ជាតិ
សង្គមជាតិ
យុទ្ធនាការ «ភ្នំពេញស្អាត» បំផុសស្មារតីឲ្យអ្នកបោះចោលសំរាម មើលគំរូអ្នករើសសំរាម លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងសហស្ថាបនិកគម្រោងភ្នំពេញស្អាត ថ្លែងនៅក្នុងពិធីបើកដំណើរការយុទ្ធនាការភ្នំពេញស្អាតឆ្នាំ២០១៩ នាថ្ងៃទី០២ ខែវិច្ឆិកា ឆ្នាំ២០១៩។
× ភ្នំពេញ៖ ក្នុងយុទ្ធនាការ «ភ្នំពេញស្អាត» ដែលរៀបចំឡើងដោយក្រុមការងារយុវជនសុឆន្ទៈ នៅថ្ងៃទី២ ខែវិច្ឆិកា ឆ្នាំ២០១៩ ផ្តោតសំខាន់លើការបញ្ជ្រាបឲ្យពលរដ្ឋមានស្មារតីស្រឡាញ់បរិស្ថាន តាមរយៈការវេចខ្ចប់សំរាមឲ្យបានត្រឹមត្រូវ។ ជាពិសេសក្រើនរំលឹកដល់អ្នកដែលនិយមបោះចោលសំរាមផ្តេសផ្តាស ងាកត្រឡប់មកមើលគំរូដល់អ្នកដែលចូលរួមប្រមូលសំរាម។
នេះជាឆ្នាំទី៣ហើយ ដែលបង្កើតឲ្យមានយុទ្ធនាការ«ភ្នំពេញស្អាត»។ យុទ្ធនាការ«ភ្នំពេញស្អាត»ឆ្នាំនេះ នឹងប្រមូលផ្តុំទៅដោយក្រុមយុវជន សិស្ស និស្សិត មន្ត្រីរាជការ ស្ថានប័នពាក់ព័ន្ធ អ្នកគ្រប់គ្រងគ្រឹះស្ថានសិក្សា សិល្បករ ដើម្បីដោះស្រាយបញ្ហាសំរាម និងជាគំរូភាពដល់ពលរដ្ឋឲ្យចេះគិតគូររឿងបញ្ហាសំរាម។ យុទ្ធនាការនេះនឹងមានរយៈពេល១ខែ នៃវិច្ឆិកានេះ។ ក្នុងរយៈពេលមួយខែនេះ ក្រុមការងាររៀបចំយុទ្ធនាការ«ភ្នំពេញស្អាត» នឹងចូលរួមផ្តល់ជាសារអប់រំដល់ពលរដ្ឋ និងកៀរគរឲ្យពលរដ្ឋរួមគ្នាជាមួយក្រុមការងាររៀបចំយុទ្ធនាការក្នុងការសម្អាតបរិស្ថានទាំងអស់គ្នា។
នៅក្នុងយុទ្ធនាការ«ភ្នំពេញស្អាត»ដែលរៀបចំនៅអគារមជ្ឈមណ្ឌលជាតិហ្វឹកហ្វឺនកីឡាថ្មី(NOCC)នៅថ្ងៃទី២ ខែវិច្ឆិកា លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងសហស្ថាបនិកនៃគម្រោងភ្នំពេញស្អាត បានលើកឡើងថា រយៈពេលមួយខែនៃយុទ្ធនាការ«ភ្នំពេញស្អាត»នេះ នឹងអាចដក់ជាប់ដល់អារម្មណ៍របស់ពលរដ្ឋ ដែលមានទម្លាប់បោះចោលសំរាម មកជាការទុកដាក់សំរាមឲ្យបានត្រឹមត្រូវវិញ តាមរយៈសកម្មភាពការប្រមូលសំរាមរបស់ក្រុមយុវជន។
«យើងត្រូវគិតថាកម្ពុជាជាផ្ទះរបស់យើង។ អ៊ីចឹងហើយយើងគួរតែចូលរួមថែរក្សាទាំងអស់គ្នា ទោះបីតិច ឬច្រើន។ ខ្ញុំសង្ឈឹមថាតាមរយៈយុទ្ធនាការនេះនឹងជាគំរូភាព និងអាចផ្លាស់ប្តូរឥរិយាបថរបស់យុវជន និងពលរដ្ឋ មិនឲ្យបោះចោលសំរាមប៉ាតណាប៉ាតណីតទៅទៀត»។ នេះជាការលើកឡើងរបស់លោក ហ៊ុន ម៉ានី ដែលចង់ឲ្យអ្នកមានទម្លាប់ចោលសំរាមផ្តេសផ្តាស ឲ្យមកគិតពីអ្នករើសសំរាម។
លោក នួន ផារ័ត្ន អភិបាលរងនៃគណៈអភិបាលរាជធានីភ្នំពេញ បានបញ្ជាក់ថា សាលារាជធានីភ្នំពេញនឹងចូលរួមក្នុងយុទ្ធនាការភ្នំពេញស្អាត ដើម្បីធ្វើកិច្ចការងារញែកសំរាមជា៣ប្រភេទ គឺ សំរាមពីលំនៅដ្ឋាន-នៅតាមរមណីយដ្ឋាន សំរាមវិទ្យាសាស្ត្រ និងសំរាមពីវិស័យឧស្សាហកម្ម។
អភិបាលរងរូបនេះ អះអាងថា បច្ចុប្បន្ន សាលាក្រុងភ្នំពេញកំពុងតែធ្វើកិច្ចការនេះ។ លោក បញ្ជាក់ថា បើទោះបីកិច្ចការនេះមិនទាន់បានល្អប្រសើរដូចនឹងបណ្តាប្រទេសដទៃក៏ពិតមែន តែក៏ចាត់ទុកថាជាកិច្ចប្រឹងប្រែងដែលល្អប្រសើរដែរ។ លោកបន្ថែមថា ការងារគ្រប់គ្រងសំរាម គឺជាភារកិច្ចរបស់រាជធានីភ្នំពេញ ស្ថាប័នពាក់ព័ន្ធ និងពលរដ្ឋចូលរួមគ្នាក្នុងកិច្ចការងារមួយនេះ ទើបធានាបាននូវការរស់នៅល្អ និងបរិស្ថានស្អាត។
សូមបញ្ជាក់ថា នៅកម្ពុជាមានសំរាមជាង១ម៉ឺនតោន ដែលក្នុងនោះរាជធានីភ្នំពេញមានប្រមាណ៣ពាន់តោន ក្នុងមួយថ្ងៃ៕
Tag:
សំរាម
ពលរដ្ឋ
អប់រំ
© រក្សាសិទ្ធិដោយ thmeythmey.com