ ឡាយ នឹងត្រូវដង្ហែចេញពីវត្តសន្សំកុសល យកទៅបូជានៅមុខវត្តបទុមវត្តី។
សម្តេច លាស់ ឡាយ សោយទិវង្គត ក្នុងព្រះជន្មាយុ១០៦ព្រះវង្សា នៅវត្តសន្សំកុសល កាលពីល្ងាចថ្ងៃទី២៩ ខែតុលា ឆ្នាំ២០១៩។ សម្តេច ជាសម្តេចព្រះសង្ឃនាយករងទីមួយ ជាប្រធានថេរសភាព្រះពុទ្ធសាសនានៅកម្ពុជា និង ជាព្រះចៅអធិការវត្តសន្សំកុសល។ សម្តេច លាស់ ឡាយ ជាអ្នកចេះដឹងមួយអង្គ តាំងពីជំនាន់សម្តេចសង្ឃ ជួន ណាត៕
© រក្សាសិទ្ធិដោយ thmeythmey.com