ជាតិ
សហព័ន្ធស្រូវអង្ករកម្ពុជា បង្ហាញលទ្ធផលសំណាកអង្ករល្អជាងគេ សម្រាប់យកទៅប្រកួតអង្ករល្អបំផុតរបស់ពិភពលោក
រូបភាពពីសហព័ន្ធស្រូវអង្ករកម្ពុជា
×![]()
ដោយ: ឡាយ សុភាវតី
សហព័ន្ធស្រូវអង្ករកម្ពុជា បានបង្ហាញពីលទ្ធផលនៃការជ្រើសរើសសំណាកអង្ករល្អជាងគេរបស់កម្ពុជា យកទៅប្រកួតប្រជែងអង្ករល្អជាងគេបំផុតរបស់ពិភពលោក នៅប្រទេសហ្វីលីពីន។ នេះបើតាមសេចក្តីប្រកាសព័ត៌មានរបស់សហព័ន្ធស្រូវអង្ករ នៅថ្ងៃទី២ ខែវិច្ឆិកា ឆ្នាំ២០១៩។
ការប្រកួតអង្ករល្អជាងគេនៅកម្ពុជា បានរៀបចំឡើង នៅថ្ងៃទី៣១ ខែតុលា ឆ្នាំ២០១៩ នៅភោជនីយដ្ឋានគ្រឿង ហ្គាដិន ដែលមានការចូលរួមពីលោក ហ៊ុន ឡាក់ ប្រធានក្រុមប្រឹក្សាភិបាលសហព័ន្ធស្រូវអង្ករក្ពុជា និងសហប្រតិបត្តិការជាមួយសមាគមចុងភៅកម្ពុជា មានសមាសភាពគណៈកម្មការចុងភៅទាំងខ្មែរ និងបរទេស ចំនួន៩រូប រួមទាំងក្រុមហ៊ុនពិនិត្យគុណភាពអង្ករអន្តរជាតិចំនួន២ គឺក្រុមហ៊ុន OMIC និង ក្រុមហ៊ុន CCIC។
កម្មវិធីនេះ មានក្រុមហ៊ុនចំនួន៩ និងអង្គការសហគមន៍ចំនួន១ បានប្រគល់នូវផលិតផលអង្ករជាសំណាកចំនួន១៨ចំណាក ក្នុងប្រភេទអង្ករ៣ប្រភេទ ដែលក្នុងនោះ ប្រភេទអង្ករក្រអូបប្រណិតចំនួន៦សំណាក ប្រភេទអង្ករក្រអូបចំនួន៧សំណាក និងប្រភេទអង្ករសគ្រាប់វែង៥សំណាក។
ក្រោមការវិនិច្ឆ័យយ៉ាងម៉ត់ចត់ពី គណៈកម្មការវាយតម្លៃ និងដាក់ពិន្ទុចំនួន១៤រូប ដោយផ្អែកលើលក្ខណៈវិនិច្ឆ័យដើម ដូចជា សពោះ ភាពបាក់ រូបរាង ទំហំ ពណ៌ ប្រវែង ភាពភ្លឺរលោង ក្លិន និង លក្ខណសម្បត្តិក្រោយចម្អិន រួមមាន ភាពភ្លឺរលោង ភាពស្អិតរមួត រសជាតិ ក្លិន និង ភាពងាយក្នុងការញ៉ាំ។
លទ្ធផលសំណាកអង្ករដែលបានពិន្ទុល្អជាងគេ ហើយទទួលបានលទ្ធផល គឺ ជ័យលាភីលើប្រភេទអង្ករក្រអូបប្រណិត (Premium Aromatice Rice) ស្ថិតនៅក្នុងម៉ាកអង្ករ «ម្លិះអង្គរ» ចំណាត់ថ្នាក់លេខ១គឺ ក្រុមហ៊ុន បេតាម៉រ, លេខ២ ក្រុមហ៊ុន ស៊ីកនេតឈ័ អហ្វអេស៊ា និង លេខ៣ ក្រុមហ៊ុន បាយ័ន សៀរាល។
ជ័យលាភីលើអង្ករក្រអូប (Fragrant Rice) ពូជសែនក្រអូប ចំណាត់ថ្នាក់លេខ១គឺ ក្រុមហ៊ុន បាត់ដំបងរ៉ាយស៍ អ៊ិនវេសមេន, លេខ២ ក្រុមហ៊ុន អេមរុ រាយស៍ និង លេខ៣ ក្រុមហ៊ុន បាយ័ន សៀរាល។
រីឯ ជ័យលាភីលើអង្ករសគ្រាប់វែង (Long Grain White Rice) ចំណាត់ថ្នាក់លេខ១គឺ ក្រុមហ៊ុន វង្ស ប៊ុនហេង, លេខ២ អង្គការសហគមន៍អភិវឌ្ឍន៍សង្គមកម្ពុជា និង លេខ៣ ក្រុមហ៊ុន បេតាម៉រ។
សូមជម្រាបថា អង្ករកម្ពុជា ធ្លាប់ឈ្នះពានអង្ករល្អបំផុតដំបូង នៅឆ្នាំ២០១២ ហើយឈ្នះពីរឆ្នាំបន្តបន្ទាប់ គឺ ឆ្នាំ២០១៣ នៅទីក្រុងហុងកុង និង ឆ្នាំ២០១៤ ជាពេលដែលកម្ពុជាធ្វើជាម្ចាស់ផ្ទះ។ នៅឆ្នាំ២០១៨ ក៏អង្ករកម្ពុជាប់លេខ១ផងដែរ៕
Tag:
អង្ករ
© រក្សាសិទ្ធិដោយ thmeythmey.com
