អន្តរជាតិ
នយោបាយអន្តរជាតិ
លោក គីម ផ្ញើសាររំលែកទុក្ខការស្លាប់ម្តាយលោកមូន តែថ្ងៃបន្ទាប់ កូរ៉េខាងជើងបាញ់មីស៊ីល២គ្រាប់
× មេដឹកនាំកូរ៉េខាងជើង គីម ជុងអ៊ុន បានផ្ញើសាររំលែកទុក្ខចំពោះការស្លាប់របស់ម្តាយបង្កើតលោកប្រធានាធិបតីកូរ៉េខាងត្បូង មូន ចេអ៊ីន។ ១ថ្ងៃប៉ុណ្ណោះក្រោយការផ្ញើសារដ៏ភ្ញាក់ផ្អើលបែបនេះ យោធាកូរ៉េខាងត្បូង បានប្រកាសថា ក្រុងព្យុងយ៉ាង បានបាញ់មីស៊ីលចំនួនពីរគ្រាប់ឆ្ពោះទៅកាន់សមុទ្រខាងកើត។
លោក គីម ជុងអ៊ុន បានផ្ញើសារតាមរយៈភូមិសន្តិភាព ប៉ាន់មុនជុម (Panmunjom) កាលពីរសៀល ថ្ងៃពុធ ៣០ តុលា មិនដល់មួយថ្ងៃផងក្រោយម្តាយរបស់លោក មូន គឺលោកស្រី Kang Han-ok ទទួលមរណភាព។ ក្នុងសារនេះ លោក គីម បានសម្តែងការចូលរួមរំលែកទុក្ខយ៉ាងជ្រាលជ្រៅចំពោះមរណភាពរបស់លោកស្រី Kang ។ នេះបើតាមការិយាល័យប្រធានាធិបតីកូរ៉េខាងត្បូង។
សម្រាប់កាយវិការនេះ អ្នកជំនាញកូរ៉េខាងត្បូង យល់ឃើញថា វាអាចបកស្រាយក្នុងបរិបទមិត្តភាពមេដឹកនាំទាំងពីរ ដែលកសាងឡើងតាមរយៈកិច្ចប្រជុំកំពូល៣លើកកាលពីឆ្នាំមុន។ ក៏ប៉ុន្តែពួកគេ ព្រមានទៀតថា វាប្រហែលជាមិនបង្ហាញពីការផ្លាស់ប្តូរដ៏មានធំធេងនៅក្នុងឥរិយាបថអនាគតរបស់ក្រុងព្យុងយ៉ាងចំពោះទីក្រុងសេអ៊ូលឡើយ។
ដូចការគិតទុកមែន! រំលងមួយថ្ងៃប៉ុណ្ណោះ កូរ៉េខាងជើង បានបាញ់មីស៊ីល២គ្រាប់ ដែលបាញ់ចេញពីខេត្ត South Pyongan តម្រង់ផ្ទាល់ទៅកាន់សមុទ្រ។ អគ្គសេនាធិការចម្រុះកូរ៉េខាងត្បូង លើកឡើងបែបនេះក្នុងសេចក្តីថ្លែងការណ៍ខ្លួន នៅថ្ងៃព្រហស្បតិ៍ទី ៣១ តុលា ដោយសង្កត់ធ្ងន់ថា៖«យើងរក្សាការត្រៀមខ្លួនជានិច្ចនិងតាមដានយ៉ាងដិតដល់ក្នុងករណីមានការបើកការបាញ់មីស៊ីលបន្ថែមទៀត»។ នេះបើតាមទីភ្នាក់ងារព័ត៌មាន Yonhap ។
យ៉ាងណាមិញ ភ្លាមៗនេះ គេពុំទាន់មានព័ត៌មានលម្អិតផ្សេងទៀតអំពីការបាញ់នេះនៅឡើយទេ រួមមាន ប្រភេទមីស៊ីល និងរយៈចម្ងាយជាដើម។ នេះជាលើកទី១២ហើយដែលរបបក្រុងព្យុងយ៉ាង បានបាញ់សាកល្បងអាវុធបែបនេះ ជាមួយការបាញ់លើកចុងក្រោយគឺធ្វើឡើងនៅថ្ងៃ២ តុលា ។ ពេលនោះ កូរ៉េខាងជើង បានបាញ់សាកល្បងនៃអាវុធប្រភេទថ្មី មីស៊ីលបាលីស្ទិកដែលបាញ់ចេញពីនាវាមុជទឹក ប្រភេទ Pukguksong-3 ចេញពីឆ្នេរខាងកើត៕
Tag:
កូរ៉េខាងជើង
កូរ៉េខាងត្បូង
គីមជុងអ៊ុន
មូន ចេអ៊ីន
© រក្សាសិទ្ធិដោយ thmeythmey.com