ជាតិ
អចលនទ្រព្យ
រដ្ឋបាលស្រុកបន្ទាយស្រី ផ្អាកអាជីវកម្មពុះដីឡូត៍ក្រោយរកឃើញក្រុមហ៊ុនទាំងអស់គ្មានច្បាប់ ទីតាំងក្រុមហ៊ុនពុះដីឡូតិ៍លក់នាពេលកន្លងមក ក្នុងភូមិសាស្ត្រស្រុកបន្ទាយស្រី។ រូបភាព៖ ហ្វេសប៊ុក លោក ឃឹម ហ្វីណង់
× សៀមរាប៖ រដ្ឋបាលស្រុកបន្ទាយស្រី បានរកឃើញថាក្រុមហ៊ុនពុះដីឡូត៍លក់ទាំងអស់ក្នុងស្រុកនេះ សុទ្ធតែគ្មានច្បាប់អនុញ្ញាតឱ្យអភិវឌ្ឍន៍ឡើយ។ ក្រោយរកឃើញដូច្នេះ អភិបាលស្រុក លោក ឃឹម ហ្វីណង់ បានសម្រេចផ្អាកអាជីវកម្មទាំងនោះ និងបានបង្ខំឱ្យពួកគេស្នើសុំលិខិតអនុញ្ញាតត្រឹមត្រូវសិនប្រសិនចង់បន្តអាជីវកម្មរបស់ខ្លួន។
ពាក់ព័ន្ធនឹងបញ្ហានេះ អភិបាលស្រុកបន្ទាយស្រី លោក ឃឹម ហ្វីណង់ បានប្រាប់សារព័ត៌មានថ្មីៗនៅថ្ងៃទី៣១ តុលាថា គោលការណ៍ហាមឃាត់ ឬផ្អាកអាជីវកម្មដីធ្លីនេះ គឺដោយសារម្ចាស់អាជីវកម្មទាំងនោះមិនមានច្បាប់ត្រឹមត្រូវ ដូច្នេះរដ្ឋបាលស្រុកត្រូវបិទក្នុងន័យការពារផលប្រយោជន៍របស់ប្រជាពលរដ្ឋកុំឱ្យរងគ្រោះនៅថ្ងៃក្រោយ។ លោក ហ្វីណង់ បន្តថា៖« យើងផ្អាកដើម្បីបង្ខំឱ្យគាត់(ម្ចាស់អាជីវកម្ម) ត្រូវទៅសុំច្បាប់អនុញ្ញាតលិខិតអនុញ្ញាតអភិវឌ្ឍន៍ដីជាមុន តែបើគាត់អត់មានប្លង់កម្មសិទ្ធិរឹងទេ គឺធ្វើអត់ទាន់បានទេ នេះជាបញ្ហាក្ដៅនៅស្រុកបន្ទាយស្រី គឺអ្នកលក់មួយចំនួនអត់ទាន់មានប្លង់រឹងគ្រប់គ្រាន់ដើម្បីអភិវឌ្ឍន៍ដីទេ បើសិនគាត់ចង់អភិវឌ្ឍន៍ដីធ្លី ប្លង់ដែលគាត់ប្រើប្រភេទប្លង់រឹងដាច់ដោយឡែក ឬ LMAP ហើយបន្ទាយស្រីសព្វថ្ងៃមានតិចណាស់ប្រភេទប្លង់នេះ ហើយយើងបារម្ភការយកប្លង់ក្រៅពីនេះទៅពុះឡូត៍លក់ គឺអាចបង្កភាពស្មុគស្មាញនៅពេលក្រោយ»។
អភិបាលស្រុកបន្ទាយស្រី លោក ឃឹម ហ្វីណង់ ពេលចុះពិនិត្យទីតាំងក្រុមហ៊ុនពុះដីឡូតិ៍លក់នាពេលកន្លងមក។ រូបភាព៖ ហ្វេសប៊ុក លោក ឃឹម ហ្វីណង់
រដ្ឋបាលស្រុកបន្ទាយស្រី បានណែនាំឲ្យក្រុមហ៊ុន រុះរើរាល់ផ្លាកសញ្ញាផ្សព្វផ្សាយពាណិជ្ជកម្ម បញ្ឈប់ការផ្សព្វផ្សាយគ្រប់រូបភាព ទាំងលើបណ្តាញសង្គមផងដែរ និងស្នើសុំលិខិតអនុញ្ញាតអភិវឌ្ឍដីទៅកាន់អាជ្ញាធរមានសមត្ថកិច្ច មុននឹងផ្សព្វផ្សាយ សាងសង់ ឬលក់ដូរជាសាធារណៈទៅបាន។
បន្ថែមពីនេះ តាមការលើកឡើងរបស់អភិបាលស្រុកបន្ទាយស្រី គោលបំណងនៃការរឹតបន្ដឹងក្រុមហ៊ុនអាជីវកម្មពុះដីឡូត៍នេះ ដើម្បីគ្រប់គ្រងតំបន់ដែលណាគួរអភិវឌ្ឍន៍ ឬមិនគួរនោះផងដែរ។ លោក ហ្វីណង់ ពន្យល់ថា តំបន់មួយចំនួនក្នុងស្រុកបន្ទាយស្រី មានសក្កានុពលផ្សេងៗគ្នា តំបន់ខ្លះមិនស័ក្ដិសម នឹងពុះដីឡូត៍ ឬធ្វើផ្ទះល្វែងឡើយ។ ឯតំបន់ខ្លះគួរតែជាតំបន់កសិកម្ម ហើយតំបន់ខ្លះទៀត គួរតែថែរក្សាអត្ដសញ្ញាណទេសភាពដើម ឬទេសភាពវប្បធម៌របស់ស្រុកវប្បធម៌មួយនេះ មិនគួរឱ្យក្លាយជាតំបន់ផ្ទះល្វែង ឬពុះដីឡូត៍ឡើយ»៕
ទីតាំងក្រុមហ៊ុនពុះដីឡូតិ៍លក់ក្នុងភូមិសាស្ត្រស្រុកបន្ទាយស្រីនាពេលកន្លងមក។ រូបភាព៖ ហ្វេសប៊ុក លោក ឃឹម ហ្វីណង់
Tag:
ដីឡូត៍
ស្រុកបន្ទាយស្រី
ឃឹម ហ្វីណង់
© រក្សាសិទ្ធិដោយ thmeythmey.com