កីឡាការិនី ស្រួង ភាវី៖ មេដាយមាសអាស៊ីខ្លួន នឹងធ្វើឲ្យពិភពលោកស្គាល់កម្ពុជាកាន់តែច្បាស់

កីឡាជាតិ

ជាតិ

កីឡាការិនី ស្រួង ភាវី៖ មេដាយមាសអាស៊ីខ្លួន នឹងធ្វើឲ្យពិភពលោកស្គាល់កម្ពុជាកាន់តែច្បាស់

05, Nov 2019 , 3:49 pm

រូបភាព

កីឡាការិនី ស្រួង ភាវី លើកបង្ហាញមេដាយមាស ដែលដណ្តើមបានក្នុងការប្រកួតជើងឯកអាស៊ី

ដោយ:

កីឡាការិនី ស្រួង ភាវី ឈ្នះមេដាយមាសក្នុងការប្រកួតកីឡាស្នូកឃ័របីទ្រនាប់ ជ្រើសរើសជើងឯកអាស៊ី Asian Championship 3-Cushion Ladies ក្រោយយកឈ្នះកីឡាការិនីម្ចាស់ផ្ទះកូរ៉េខាងត្បូងនៅវគ្គផ្តាច់ព្រ័ត្រ។ សម្រាប់ ភាវី ជ័យជម្នះនៅលើកនេះ មិនត្រឹមតែជួយលើកកិត្តិយសនាងប៉ុណ្ណោះទេ ថែមទាំងផ្សព្វផ្សាយពីកម្ពុជាឲ្យពិភពលោកស្គាល់កាន់តែច្បាស់ទៀតផង។ ជ័យជម្នះនេះ ក៏ជួយឲ្យកីឡាការិនីមកពីខេត្តត្បូងឃ្មុំរូបនេះការពារតំណែងជើងឯកបានសម្រេចផងដែរ។

កីឡាការិនីស្នូកឃ័រឆ្នើមរបស់កម្ពុជា ស្រួង ភាវី បានបន្តសាងភាពល្បីល្បាញលើឆាកអន្តរជាតិជូនជាតិមាតុភូមិ តាមរយៈការឈ្នះមេដាយមាសក្នុងការប្រកួតជើងឯកអាស៊ី Asian Championship 3-Cushion Ladies ដែលរៀបចំនៅទីក្រុងសេអ៊ូលប្រទេសកូរ៉េខាងត្បូង កាលពីថ្ងៃទី៤ ខែវិច្ឆិកា ឆ្នាំ២០១៩។ នាការប្រកួតដែលមានកីឡាការិនីជើងខ្លាំង១៦រូបចូលរួមនោះ ភាវី ធ្វើបានយ៉ាងល្អដោយយកគូប្រកួតជាបន្តបន្ទាប់នៅវគ្គជម្រុះ និងពាក់កណ្តាលផ្តាច់ព្រ័ត្រ មុនយកឈ្នះម្ចាស់ផ្ទះកូរ៉េខាងត្បូងនៅវគ្គផ្តាច់ព្រ័ត្រ។

កីឡាការិនីមកពីខេត្តត្បូងឃ្មុំរូបនេះបាននិយាយថា ជ័យជម្នះខ្លួននៅលើកនេះ វាមានអត្ថប្រយោជន៍ណាស់សម្រាប់ខ្លួននិងសង្គមជាតិ។ ក្រៅពីជួយលើកមុខមាត់នាងឲ្យកាន់តែមានភាពល្បីល្បាញនៅលើឆាកអន្តរជាតិ មេដាយមាសនេះ នឹងក្លាយជាឧបករណ៍ផ្សព្វផ្សាយពីកម្ពុជាទៅកាន់ពិភពលោក។

តាមរយៈហ្វេសប៊ុកផ្លូវការរបស់ខ្លួនកីឡាការិនី ស្រួង ភាវី បានរៀបរាប់ថា៖«ពានរង្វាន់នេះ ពិតជាមានអត្ថប្រយោជន៍ច្រើនណាស់សម្រាប់ខ្ញុំ និងសង្គមខ្មែរទាំងមូល វាធ្វើឱ្យជាតិយើងមានកេរ្តិ៍ឈ្មោះល្បី និងប្រទេសក្នុងពិភពលោកទទួលស្គាល់ថា កម្ពុជាមានកីឡាការីនី ដែលឆ្នើមបំផុតលំដាប់ពិភពលោកមិនគួរឱ្យជឿ។ គេនឹងស្គាល់យើងទូទាំងពិភពលោកតាមរយៈពានរង្វាន់នេះ»។

នេះជាលើកទី២ហើយ ដែលនាងបានឈ្នះមេដាយមាសក្នុងព្រឹត្តិការណ៍កម្រិតអាស៊ីនេះ បន្ទាប់ពីឈ្នះលើកដំបូងនៅឆ្នាំ២០១៧។ លើសពីនេះ នាងធ្លាប់ទទួលបានជោគជ័យជាច្រើនលើករួចមកហើយ ទាំងកម្រិតអាស៊ាន អាស៊ី និងពិភពលោក។ ទោះបី ភាវី មានស្វាមីជាជនជាតិកូរ៉ និងបានផ្លាស់ពីកម្ពុជាទៅរស់នៅប្រទេសកូរ៉េខាងត្បូងអស់រយៈពេលជាង១០ឆ្នាំក៏ដោយ តែរាល់ភាពជោគជ័យនៅឆាកអន្តរជាតិ នាង តែងតែងលើកទង់ជាតិ និងតំណាងឲ្យកម្ពុជាជានិច្ច៕