អន្តរជាតិ
លោក អាសាដ៖ លោក ត្រាំ ជាប្រធានាធិបតីមានតម្លាភាពបំផុតរបស់អាមេរិក ប្រធានាធិបតីស៊ីរី បាសា អាល់-អាសាដ។ រូបភាព AP
× ប្រធានាធិបតីស៊ីរី បាសា អាល់-អាសាដ (Bashar al-Assad) ចាត់ទុកលោក ដូណាល់ ត្រាំ ជាប្រធានាធិបតីអាមេរិកមានតម្លាភាពបំផុត បើធៀបនឹងប្រធានាធិបតីអាមេរិកឯទៀត។ សម្រាប់លោក អាសាដ លោក ត្រាំ មានតម្លាភាពជាងមេដឹកនាំអាមេរិកនានាត្រង់ថា លោកនិយាយដោយឥតលាក់លៀមពីការចង់បានប្រេងពីមជ្ឈិមបូព៌ា។
ក្នុងក្រសែភ្នែកប្រធានាធិបតីស៊ីរី បាសា អាល់-អាសាដ ប្រធានាធិបតីអាមេរិកបច្ចុប្បន្ន គឺលោក ដូណាល់ ត្រាំ ជាប្រធានាធិបតីល្អជាងគេ។ ប៉ុន្តែមិនមែនមកពីលោក ត្រាំ មានគោលនយោបាយល្អឡើយ តែលោកជាប្រធានាធិបតីមានតម្លាភាពបំផុត។
បើតាមទូរទស្សន៍អាមេរិក CNBC ដែលស្រង់សម្ដីលោក អាសាដ ពីកិច្ចសម្ភាសជាមួយទូរទស្សន៍រដ្ឋស៊ីរីនៅថ្ងៃទី៣១ ខែតុលាកន្លងទៅ ប្រធានាធិបតីដែលកំពុងតស៊ូនឹងការងើបតវ៉ារបស់ប្រជាជនខ្លួនឯង និយាយថា៖ «ខ្ញុំប្រាប់អ្នកទៅចុះ។ គាត់ជាប្រធានាធិបតីអាមេរិកល្អជាងគេ។ ហេតុអ្វីទៅ? ពុំមែនដោយសារគោលនយោបាយគាត់ល្អទេ តែមកពីគាត់ជាប្រធានាធិបតីមានតម្លាភាពបំផុត។»
លោក អាសាដ រៀបរាប់ថា គ្រប់ប្រធានាធិបតីអាមេរិក ប្រព្រឹត្តបទឧក្រិដ្ឋ តែបែរជាទទួលពាន Nobel ទៅវិញ ហើយក្លាយទៅជាអ្នកការពារសិទ្ធិមនុស្ស និងគុណតម្លៃអាមេរិក ឬលោកខាងលិចទៅទៀត។ លោកបន្តថា មេដឹកនាំទាំងនោះ គ្រាន់តែតំណាងឲ្យផលប្រយោជន៍ក្រុមហ៊ុនអាមេរិកដែលចង់បានប្រេង និងរកស៊ីអាវុធប៉ុណ្ណោះ។
ចំពោះលោក ត្រាំ វិញ មេដឹកនាំស៊ីរីរូបនេះអះអាងថា លោក ត្រាំ និយាយដោយមានតម្លាភាព «យើងចង់បានប្រេង» តែម្ដង។ លោកសួរបែបឌឺដងថា តើយើងចង់បានអ្វីជាងសត្រូវមានតម្លាភាពទៀតនោះ។
លោក អាសាដ ទំនងចង់សំដៅដល់ការប្រកាសរបស់លោក ត្រាំ កាលពីសប្ដាហ៍មុនដែលបញ្ជាឲ្យរក្សាទ័ពអាមេរិកមួយចំនួននៅក្នុងខេត្ត Deir ez-Zor ដែលសម្បូរប្រេងរបស់ស៊ីរី ខណៈលោកបានបញ្ជាឲ្យដកទ័ពចេញពីតំបន់ដែលកាន់កាប់ដោយសកម្មជនឃើដស៊ីរីនោះ។ មន្ទីរបញ្ចកោណ ក៏ចាប់ផ្ដើមពង្រាយយោធាអាមេរិកខ្ទង់រយនាក់ និងយុទ្ធោបករណ៍នានាទៅការពារអណ្ដូងប្រេងតាមបញ្ជារបស់លោក ត្រាំ ដែរហើយ៕
Tag:
ស៊ីរី
អាមេរិក
ដូណាល់ ត្រាំ
Bashar al-Assad
© រក្សាសិទ្ធិដោយ thmeythmey.com