ភ្នំពេញ៖ ប្រធានសហព័ន្ធកីឡាបាល់ទាត់ពិភពលោក លោក Gianni Infantino បានចុះអនុស្សារណៈយោគយល់គ្នា ជាមួយសមាគមអាស៊ាន ដើម្បីចូលរួមការអភិវឌ្ឍសង្គម នៅក្នុងតំបន់។ ការចុះកិច្ចព្រមព្រៀងនេះ ធ្វើឡើងនៅក្នុងកិច្ចប្រជុំអាស៊ានលើកទី៣៥ នៅទីក្រុងបាងកក ប្រទេសថៃ កាលពីថ្ងៃទី២ វិច្ឆិកា ។
គោលបំណងនៃការចុះអនុស្សារណៈរវាងភាគីទាំងពីរនេះ គឺផ្ដោតទៅលើវិស័យអប់រំ ជាពិសេសជំរុញ និងដាក់បញ្ចូលកីឡាចូលទៅកម្មវិធីសិក្សា ដើម្បីឱ្យក្លាយទៅជាស្មារតីអប់រំជាធ្លុងមួយ។ ប្រធានសហព័ន្ធបាល់ទាត់ពិភពលោក លោក Gianni Infantino បានថ្លែងនៅក្នុងពិធីចុះហត្ថលេខា នៃកិច្ចប្រជុំអាស៊ានយ៉ាងដូច្នេះថា៖«បន្ទាប់ពីយើងបានជួបពិភាក្សាជាច្រើនឆ្នាំកន្លងមក ជាមួយបណ្ដាប្រទេសនៃសមាជិកអាស៊ាននោះ នៅពេលនេះយើងបានស្វែងរកឃើញនៅប្រធានបទរួមគ្នាមួយនោះ គឺ បាល់ទាត់។ ប្រជាពលរដ្ឋនៅក្នុងប្រទេសរបស់អ្នក (សមាជិកអាស៊ាន)។ អ្នកជំនួញនៅក្នុងប្រទេសរបស់អ្នក គឺបានវិនិយោគជាង១០ដង លើវិស័យបាល់ទាត់នៅអឺរ៉ុប ច្រើនជាងវិស័យបាល់ទាត់នៅតំបន់អាស៊ាន។ ប៉ុន្តែយើងចាំបាច់ត្រូវវិនិយោគ(វិស័យកីឡា)នៅក្នុងតំបន់អាស៊ាន»។
ក្រោយចុះMOU ហើយ ភាគទាំងពីរ (អាស៊ាន និងFIFA) ក៏នឹងធ្វើការរួមគ្នា ដើម្បីលើកកម្ពស់វិស័យបាល់ទាត់ ដោយផ្តោតលើស្ត្រីនិងសហគមន៍ ដែលប្រឈមនឹងការបាត់បង់ឱកាស។ ជាពិសេសជួយការពារកុមារ និងលើកកម្ពស់ភាពថ្លៃថ្នូរនៃវិស័យកីឡា តាមរយៈការចែករំលែកចំណេះដឹងពីរបៀបលេងឱ្យល្អប្រកបដោយភាពត្រឹមត្រូវ និងយុត្តិធម៌។
អគ្គលេខាធិការអាស៊ានលោក Lim Jock Hoi បាននិយាយថា «កីឡាបាល់ទាត់ និងកីឡាផ្សេងទៀត គឺជាយុទ្ធសាស្ត្រយ៉ាងសំខាន់មួយ ដែលផ្លូវនាំឱ្យមនុស្សទាំងអស់ចេះរួបរួមគ្នា, លើកកម្ពស់ទំនាក់ទំនងគ្នាទៅវិញទៅមក ពីមនុស្សម្នាក់ទៅកាន់មនុស្សម្នាក់ ហើយនឹងផ្សារភ្ជាប់ពួកយើងទៅជាសហគមន៍ដ៏រឹងមាំមួយ»។
ទាក់ទងនឹងវិស័យកីឡានេះ កន្លងមកថៃ និងបណ្ដាប្រទេសអាស៊ានចំនួន៤ផ្សេងទៀត រួមគ្នាដេញថ្លៃ ធ្វើជាម្ចាស់ផ្ទះព្រឹត្តិការណ៍កីឡាបាល់ទាត់ពិភពលោក FIFA World Cup ឆ្នាំ ២០៣៤។ ដំបូងឡើយថៃចង់រួមគ្នាជាមួយប្រទេសទាំង១០តែម្តង ប៉ុន្តែបានផ្លាស់ប្តូរវិញ ដោយមានកិច្ចព្រមព្រៀងគ្នា នៅក្នុងកិច្ចប្រជុំរដ្ឋមន្ត្រីកីឡាអាស៊ានលើកទី ៥ នៅទីក្រុងម៉ានីល ប្រទេសហ្វីលីពីនថ្ងៃទី៩ ខែតុលា។ ប្រទេស៤ផ្សេងទៀត ដែលនឹងចូលរួមដេញថ្លៃរួមគ្នាជាមួយថៃនោះ រួមមាន ឥណ្ឌូណេស៊ី ម៉ាឡេស៊ី សិង្ហបុរី និងវៀតណាម ខណៈដែលកម្ពុជា ឡាវ ហ្វីលីពីន ព្រុយណេ និង មីយ៉ាន់ម៉ាមិនចូលរួមឡើយ។
ប្រធាន FIFA លោក Gianni Infantino ស្វាគមន៍ចំពោះគោលបំណងរបស់អាស៊ាន ដែលចង់ធ្វើជាម្ចាស់ផ្ទះរៀបចំព្រឹត្តិការណ៍បាល់ទាត់ពិភពលោកនេះ។ មេFIFA រូបនេះ បាននិយាយថា «នេះគឺជាអ្វីដែលសមនឹងទទួលបានសម្រាប់ផ្នែកដ៏ធំមួយនៃពិភពលោក។ យើងត្រូវតែធ្វើការវិនិយោគលើបាល់ទាត់, ការប្រកួតនៅក្នុងក្លឹប, ក្នុងលីកជើងឯកអាស៊ានពិតប្រាកដ»។
ក្រៅពីប្រទេសអាស៊ាន ក៏មានប្រទេសជាច្រើនទៀត បានដេញថ្លៃរៀបចំព្រឹត្តិការណ៍បាល់ទាត់ World Cup 2034 ផងដែរ ក្នុងនោះរួមមាន ចិន អេហ្ស៊ីប នីហ្សេរីយ៉ា ស៊ីមបាវ៉ា អូស្ត្រាលី និង នូវែលសេឡង់ជាដើម។
ព្រឹត្តិការណ៍បាល់ទាត់ពិភពលោក បានរៀបចំធ្វើឡើង២១លើកមកហើយ ។ក្នុងចំណោមការប្រកួតកីឡានេះ ទ្វីបអាស៊ីទទួលសិទ្ធិរៀបចំធ្វើម្ចាស់ផ្ទះបានមួយលើកប៉ុណ្ណោះកាលពីឆ្នាំ២០០២ ដែលដឹកនាំដោយជប៉ុននិងកូរ៉េខាងត្បូង។ កាតាក៏នឹងក្លាយជាប្រទេសអាស៊ីទី៣ ដែលទទួលសិទ្ធិធ្វើម្ចាស់ផ្ទះក្នុងឆ្នាំ២០២២ផងដែរ នៅឡើយតែអាស៊ានប៉ុណ្ណោះ ដែលមិនទាន់ស្គាល់រសជាតិ៕