ជាតិ
វីដេអូ
លោកស្រី ញឹម ដាវី អំពាវនាវឱ្យស្ត្រីខ្មែរធ្វើម្ហូបបង្ហាញពលរដ្ឋកូរ៉េ
× សេអ៊ូល៖ កាលពីពេលថ្មីៗនេះ សារព័ត៌មានកូរ៉េឈ្មោះ កូរ៉េ ជុងអាង ដេលី ( Korea Joongang Daily) ដែលផ្សាយជាភាសាអង់គ្លេស បានស្នើសុំធ្វើបទសម្ភាសជាមួយឯកអគ្គរាជទូតកម្ពុជា លោក ឡុង ឌីម៉ង់ ប្រចាំសាធារណរដ្ឋកូរ៉េ និងភរិយា អំពីម្ហូបប្រពៃណីខ្មែរ។ នៅក្នុងនិវេសនដ្ឋាន ដែលនៅក្បែរស្ថានទូត ភរិយាលោកឯកអគ្គរាជទូត គឺលោកស្រី ញឹម ដាវី បានរៀបចំបង្ហាញ សម្លកកូរ មាត់ដុតត្រយូងចេក នំអន្សមជ្រូក អន្សមចេក អន្សមខ្នុរ និងបង្អែមបបរល្ពៅ ដល់អ្នកកាសែតកូរ៉េ។
«ការចែករំលែកវប្បធម៌ជាមួយប្រទេសជិតខាង ឬប្រទេសក្នុងតំបន់ផ្សេង ខ្ញុំគិតថា វាគឺជាការចែករំលែកចំណេះដឹង និងអរិយធម៌រៀងៗខ្លួន។ យើងគួរគោរពស្រឡាញ់ ប្រជាជន វប្បធម៌ ទៅវិញទៅមក…»។ នេះគឺជាការអធិប្បាយរបស់លោកស្រី ញឹម ដាវី នៅក្នុងបទសម្ភាសជាមួយសារព័ត៌មានថ្មីៗ នៅក្នុងនិវេសនដ្ឋានរបស់លោកស្រី បន្ទាប់ពីលោកស្រីបានផ្តល់សម្ភាស និងពន្យល់បង្ហាញម្ហូប និងបង្អែមខ្មែរដល់អ្នកកាសែតកូរ៉េ ជុងអាង។
លោកស្រីភរិយាឯកអគ្គរាជទូតបានផ្តល់តម្លៃខ្លាំងទៅលើការបង្ហាញអត្តសញ្ញាណនៃជាតិសាសន៍ខ្មែរ តាមរយៈមធ្យោបាយផ្សេងៗ រួមទាំងការការស្លៀកពាក់ផង។ ដោយសារតែនៅក្នុងសាធារណកូរ៉េ មានពលករ ពលការិនី និងស្ត្រីខ្មែរដែលបានរៀបការជាមួយស្វាមីកូរ៉េ លោកស្រី ញឹម ដាវី អំពាវនាវឱ្យប្រជាសហគមន៍ខ្មែរនៅសាធារណរដ្ឋកូរ៉េ ធ្វើម្ហូបបង្ហាញមិត្តភក្តិ និងប្រជាជនកូរ៉េ ដើម្បើផ្សព្វផ្សាយឱ្យពួកគេបានស្គាល់កម្ពុជាកាន់តែច្រើន៕
Tag:
ញឹម ដាវី
សម្លកកូរ
korea Joongang Daily
កូរ៉េខាងត្បូង
© រក្សាសិទ្ធិដោយ thmeythmey.com