ជាតិ
មន្ត្រី និងអ្នកសារព័ត៌មានកម្ពុជាជិត៣០រូប ទៅទស្សនកិច្ចនៅវៀតណាម ដើម្បីផ្លាស់ប្តូរវប្បធម៌
× ភ្នំពេញ៖ មន្ត្រីក្រសួងព័ត៌មាន និងអ្នកសារព័ត៌មានពីស្ថាប័នផ្សេងៗជិត៣០នាក់ បានទៅបំពេញទស្សនកិច្ចនៅប្រទេសវៀតណាម នៅថ្ងៃទី៥ វិច្ឆិកានេះ ដើម្បីផ្លាស់ប្តូរវប្បធម៌រវាងប្រទេសទាំងពីរ។
អនុរដ្ឋលេខាក្រសួងព័ត៌មាន លោក ឆាយ សុផល បាននិយាយថា គោលបំណងដ៏សំខាន់នៃដំណើរទស្សនកិច្ចនេះ គឺដើម្បីពង្រឹងទំនាក់ទំនងមិត្តភាព សាមគ្គីភាព កិច្ចសហប្រតិបត្តិការ និងការផ្លាស់ប្តូរបទពិសោធន៍លើវិស័យវប្បធម៌ សិល្បៈ អប់រំ ព័ត៌មាន និងផ្សព្វផ្សាយរវាងប្រទេសទាំងពីរ ដែលជាប្រយោជន៍ក្នុងនាមប្រទេសជិតខាង ក៏ដូចជាក្នុងក្របខ័ណ្ឌអាស៊ាន។ លោក ឆាយ សុផល បាននិយាយដូច្នេះថា៖« ជាការពិត កម្ពុជា និងវៀតណាមមានវប្បធម៌ដោយឡែកៗ និងពិសេសរៀងៗខ្លួន ដូច្នេះការស្វែងយល់ និងការផ្លាស់ប្តូរបទពិសោធន៍លើវិស័យនេះ ពិតជាធ្វើឲ្យប្រជាជននៃប្រទេសទាំងពីរ ពិសេសយុវជនកាន់តែយល់គ្នា និងរស់នៅភូមិផងរបងជាមួយគ្នាប្រកបដោយសុខដមរមនា»។
ដំណើរទស្សនកិច្ចចូលរួមក្នុង «ពិធីផ្លាស់ប្តូរបទពិសោធន៍ផ្នែកវប្បធម៌សម្រាប់អ្នកសារព័ត៌មានវ័យក្មេង យុវជន និងនិស្សិត» ដែលមានប្រតិភូផ្នែកសារព័ត៌មានចំនួន២៧រូប និងយុវជន និស្សិតប្រមាណ៦២រូបផ្សេងទៀតមកពីក្រសួងអប់រំ យុវជន និងកីឡា ត្រូវបានធ្វើឡើងនៅខេត្តតៃនិញ និងទីក្រុងហូជីមិញ រយៈពេល៣ថ្ងៃ ចាប់ពីថ្ងៃទី៥ វិច្ឆិកា។
សូមបញ្ជាក់ថា ដំណើរទស្សនកិច្ចនេះត្រូវបានធ្វើឡើង បន្ទាប់ពីមានការអញ្ជើញពីរដ្ឋាភិបាលនៃសាធារណរដ្ឋសង្គមនិយមវៀតណាម តាមរយៈក្រសួងព័ត៌មាននិងផ្សព្វផ្សាយ ដោយសហការជាមួយរាជរដ្ឋាភិបាលកម្ពុជា៕
© រក្សាសិទ្ធិដោយ thmeythmey.com