ជប៉ុនប្តេជ្ញាជំរុញការវិនិយោគនិងកម្ចីទ្វេដងក្នុងបណ្តាប្រទេសអាស៊ាន

អន្តរជាតិ

ជប៉ុនប្តេជ្ញាជំរុញការវិនិយោគនិងកម្ចីទ្វេដងក្នុងបណ្តាប្រទេសអាស៊ាន

05, Nov 2019 , 2:15 pm

រូបភាព

នាយករដ្ឋមន្ត្រីជប៉ុន ស៊ិនហ្សូ អាបេ (ពីឆ្វេងទៅស្តាំ លេខរៀងទី៥) ចាប់ដៃជាមួយមេដឹកនាំអាស៊ាន អំឡុងជំនួបកំពូលអាស៊ាន-ជប៉ុនលើក២២ នាក្រុង បាងកក ថៃ ថ្ងៃ ៤ វិច្ឆិកា ២០១៩ (Kyodo)

ដោយ: ធៀន ភារិន្ទ

ជប៉ុន សន្យាថានឹងវិនិយោគនិងកម្ចីទ្វេដង សម្រាប់សមាគមប្រជាជាតិអាស៊ីអាគ្នេយ៍ ឬអាស៊ាន ដើម្បីជំរុញឲ្យមានការអភិវឌ្ឍ និងស្ថិរភាពនៅក្នុងតំបន់។ នេះបើតាមការលើកឡើងរបស់នាយករដ្ឋមន្ត្រីជប៉ុន ស៊ិនហ្សូ អាបេ នៅក្នុងកិច្ចប្រជុំកំពូលអាស៊ាន-ជប៉ុននាថ្ងៃទី៤ ខែវិច្ឆិកា។ ក្រៅពីរឿងសេដ្ឋកិច្ច និងការអភិវឌ្ឍ ជប៉ុនក៏លើកឡើងពីអធិករណ៍នៅក្នុងសមុទ្រចិនខាងត្បូង និងបញ្ហាកូរ៉េខាងជើងផងដែរ។

នៅក្នុងជំនួបកំពូលអាស៊ាន-ជប៉ុនលើកទី២២ នាទីក្រុងបាងកក លោកនាយករដ្ឋមន្ត្រីជប៉ុនស៊ិនហ្សូ អាបេ បានសន្យាថា ជប៉ុននឹងជួយជំរុញការវិនិយោគ និងជំនួយហិរញ្ញវត្ថុឲ្យកាន់តែច្រើនជាងមុន នៅក្នុងអាស៊ាន តាមរយៈទីភ្នាក់ងារសហប្រតិបត្តិការអន្តរជាតិជប៉ុន (Jica)។ តាមរយៈភ្នាក់ងារមួយនេះ ជប៉ុននឹងអភិវឌ្ឍទៅលើវិស័យសំខាន់ៗដូចជា ការកសាងហេដ្ឋារចនាសម្ព័ន្ធ បរិស្ថាន និងការឲ្យតម្លៃស្ត្រី។ នេះបើតាមការចុះផ្សាយរបស់ទីភ្នាក់ងារព័ត៌មានជប៉ុនKyodo។

ទន្ទឹមនឹងការអភិវឌ្ឍនៅក្នុងតំបន់អាស៊ីអាគ្នេយ៍ លោកអាបេ បានសន្យាទៀតថា ភាគីជប៉ុន នឹងសម្របសម្រួលជាមួយអាស៊ាន ដើម្បីធ្វើឲ្យលេចចេញជារូបរាងឡើងលើយុទ្ធសាស្ត្រ «ឥណ្ឌូ-ប៉ាស៊ីហ្វិក» សេរី និងបើកចំហ។ ជាការពិត គំនិតផ្តួចផ្តើម «ឥណ្ឌូ-ប៉ាស៊ីហ្វិក» បង្កើតឡើង ក្នុងគោលបំណងលើកកម្ពស់ស្ថិរភាព និងវិបុលភាពនៅក្នុងតំបន់ចន្លោះទ្វីបអាស៊ី និងទ្វីបអាហ្រិ្វក ដោយអនុលោមតាមគោលការណ៍នីតិរដ្ឋនិងសេរីភាពនៃនាវាចរណ៍។

ក្រៅពីបញ្ហាខាងលើ លោកនាយករដ្ឋមន្ត្រីជប៉ុនវ័យ៦៥ឆ្នាំរូបនេះ ក៏បានលើកឡើងពីបញ្ហាអធិករណ៍នៅក្នុងសមុទ្រចិនខាងត្បូង និងបញ្ហាកូរ៉េខាងជើងផងដែរ។ ជាក់ស្តែងបញ្ហាសមុទ្រចិនខាងត្បូង លោកអាបេបានអំពាវនាវឲ្យភាគីជម្លោះទាំងអស់ បន្ធូរបន្ថយភាពតានតឹងនៅក្នុងដែនសមុទ្រជម្លោះ។ ចំណែកបញ្ហាកូរ៉េខាងជើង លោកនាយករដ្ឋមន្ត្រី បានជំរុញឲ្យប្រទេសអាស៊ានទាំងអស់ ឃ្លាំមើលការសាកល្បងមីស៊ីលទីក្រុងព្យុងយ៉ាង និងសហការជាមួយជប៉ុន ដើម្បីដោះស្រាយបញ្ហាដ៏ស្មុគស្មាញមួយនេះ។

សូមបញ្ជាក់ថា ទំហំវិនិយោគទៅវិញទៅមករវាងជប៉ុន និងអាស៊ាន គឺមានរហូតដល់២១១ពាន់លានដុល្លារនៅក្នុងឆ្នាំ២០១៧ ឬស្មើនឹងទំហំពាណិជ្ជកម្មសរុបរបស់ជប៉ុនប្រមាណជា ១៥ភាគរយ។ តួលេខនេះ បើធៀបជាមួយនឹងទំហំពាណិជ្មកម្មសរុបរបស់អាស៊ានវិញ គឺស្មើនឹង ៩ភាគរយប៉ុណ្ណោះ។ ដោយសារទំហំពាណិជ្ជកម្មមួយនេះ ធ្វើឲ្យជប៉ុនស្ថិតនៅក្រោយប្រទេសចិន អឺរ៉ុប និងអាមេរិក ដែលជាដៃគូរពាណិជ្ជកម្មរបស់អាស៊ាន៕