ជាតិ
UNDP អំពាវនាវឲ្យគាំទ្រការវិនិយោគដំឡូងមី ដោយរំពឹងថាចំណេញដូចស្រូវដែរ
រូបភាពពីក្រសួងកសិកម្ម
×![]()
ដោយ: ឡាយ សុភាវតី
របាយការណ៍ UNDP បង្ហាញថា កម្ពុជាអាចទទួលចំណូលពន្ធរហូតដល់ ១៣០លានដុល្លារ ក្នុងរយៈពេល១០ឆ្នាំ ពីដំឡូងមី និងផលប្រយោជន៍គុណនឹងបី ប្រសិនបើមានការគាំទ្រនិងវិនិយោគពីសាធារណៈឲ្យកាន់តែច្រើន។ ទន្ទឹមនឹងនេះ រដ្ឋាភិបាលកម្ពុជា កំពុងរៀបចំគោលនយោគបាយជាតិលើវិស័យដំឡូងមី ដោយរំពឹងថានឹងទទួលបានផលចំណេញ។ 
របាយការណ៍សិក្សាបានរកឃើញថា ការចាប់ផ្ដើមអភិវឌ្ឍវិស័យដំឡូងមីក្នុងពេលនេះ នឹងអាចផ្ដល់ប្រយោជន៍គុណនឹងបី ក្នុងរយៈពេល១០ឆ្នាំខាងមុខ ដែលជួយកំណើនសេដ្ឋកិច្ចកម្ពុជាកើនតាមរយៈ ការកើនឡើងនៃការងារ និងកាត់បន្ថយភាពក្រីក្រ ជាពិសេសកសិករ ដែលមិនសូវមានជំនាញ។ នេះបើតាមការលើកឡើងរបស់អ្នកតំណាង UNDP ប្រចាំកម្ពុជា លោក Nick Beresford នៅក្នុងកម្មវិធីប្រកាសផ្សព្វផ្សាយ របាយការណ៍ស្ដីពីការរៀបចំករណីវិនិយោគសម្រាប់ដំឡូងមី នៅថ្ងៃទី១ ខែវិច្ឆិកា ឆ្នាំ២០១៩។
ទន្ទឹមនេះ រដ្ឋលេខាធិការក្រសួងពាណិកម្ម លោក ម៉ៅ ថូរ៉ា បានលើកឡើងថា ក្រសួងពាណិជ្ជកម្ម កំពុងសិក្សាលើការរៀបចំគោលនយោបាយជាតិដំឡូងមី ដោយទទួលបានឯកភាព លើខ្លឹមសារពីទីស្ដីការគណៈរដ្ឋមន្រី្តហើយ។
ចំណែក ប្រធានគម្រោង UNDP លោក លាង រ័ត្នម៉ាណា បានបញ្ជាក់ថា តម្រូវការដំឡូងមីនៅលើពិភពលោក កំពុងតែកើនឡើងរួមទាំងតម្លៃ ហើយចិនជាទីផ្សារទទួលទិញធំជាងគេ។ ប៉ុន្តែនៅកម្ពុជា ការកើនឡើងនៃដំឡូងមី ធ្វើឲ្យដំណើរការផលិកម្មនេះ ស្ថិតក្នុងស្ថានភាពព្រួយបារម្ភ ហើយស្ថានភាពឧស្សាហកម្មក៏ធ្លាក់ចុះ។ រីឯ ប្រទេសថៃនិងវៀតណាម ជាប្រទេសដែលទទួលបានការចំណេញពីវិស័យដំឡូងមី ហើយមកដល់ពេលនេះ កម្ពុជាគួរតែចាប់ផ្ដើមអភិវឌ្ឍវិញម្ដង។
«ការបោះទុនវិនិយោគលើវិស័យដំឡូងមីចំនួន ២៩៤លានដុល្លារ វិស័យដំឡូងមីនឹងរីកចម្រើនជាងវិស័យចិញ្ចឹមសត្វ ស្បៀងអាហារ និងទេសចរណ៍។ ចំពោះលទ្ធផល គឺទទួលបានដូចការវិនិយោគលើស្រូវអង្គរដែរ ហើយផលចំណេញទទួលបានទៅដល់បីដង ដូច្នេះផលចំណេញសេដ្ឋកិច្ចគឺមិនតិចជាង៩៤០លានដុល្លារនោះទេក្នុងរយៈពេល១០ឆ្នាំ»។ នេះជាការលើកឡើងបន្ថែមរបស់ លោក លាង រ័ត្នម៉ាណា។
របាយការណ៍របស់ក្រសួងកសិកម្មនៅថ្ងៃទី១ ខែវិច្ឆិកា ឆ្នាំ២០១៩ បង្ហាញថា នៅរយៈពេល១០ខែក្នុងឆ្នាំ២០១៩នេះ កម្ពុជាបាននាំចេញ ដំឡូងមីក្រៀម និង ដំឡូងមីស្រស់ ជាង២លានតោន ដែលក្នុងនោះថៃនិងវៀតណាម ជាទីផ្សារធំជាងគេរបស់កម្ពុជា៕
Tag:
UNDP
ដំឡូងមី
© រក្សាសិទ្ធិដោយ thmeythmey.com
