ជាតិ
ទូតកាណាដា៖ ការផ្តល់ GSP ដល់ប្រទេសកំពុងអភិវឌ្ឍ មិនភ្ជាប់លក្ខខណ្ឌសិទ្ធិមនុស្សឡើយ រូបភាពពី ក្រសួងការបរទេស
× ក្នុងជំនួបជាមួយលោក ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ លោកស្រី Donica Pottie ឯកអគ្គរដ្ឋទូតកាណាដាប្រចាំកម្ពុជាដែលនឹងត្រូវចប់អាណត្តិ បានលើកឡើងថា ការផ្តល់ប្រព័ន្ធអនុគ្រោះពន្ធ GSP ដល់ប្រទេសកំពុងអភិវឌ្ឍ គឺមិនភា្ជប់នឹងលក្ខខណ្ឌសិទ្ធិមនុស្សឡើយ។ នេះបើតាមសេចក្តីប្រកាសព័ត៌មានរបស់ក្រសួងការបរទេស។
ក្នុងកិច្ចប្រជុំកំពូលអាស៊ានលើកទី៣៥ និងកិច្ចប្រជុំកំពូលពាក់ព័ន្ធនៅទីក្រុងបាងកក ប្រទេសថៃ លោកស្រី Donica Pottie បានជួបសម្តែងការគួរសមនិងជម្រាបលាលោក ប្រាក់ សុខុន ដែលលោកស្រី នឹងចប់អាណត្តិជាឯកអគ្គរដ្ឋទូតប្រចាំកម្ពុជា។ ជំនួបនេះ ធ្វើឡើងកាលពីថ្ងៃទី៣១ ខែតុលា ឆ្នាំ២០១៩។
លោក ប្រាក់ សុខុន បានលើកឡើងពីការខិតខំនៃការសហប្រតិបត្តិររវាងប្រទេសទាំងពីរ គឺកំណើនយ៉ាងលឿននៃទំហំពាណិជ្ជកម្ម វិស័យកម្ចាត់មីន អប់រំ បេសកកម្មថែរក្សាសន្តិភាព និងការប្រែប្រួលអាកាសធាតុ។ ចំណែកក្នុងក្របខ័ណ្ឌអាស៊ាន រដ្ឋមន្រី្តក្រសួងការបរទេស បានបញ្ជាក់ថា កម្ពុជាគាំទ្រឲ្យមានកិច្ចព្រមព្រៀងពាណិជ្ជកម្មសេរី (FTA) អាស៊ាន-កាណាដា ។
ចំពោះ FTA អាស៊ាន-កាណាដា អ្នកស្រី Donica Pottie សង្ឃឹមថា កិច្ចព្រមព្រៀងនេះនឹងមានការវិវត្តទៅមុខយ៉ាងឆាប់រហ័ស។ ចំពោះទំហំពាណិជ្ជកម្ម នៃប្រទេសទាំងពីរ បានកើនឡើងរហូតដល់៨០០ភាគរយ កាលពីឆ្នាំ២០១៦។ ពាក់ពន្ធនឹង ប្រព័ន្ធអនុគ្រោះពន្ធ (GSP) វិញ លោកស្រី Donica Pottie បានសង្កត់ធ្ងន់ថា កាណាដាផ្តល់ភាពអនុគ្រោះដល់ប្រទេសកំពុងអភិវឌ្ឍ ក្នុងគោលដៅសម្រាប់អភិវឌ្ឍសេដ្ឋកិច្ចរបស់ប្រទេសទាំងនោះ ដោយមិនភ្ជាប់ទៅនឹងលក្ខខណ្ឌសិទ្ធិមនុស្សឡើយ។
ទន្ទឹមនឹងនេះ លោកស្រី Donica Pottie បានឲ្យដឹងថា កាណាដាបានបង្កើតមូលនិធិសម្រាប់ការបញ្ជូនកងកម្លាំងស្ត្រី ក្នុងប្រតិបត្តិការថែរក្សាសន្តិភាពរបស់អង្គការសហប្រជាជាតិ ហើយតាមរយៈមូលនិធិនេះ លោកស្រី សង្ឃឹមថា កម្ពុជា នឹងទទួលបានមូលនិធិបន្ថែមសម្រាប់ការបញ្ជូនកងកម្លាំងមួកខៀវស្ត្រីកម្ពុជា។
រដ្ឋមន្ត្រីក្រសួងការបរទេស អះអាងថា កម្ពុជាបានបញ្ជូនកងកម្លាំងមួកខៀវស្ត្រីកម្ពុជា នៅក្នុងប្រតិបត្តិការថែរក្សាសន្តិភាព ដែលមានចំនួនសរុបជាង៣០០នាក់៕
Tag:
កម្ពុជា-កាណាដា
GSP
© រក្សាសិទ្ធិដោយ thmeythmey.com