អន្តរជាតិ
រដ្ឋាភិបាលហុងកុងសោកស្តាយដែលមន្ត្រីខ្លួនចូលរួមធ្វើបាតុកម្ម «ខុសច្បាប់»
លោក Matthew Cheung ប្រធានប្រតិបត្តិស្តីទីប្រចាំទីក្រុងហុងកុង (AFP)
×![]()
រដ្ឋាភិបាលហុងកុង លើកឡើងថា ខ្លួនសោកស្តាយជាខ្លាំងចំពោះការចូលរួមពីសំណាក់មន្ត្រីសាធារណៈក្នុងបាតុកម្មនៅក្រុងហុងកុង។ ពួកគេ អះអាងថា មន្ត្រីសាធារណៈ មានទំនួលខុសត្រូវបម្រើសង្គម និងគាំទ្រគោលនយោបាយរដ្ឋាភិបាល ដោយពុំមែនបំពានច្បាប់ចូលរួមបាតុកម្មឡើយ។
«ក្នុងរយៈពេលប៉ុន្មានខែចុងក្រោយនេះ មន្ត្រីសាធារណៈមួយក្តោបតូចបំផុត បានបំពានច្បាប់ ដោយចូលរួមក្នុងសកម្មភាពបាតុកម្មខុសច្បាប់»។ លោក Matthew Cheung ដែលជាប្រធានប្រតិបត្តិស្តីទីប្រចាំទីក្រុងហុងកុង លើកឡើងបែបនេះ ដោយសង្កត់ធ្ងន់ថា រដ្ឋាភិបាលសោកស្តាយជាខ្លាំងចំពោះរឿងនេះ។
សម្រាប់លោក Cheung ការងារអាទិភាពរបស់មន្ត្រីសាធារណៈ គឺបម្រើសង្គម សហគមន៍ ហើយជាពិសេសគាំទ្រគោលនយោបាយរដ្ឋាភិបាល ដែលជាក្តីរំពឹងរបស់ពលរដ្ឋហុងកុង។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters ។
ខណៈលោកស្រីប្រធានប្រតិបត្តិ ការី ឡាំ កំពុងធ្វើទស្សនកិច្ចក្នុងប្រទេសចិន លោក Matthew Cheung បានចូលកាន់តួនាទីកំពូលនេះជំនួសលោកស្រី។ មែនទែនទៅ ការលើកឡើងរបស់ប្រមុខដឹកនាំស្តីទីរបស់ហុងកុងរូបនេះ កើតឡើងក្រោយពីកាសែតរបស់បក្សកម្មុយនីស្តចិន People’ Daily តាមរយៈអត្ថបទវិចារណកថាខ្លួន សរសេររិះគន់ថា មន្ត្រីសាធារណៈហុងកុង ដែលគាំទ្រការទាមទារប្រឆាំងរដ្ឋាភិបាល នឹងត្រូវអន្តរាយជាមួយពួកកុបករ។
គួររម្លឹកផងដែរថា ក្នុងខែសីហាកន្លងទៅ មន្ត្រីសាធារណៈហុងកុងរាប់ពាន់នាក់បានប្រកាសជំហរប្រឆាំងនឹងការព្រមានរបស់រដ្ឋាភិបាលហុងកុង ដោយពួកគេសម្រេចរក្សានិន្នាការនយោបាយអព្យាក្រឹត និងចូលរួមជាមួយក្រុមអ្នកតវ៉ាហុងកុង។ ដោយឡែក លោកស្រី ការី ឡាំ បានប្រកាសក្នុងខែកញ្ញាថា លោកស្រីស្តាយក្រោយចំពោះការចាប់ខ្លួនមន្ត្រីសាធារណៈខ្លះ អំឡុងពេលបាតុកម្ម៕
Tag:
ហុងកុង
បាតុកម្ម
Matthew Cheung
© រក្សាសិទ្ធិដោយ thmeythmey.com
