ជាតិ
×![]()
សៀមរាប៖ កម្លាំងចម្រុះដែលមានអាជ្ញាធរជាតិអប្សរា និងរដ្ឋបាលក្រុងសៀមរាប បានប្រតិបត្តិការរុះរើសំណង់របងខុសច្បាប់មួយកន្លែងដែលស្ថិតនៅលើទីទួលបុរាណដែលអ្នកភូមិហៅថា ត្រពាំងហែផ្កា។ សំណង់របងដែលមានកម្ពស់ជាង២ម៉ែត្រ ត្រូវបានវាយកម្ទេចចោល ក្នុងន័យថែរក្សានិងការងារតំបន់រមណីយដ្ឋានវប្បធម៌ជាតិ។
ប្រតិបត្តិកររុះរើរបងថ្មដែលជាកម្មសិទ្ធិឈ្មោះ ឃុត សុខន គឺស្ថិតនៅភូមិបុស្សក្រឡាញ់ សង្កាត់ជ្រាវ ក្រុងសៀមរាប។ មុនប្រតិបត្តិការវាយកម្ទេចនៅព្រឹកថ្ងៃទី១ វិច្ឆិកា មន្ត្រីនៃអាជ្ញាធរជាតិអប្សរាបានធ្វើបទសម្ភាសជាមួយក្រុមអ្នកសារព័ត៌មាន ដើម្បីឱ្យដឹងពីសាវតានៃទីតាំងនេះ។ នៅចំពោះមុខក្រុមអ្នកសារព័ត៌មានប្រមាណ២០រូប លោក ឡុង កុសល អ្នកនាំពាក្យអាជ្ញាធរជាតិអប្សរាបានឱ្យដឹងថា ត្រពាំងហែផ្កាជាទួលបុរាណដ្ឋានដែលមានប្រវត្តិក្នុងស.វទី៩មកម្លេះ។ លោកបន្តថា ការចុះរុះរើនេះគឺមានការឯកភាពពីម្ចាស់សំណង់ ដែលព្រមព្រៀងឱ្យមានការរុះរើដោយសន្ដិវិធី។ លោកពន្យល់ថា មុនការងារនេះកើតឡើង អាជ្ញាធរជាតិអប្សរាបានហៅឈ្មោះ ឃុត សុខន មកប្រជុំដោះស្រាយចំនួន២លើក គឺលើកទី១នៅថ្ងៃទី២២ និងលើកទី២នៅថ្ងៃទី២៤ តុលា ដោយបុគ្គលនេះព្រមទទួលស្គាល់កំហុស និងសុំឱ្យអាជ្ញាធរជួយរុះរើសំណង់ខុសច្បាប់ខ្លួនផងដែរ។
ដ្បិតថា ការងារនេះមានការឯកភាពពីម្ចាស់សំណង់ក៏ពិតមែន តែអំឡុងពេលប្រតិបត្តិការរុះរើ ក៏កើតមានរូបភាពតវ៉ាពីក្រុមប្រជាពលរដ្ឋដែលមានគ្នាប្រមាណជាង១០នាក់ និងអ្នកសារព័ត៌មាន៣នាក់ ក្នុងរូបភាពការងារផលប្រយោជន៍ដល់ម្ចាស់របង។ ពេលតវ៉ានោះ ពួកគេបានយកដុំថ្មគប់សំដៅលើគ្រឿងចក្រ ក្នុងបំណងបញ្ឈប់សកម្មភាពមិនឱ្យបន្តកាយរបងថ្មតទៅទៀត។ អ្នកបើកគ្រឿងចក្រក៏បានរងរបួសស្រាលផងដែរក្នុងហេតុការណ៍នេះ។
លោក ឃុត សុខន ដែលជាម្ចាស់សំណង់ខាងលើ ឆ្លើយថា លោកមិនបានដឹងពីការតវ៉ារបស់ក្រុមប្រជាពលរដ្ឋ និងអ្នកសារព័ត៌មានទាំងនោះទេ ហើយក៏មិនបានទិញទឹកចិត្តពួកគេដែរ។ នៅចំពោះមុខអាជ្ញាធរក្រុងសៀមរាប អ្នករកស៊ីផ្នែកអចលនទ្រព្យរូបនេះ ព្រមផ្តិតមេដៃលើកិច្ចសន្យារុះរើដើម្បីបញ្ចប់រឿងត្រឹមថ្ងៃកើតហេតុ និងព្រមឱ្យអាជ្ញាធរបន្តរុះរើរបងដែលខ្លួនបានសង់រយៈពេល២ឆ្នាំមកនេះដោយគ្មានការតវ៉ាឬពន្យារពេលទៀតនោះទេ។
ក្នុងប្រតិបត្តិការដឹកនាំកម្លាំងចុះសហការរុះរើនៅរសៀលថ្ងៃដដែល អភិបាលក្រុងសៀមរាបលោក នួន ពុទ្ធារ៉ា បានប្រាប់ក្រុមអ្នកសារព័ត៌មានថា កម្លាំងរបស់លោកមានភារកិច្ចសហការជាមួយអាជ្ញាធរជាតិអប្សរាក្នុងការថែរក្សាទីតាំងបុរាណដ្ឋានដែលត្រូវបានការការពារដោយច្បាប់។ លោកថា ក្នុងករណីបុគ្គលណារារាំងសកម្មភាពរបស់អាជ្ញាធរ គឺពួកគេអាចត្រូវចោទថា បានរារាំងការងាររបស់កម្លាំងសមត្ថកិច្ច។
នៅទីបំផុត កម្លាំងចម្រុះបានអនុវត្តន៍ការងារដោយរលូត ដោយគ្មានការតវ៉ាទៀតឡើយ ចំណែកសំណង់របងខុសច្បាប់២ទីតាំង ត្រូវបានកម្ទេចចោលនៅល្ងាចថ្ងៃទី១ វិច្ឆិកា។
លោក ឡុង កុសល ពន្យល់ថា រាល់សំណង់ខុសច្បាប់ដែលសង់លើតំបន់ការពារ គឺត្រូវរុះរើទាំងអស់ដោយមិនគិតថា ជារបស់អ្នកតូចឬអ្នកធំឡើយ។ ក្នុងនោះ លោកស្នើទៅប្រជាពលរដ្ឋមុនសង់សំណង់នៅតំបន់ដែលការពារ ត្រូវជូនដំណឹងឬដាក់ច្បាប់មកអាជ្ញាធរជាតិអប្សរា ដើម្បីឱ្យអ្នកជំនាញចុះត្រួតពិនិត្យអំពីលទ្ធភាពនៃការអនុញ្ញាត មិនត្រូវសង់ដោយលួចលាក់ឬខុសច្បាប់ឡើយ បង្ការពីការខាតបង់ទ្រព្យសម្បត្តិនាពេលក្រោយ៕
Tag:
សំណង់ខុសច្បាប់
ត្រពាំងហែផ្កា
អប្សរា
ឡុង កុសល
© រក្សាសិទ្ធិដោយ thmeythmey.com
