ជាតិ
នយោបាយជាតិ
សេចក្តីព្រាងច្បាប់ស្តីពី សន្ធិសញ្ញាបំពេញបន្ថែមលើការកំណត់ព្រំដែន ត្រូវបានសភាអនុម័ត
រូបពីហ្វេសប៊ុកសម្ដេច ហេង សំរិន ប្រធានរដ្ឋសភា ដែលបានដឹកនាំសម័យប្រជុំសភាលើកទី៣ នីតិកាលទី៦ នៅព្រឹកថ្ងៃទី៤ វិច្ឆិកា ឆ្នាំ២០១៩
×![]()
ដោយ: ធឿន បញ្ញាឬទិ្ធ
ភ្នំពេញ៖ សេចក្តីព្រាងច្បាប់ស្តីពី សន្ធិសញ្ញាបំពេញបន្ថែមលើកំណត់ព្រំដែន និងសេចក្តីព្រាងច្បាប់ចំនួន៤ផ្សេងទៀត ត្រូវបានរដ្ឋសភាអនុម័ត នៅក្នុងសម័យប្រជុំលើកទី៣ នីតិកាលទី៦ នៅព្រឹកថ្ងៃទី៤ វិច្ឆិកានេះ។
តាមរយៈហ្វេសប៊ុកសម្ដេច ហេង សំរិន ប្រធានរដ្ឋសភា ដែលបានបង្ហោះរូបថតប្រជុំសភា អមជាមួយសំណេរយ៉ាងដូច្នេះថា៖ «ឈរលើមូលដ្ឋាននៃសន្ធិសញ្ញាបំពេញបន្ថែមខាងលើនេះ ប្រទេសកម្ពុជានិងវៀតណាម បានដំណើរការចុះបោះបង្គោលនិងខណ្ឌសីមាព្រំដែនគោកនៅលើដីជាក់ស្តែងពីខេត្តរតនគិរី ដល់ខេត្តកំពត សម្រេចបានលទ្ធផល៨៤ភាគរយ។ រាជរដ្ឋាភិបាលកម្ពុជាបានប្តេជ្ញាចិត្តដ៍មោះមុតក្នុងសុឆន្ទៈ ដើម្បីសម្រេចបានព្រំដែនកម្ពុជា ជាមួយប្រទេសជិតខាង ដោយឈរលើមូលដ្ឋានគោរពឯករាជ្យ អធិបតេយ្យភាព និងបូរណភាពដែនដី»។
ជុំវិញការអនុម័តរបស់រដ្ឋសភានេះ ក៏មានការពេញចិត្តពីសំណាក់អ្នកនយោបាយនៅកម្ពុជាដែរ។ គណបក្សប្រជាធិបតេយ្យមូលដ្ឋានមូលដ្ឋាន បានចេញសេចក្តីថ្លែងការណ៍មួយ ដោយបានសង្កត់ធ្ងន់ថា រដ្ឋសភាមិនគួរផ្ដល់សច្ចាប័នលើសន្ធិសញ្ញាបំពេញបន្ថែមឡើង ខណៈស្ថានភាពនយោបាយមិនទាន់ល្អប្រសើរ។ «ក្នុងស្ថានភាពនយោបាយដែលប្រទេសនៅមិនទាន់មានឯកភាពជាតិ និងក្នុងពេលដែលសភាជាតិគ្រប់គ្រងដោយគណបក្សតែមួយ រដ្ឋសភានៃព្រះរាជាណាចក្រកម្ពុជា ពុំគួរផ្ដល់សច្ចាប័នលើសន្ធិសញ្ញា ឬកិច្ចព្រមព្រៀងលើបញ្ហាព្រំដែនឡើយ»។ នេះជាការលើកឡើងរបស់គណបក្សប្រជាធិបតេយ្យមូលដ្ឋាន។
កាលពីថ្ងៃទី១០ តុលា លោក វ៉ា គឹមហុង ប្រធានគណៈកម្មការទទួលបន្ទុកកិច្ចការព្រំដែនកម្ពុជា បានចូលបកស្រាយនៅក្នុងកិច្ចប្រជុំជាមួយឧត្តមក្រុមប្រឹក្សាពិគ្រោះនិងផ្តល់យោបល់ ពាក់ព័ន្ធនឹងរឿងព្រំដែនកម្ពុជា-វៀតណាម។ ក្រោយកិច្ចប្រជុំនោះ លោក វ៉ា គឹមហុង បានបញ្ជាក់ថា ការបោះបង្គោលព្រំដែនរវាងកម្ពុជា-វៀតណាម គ្មានភាគីណាមួយ បាត់បង់ទឹកដីឬខាតបង់នោះទេ ហើយវាក៏មិនប៉ះពាល់ដល់ប្រជាពលរដ្ឋនៅតាមព្រំដែនឡើយ។
លោក វ៉ា គឹមហុង បានបន្ថែមថា បញ្ហាព្រំដែនរវាងកម្ពុជា និងប្រទេសជិតខាង គ្មានអ្នកណាអាចជួយដោះស្រាយបានទេ សូម្បីតែអង្គការសហប្រជាជាតិ។ សម្រាប់លោក វ៉ា គឹមហុង ការដោះស្រាយបញ្ហាព្រំដែន គ្មានអ្វីក្រៅពីការប្រើប្រាស់វិធីសាស្ត្រសម្របសម្រួលដោយស្មើភាព ដើម្បីទទួលបានផលប្រយោជន៍ទៅវិញទៅមក។
អត្ថបទទាក់ទង
កាលពីថ្ងៃទី៥ តុលា ប្រមុខរដ្ឋាភិបាលកម្ពុជា និងសមភាគីវៀតណាម បានធ្វើសាក្សីក្នុងពិធីចុះហត្ថលេខាជាផ្លូវការលើសន្ធិសញ្ញាបំពេញបន្ថែមលើសន្ធិសញ្ញាកំណត់ព្រំដែនរដ្ឋឆ្នាំ១៩៨៥ និងសន្ធិសញ្ញាបំពេញបន្ថែមឆ្នាំ២០០៥ ដែលត្រូវបានប្រព្រឹត្តទៅនៅទីក្រុងហាណូយប្រទេសវៀតណាម។ បើទោះជាព្រំដែននៅសេសសល់១៦ភាគរយទៀតក្តី សម្រាប់សម្តេច ហ៊ុន សែន ការឈានដល់ការចុះហត្ថលេខាលើឯកសារប្រវត្តិសាស្ត្រទាក់ទងនឹងការខណ្ឌសីមាព្រំដែនរវាងប្រទេសទាំងពីរ ក៏បានបង្ហាញយ៉ាងច្បាស់ថា ដំណោះស្រាយព្រំដែនទ្វេរភាគី បានបោះជំហ៊ានទៅមុខដោយមោទនៈ និងប្រកបដោយភាតរភាព។ សម្តេច ហ៊ុន សែន បានប្រកាសថា លោកនឹងប្រឹងប្រែងបញ្ចប់បញ្ហាព្រំដែន ដើម្បីមនុស្សជំនាន់ក្រោយ។
ក្រៅពីការអនុម័តលើសេចក្តីព្រាងច្បាប់ខាងលើ រដ្ឋសភា ក៏បានអនុម័តសេចក្តីព្រាងច្បាប់៤ទៀតរួមមាន ច្បាប់ស្តីពី ការអនុម័តយល់ព្រមលើកិច្ចព្រមព្រៀងរវាងរាជរដ្ឋាភិបាលកម្ពុជា និងរដ្ឋាភិបាលនៃតំបន់រដ្ឋបាលពិសេសហុងកុង នៃសាធារណរដ្ឋប្រជាមានិតចិន ស្តីពីការចៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល។ ច្បាប់ស្តីពីការអនុម័តយល់ព្រមលើពិធីសារទី២ ស្តីពីការកំណត់ច្រកទ្វារព្រំដែនឆ្លងកាត់នៃកិច្ចព្រមព្រៀងក្របខ័ណ្ឌអាស៊ានស្តីពីកិច្ចកិច្ចសម្រប សម្រួលការដឹកជញ្ចូនទំនិញឆ្លងកាត់។ ច្បាប់ស្តីពី ការអនុម័តយល់ព្រមលើកិច្ចព្រម ព្រៀងអាស៊ានស្តីពីពាណិជ្ជកម្មតាមប្រព័ន្ធអេឡិចត្រូនិច និងចុងក្រោយច្បាប់ស្តីពីការអនុម័តយល់ព្រមឲ្យកម្ពុជាចូលជាសមាជិកនៃកិច្ចព្រមព្រៀងក្របខ័ណ្ឌ ស្តីពីការបង្កើតសម្ព័ន្ធភាពថាមពលព្រះអាទិត្យអន្តរជាតិ៕
Tag:
ហេង សំរិន
ព្រំដែន
វៀតណាម
© រក្សាសិទ្ធិដោយ thmeythmey.com
