អន្តរជាតិ
ម៉ាក្រុង៖ គ្មានប្រទេសណាមួយ ឈ្នះសង្គ្រាមពាណិជ្ជកម្មឡើយ លោក អេម៉ានុយអែល ម៉ាក្រុង ឡើងថ្លែងសុន្ទរកថានៅក្នងកម្មវិធី China International Import Expo នាទីក្រុងសៀងហៃនៅថ្ងៃទី៥ ខែវិច្ឆិកា ឆ្នាំ២០១៩, រូបភាព៖ South China Morning Post
× សង្គ្រាមពាណិជ្ជកម្ម មិនបានផ្តល់ផលចំណេញឲ្យភាគីណាមួយឡើយ ប៉ុន្តែវាថែមទាំងប៉ះពាល់ដល់សេដ្ឋកិច្ចពិភពលោកថែមទៀត។ នេះបើតាមការលើកឡើងលោក អេម៉ានុយអែល ម៉ាក្រុង ប្រធានាធិបតីបារាំងនៅថ្ងៃទី៥ ខែវិច្ឆិកា។ ក្រៅពីបញ្ហាសង្គ្រាមពាណិជ្ជកម្ម លោកម៉ាក្រុង ក៏បានលើកឡើងពីបញ្ហាបម្រែបម្រួលអាកាសធាតុ និងបញ្ហាផ្សេងទៀតផងដែរ។
«គ្មានប្រទេសណាមួយ ឈ្នះសង្គ្រាមពាណិជ្ជកម្មឡើយ»។ នេះជាការលើកឡើងរបស់ប្រធានាធិបតីបារាំងលោក អេម៉ានុយអែល ម៉ាក្រុង ដែលសង្ឃឹមថា អាមេរិក និងចិន អាចចុះកិច្ចព្រមព្រៀងជាមួយគ្នាក្នុងពេលឆាប់ៗនេះ ដើម្បីបន្ធូរបន្ថយភាពតានតឹងពាណិជ្ជកម្ម។
ថ្លែងនៅក្នុងកម្មវិធី China International Import Expo នាទីក្រុងសៀងហៃ លោក ម៉ាក្រុង បានសង្កត់ធ្ងន់ថា សង្គ្រាមពាណិជ្ជកម្មមួយនេះ មិនត្រឹមតែប៉ះពាល់ប្រទេសទាំងពីរប៉ុណ្ណោះទេ ប៉ុន្តែវាប៉ះពាល់ដល់សេដ្ឋកិច្ចពិភពលោកទាំងមូល។ ទំនងជាចង់និយាយឡកឡឺយដាក់អាមេរិក លោកម៉ាក្រុង បានបន្តថា ការអនុវត្តពាណិជ្ជកម្មរបស់បារាំង មិនបានផ្តល់កិច្ចការពារដល់សេដ្ឋកិច្ចពិភពលោកទេ ប៉ុន្តែអ្វីដែលសំខាន ថាតើពិភពលោកគួរបោះបង់សណ្តាប់ធ្នាប់ពាណិជ្ជកម្ម ហើយរើសយកការដំឡើងពន្ធដាក់គ្នា ឬក៏ប្រើច្បាប់ព្រៃជាមួយគ្នា។ ប៉ុន្តែបារាំង និងអឺរ៉ុប មិនរើសយកជម្រើសទាំងនេះឡើយ។ នេះបើតាមការចុះផ្សាយរបស់កាសែតហុងកុង South China Morning Post។
បន្ទាប់ពីនិយាយផ្លែផ្កាដាក់អាមេរិក លោកប្រធានាធិបតីបារាំង មិនភ្លេចឡើយនូវការអំពាវនាវឲ្យចិនបើកចំហទីផ្សារឲ្យកាន់តែធំជាងមុន សម្រាប់ឲ្យក្រុមហ៊ុនបរទេសចូលវិនិយោគ។
អស់ពីបញ្ហាពាណិជ្ជកម្ម ម៉ាក្រុង ក៏ឆ្លៀតលើកពីបញ្ហាបម្រែបម្រួលអាកាសធាតុជាមួយចិន។ តាមរយៈដំណើរទៅប្រទេសចិនលើកនេះ ម៉ាក្រុងបានសន្យាហើយថា កិច្ចសហប្រតិបត្តិការរវាងចិន និងបារាំង នឹងកាត់បន្ថយការបញ្ចេញឧស្ម័នផ្ទះកញ្ចក់ឲ្យបានកាន់តែច្រើនថែមទៀត។ បើទោះបីជាចិន និងបារាំងបានសន្យា សហការជាមួយគ្នាក៏ដោយ ប៉ុន្តែប្រធានាធិបតីបារាំងនៅតែខកចិត្តចំពោះអាមេរិក ដែលផ្តើមនីតិវិធីដកខ្លួនចេញពីកិច្ចព្រមព្រៀងបម្រែបម្រួលអាកាសធាតុទីក្រុងប៉ារីស។
ដើម្បីផ្តល់ទំនុកចិត្តដល់បារាំង ប្រធានាធិបតីចិន លោក ស៊ី ជិនភីង បានឆ្លើយតបថា អ្វីដែលចិនសន្យា ចិននឹងធ្វើ។ ចំណែកទីផ្សារវិញ ចិននឹងបើកទ្វារឲ្យកាន់តែធំ សម្រាប់បរទេសចូលមកវិនិយោគ។
សូមបញ្ជាក់ថា ក្នុងដំណើរទស្សនកិច្ចទៅប្រទេសចិនលើកនេះ ភាគីចិន និងភាគីបារាំង ត្រូវបានគេរំពឹងថា នឹងចុះហត្ថលេខាលើកិច្ចព្រមព្រៀងចំនួន៤០ ជាមួយគ្នា។ ក្នុងនោះរាប់ចាប់ពីកិច្ចព្រមព្រៀងកសិកម្ម រហូតដល់កិច្ចព្រមព្រៀងហិរញ្ញវត្ថុ៕
© រក្សាសិទ្ធិដោយ thmeythmey.com