ជាតិ
សហភាពអឺរ៉ុប ឧបត្ថម្ភប្រាក់ជាង១ម៉ឺនដុល្លារដល់ទូកចែវនារីព្រះពៃស្រពណ៍ ដើម្បីលើកកម្ពស់សមភាពយេនឌ័រ ប្រតិភូនៃសហភាពអឺរ៉ុបអ្នកស្រី ខាមីឡា ឡមបាទ ប្រគេនបច្ច័យនិងឯកសណ្ឋានប្រកួតដល់ព្រះចៅអធិកាវត្តព្រះពៃស្រពណ៍សម្រាប់ឧបត្ថម្ភដល់ទូកចែវនារី
× ភ្នំពេញ៖ សហភាពអឺរ៉ុបប្រចាំកម្ពុជា បានឧបត្ថម្ភថវិកាចំនួន ១០,៣០០ ដុល្លារអាមេរិក ដល់ទូកចែវនារីឈ្មោះ ព្រះពៃស្រពណ៍ នៅខេត្តកំពង់ឆ្នាំង ដែលត្រូវចូលរួមប្រកួត ក្នុងព្រះរាជពិធីបុណ្យអុំទូក នៅរាជធានីភ្នំពេញ នៅថ្ងៃទី១០-១២ វិច្ឆិកាខាងមុខ។ ការឧបត្ថម្ភដល់ទូកចែវនារីនាឱកាសបុណ្យអុំទូកនេះ គឺដើម្បីលើកកម្ពស់សមភាពយេនឌ័រ។ តាមសហភាពអឺរ៉ុបប្រចាំកម្ពុជា ថវិកានេះ នឹងត្រូវប្រើប្រាស់សម្រាប់ការជួសជុលទូក ទិញឯកសណ្ឋានប្រកួត ចំណាយលើម្ហូបអាហារក្នុងអំឡុងពេលហាត់សម និងការចំណាយផ្សេងៗក្នុងពេលប្រកួតជាលក្ខណៈថ្នាក់ជាតិ នៅរាជធានីភ្នំពេញ។
អ្នកស្រី ខាមីឡា ឡមបាទ ប្រតិភូនៃសហភាពអឺរ៉ុបប្រចាំកម្ពុជា បានយកថវិកាឧបត្ថម្ភទៅប្រគល់ផ្ទាល់ ដល់ទូកចែវនារីព្រះពៃស្រពណ៍ នៅទីតាំងក្នុងវត្តព្រះពៃស្រពណ៍ ដែលស្ថិតក្នុងភូមិកំពង់បាស្រូវ ឃុំជលសា ស្រុកជលគិរី ខេត្តកំពង់ឆ្នាំង កាលពីថ្ងៃទី២៩ ខែតុលា ឆ្នាំ២០១៩។
សកម្មភាពទូកចែវនារីព្រះពៃស្រពណ៍កំពុងហាត់សមនៅក្នុងដៃទន្លេសាប ខាងមុខវត្តព្រះពៃស្រពណ៍
ក្នុងពេលប្រគល់ថវិកា អ្នកស្រី ខាមីឡា ឡមបាទ បានបញ្ជាក់ពីបំណងដែលសហភាពអឺរ៉ុបជួយឧបត្ថម្ភដល់ទូកចែវនារីព្រះពៃស្រពណ៍ថា ដើម្បីជំរុញបន្ថែមទៀត លើកិច្ចខិតខំប្រឹងប្រែងដើម្បីគាំទ្រប្រពៃណីវប្បធម៌ ដ៏សំខាន់របស់ប្រទេសកម្ពុជា។ អ្វីដែលសំខាន់ទៀតនោះ គឺដើម្បីលើកទឹកចិត្តនារីកម្ពុជានៅមូលដ្ឋាន ឱ្យជួយលើកកម្ពស់សមភាពយេនឌ័រក្នុងប្រទេសកម្ពុជា។អ្នកស្រី ខាមីឡា ឡមបាទ បញ្ជាក់បន្ថែម៖«សហភាពអឺរ៉ុបមិនត្រឹមតែនិយាយឡើយ ប៉ុន្តែយើងថែមទាំងមានសកម្មភាពផងដែរ ដើម្បីលើកកម្ពស់សមភាពយេនឌ័រ។ សក្ដានុពលរបស់ស្ត្រី ក៏ដូចជាបុរសដែរ។ នារី ក៏អាចធ្វើអ្វីៗគ្រប់យ៉ាងដូចបុរសដែរ។ នារីត្រូវតែហ៊ានបង្ហាញ នូវអ្វីដែលជាសក្ដានុពលរបស់ខ្លួន។ ពួកគេត្រូវតែហ៊ាននិយាយចេញនូវអ្វីដែលខ្លួនត្រូវការ ហើយត្រូវចាប់យកឱកាសឱ្យបានដោយមិនមានការអៀនខ្មាស»។
សូបបញ្ជាក់ថា នេះជាឆ្នាំទី២ហើយដែលសហភាពអឺរ៉ុប បានឧបត្ថម្ភទូកចែវនារីព្រះពៃស្រពណ៍ ដែលមានទីតាំងស្ថិតក្នុងភូមិកំពង់បាស្រូវ ឃុំជលសា ស្រុកជលគិរី ខេត្តកំពង់ឆ្នាំង។ លើកទី១ ទូកចែវនារីនេះ បានទទួលបានប្រាក់ឧត្ថម្ភចំនួន ៧លានរៀល និងលើកនេះ មានចំនួនទឹកប្រាក់ ១០,៣០០ដុល្លារអាមេរិក។
ប្រតិភូនៃសហភាពអឺរ៉ុបអ្នកស្រី ខាមីឡា ឡមបាទ ថតជាមួយក្រុមទូកចែវនារីព្រះពៃស្រពណ៍ ក្នុងសាលាឆាន់វត្តព្រះពៃស្រពណ៍ ខណៈពេលនាំយកប្រាក់ឧបត្ថម្ភទៅជូន
សហភាពអឺរ៉ុបគឺជាដៃគូមួយ ក្នុងចំណោមដៃគូអភិវឌ្ឍន៍ធំបំផុត របស់រាជរដ្ឋាភិបាលកម្ពុជា ដោយគិតពីជំនួយហិវញ្ញប្បទាន និងថវិកាឧបត្ថម្ភគម្រោង។ សហភាពអឺរ៉ុប គាំទ្រគម្រោងនានា ដើម្បីកាត់បន្ថយភាពក្រីក្រ និងលើកកម្ពស់ជីវភាពរបស់ប្រជាជនកម្ពុជា។ គម្រោងនានាដែលឧបត្ថម្ភដោយសហភាពអឺរ៉ុប ចាប់ពីវិស័យនេសាទ អប់រំ កសិកម្ម ការប្រែប្រួលអាកាសធាតុ ជំនួយពាក់ព័ន្ធនឹងពាណិជ្ជកម្ម រហូតដល់ការលើកកម្ពស់អភិបាលកិច្ចល្អ និងសិទ្ធិមនុស្ស។គម្រោងទាំងនេះកំពុងតែផ្ដល់ប្រយោជន៍ឱ្យដល់ប្រជាជនកម្ពុជារាប់លាននាក់។
ដោយគិតតែជំនួយឥតសំណងសម្រាប់ការអភិវឌ្ឍ ជារៀងរាល់ឆ្នាំសហភាពអឺរ៉ុប ចូលរួមចំណែកថវិកាប្រមាណ ៧៥ លានអឺរ៉ូ គាំទ្រការអភិវឌ្ឍប្រទេសកម្ពុជា។ បើគិតតែក្នុងឆ្នាំ២០១៨ សហភាពអឺរ៉ុប បានផ្ដល់ជំនួយឥតសំណងចំនួន ៨៣.៥លានដុល្លារអាមេរិក ដល់កម្ពុជា៕
Tag:
ទូកង
អុំទូក
សហភាពអឺរ៉ុប
ទូក
ព្រះពៃស្រពណ៍
នារី
យេនឌ័រ
ស្ត្រី
© រក្សាសិទ្ធិដោយ thmeythmey.com