ជាតិ
សម្ដេច ហ៊ុន សែន៖ ចរន្តទីផ្សារការងារ និងដំណើរចល័តនៃកម្លាំងពលកម្មអន្តរជាតិ ធ្វើឱ្យកើនអំពើជួញដូរមនុស្ស សម្តេច ហ៊ុន សែន ថ្លែងក្នុងពីធីបើកសន្និសីទអគ្គព្រះរាជអាជ្ញាអាស៊ាន-ចិនលើកទី១២ នៅសណ្ឋាគារសុខាសៀមរាប នាថ្ងៃទី៦វិច្ឆិកា ឆ្នាំ០១៩។
× ភ្នំពេញ៖ តាមរយៈចរន្តនៃទីផ្សារការងារ និងដំណើរចល័តនៃកម្លាំងពលកម្មអន្តរជាតិ បានធ្វើឱ្យកើននូវអំពើជួញដូរមនុស្សជាយថាហេតុ នៅក្នុងប្រទេសសមាជិកអាស៊ាន រួមទាំងបណ្ដាប្រទេសនៅក្នុងតំបន់ផងដែរ។ នេះជាការលើកឡើងរបស់ សម្តេច ហ៊ុន សែន ក្នុងពីធីបើកសន្និសីទអគ្គព្រះរាជអាជ្ញាអាស៊ាន-ចិនលើកទី១២។
ថ្លែងក្នុងសន្និសីទខាងលើក្រោមប្រធានបទ«តួនាទីព្រះរាជអាជ្ញា ក្នុងការប្រយុទ្ធប្រឆាំងអំពើជួញដូរមនុស្សក្នុងតំបន់» ដែលធ្វើឡើងសណ្ឋាគារសុខា ខេត្តសៀមរាប នាព្រឹកថ្ងៃទី៦វិច្ឆិកា សម្ដេច ហ៊ុន សែន មានប្រសាសន៍ថា ភាពជឿនលឿននៃវិទ្យាសាស្ត្រ និងបច្ចេកវិទ្យាព័ត៌មានក្នុងយុគសម័យទំនើប បានធ្វើឱ្យចរន្តសេដ្ឋកិច្ចពិភពលោកមានការវិវត្តយ៉ាងលឿន។ បើតាមសម្ដេច ហ៊ុន សែន ការរីកចម្រើនទីផ្សារការងារក្នុងពិភពលោក ក៏ដូចជានៅក្នុងប្រទេសអាស៊ាន បានជំរុញឱ្យប្រទេសសមាជិកអាស៊ាន និងប្រទេសក្នុងតំបន់ទទួលបាននូវកំណើនសេដ្ឋកិច្ច ពាណិជ្ជកម្ម និងការវិនិយោគក្នុងកម្រិតមួយគួរឱ្យកត់សម្គាល់ ។ជាពិសេសបង្កើតឱ្យមានទីផ្សារការងារយ៉ាងច្រើនសន្ធឹកសន្ធាប់។
ទន្ទឹមនឹងការរីកចម្រើន ការងារនិងសេដ្ឋកិច្ចក្នុងតំបន់នេះ ការកេងប្រវ័ញ្ចគ្រប់រូបភាព ពីស្ថានភាពស្វែងរកការងារ និងការធ្វើចំណាកស្រុកទៅក្រៅប្រទេស ធ្វើឱ្យឧក្រិដ្ឋជនឆ្លៀតឱកាសបង្កើតឱ្យមាន អំពើជួញដូរមនុស្ស ការកេងប្រវ័ញ្ចពលកម្ម ជួញដូរផ្លូវភេទ ជួញដូរទារកនិងកុមារ និងការជួញដូរ សរីរាង្គមនុស្ស។ សកម្មភាពទាំងនេះ គឺជាឧក្រិដ្ឋកម្មដ៏ធ្ងន់ធ្ងរ ចាំបាច់តម្រូវឱ្យប្រទេសសមាជិកអាស៊ាននិងចិន ផ្តោតការយកចិត្តទុកដាក់ខ្ពស់បំផុត និងត្រូវរួមគ្នាទប់ស្កាត់ឱ្យបានទាន់ពេលវេលាប្រកបដោយប្រសិទ្ធភាព និងតម្លាភាព ទាំងនៅក្នុងតំបន់ និងក្នុងពិភពលោក។ នេះជាការបញ្ជាក់របស់សម្តេច។
សម្តេច ហ៊ុន សែន បានសង្គត់ធ្ងន់ដូច្នេះថា៖« ការប្រយុទ្ធប្រឆាំង អំពើជួញដូរមនុស្ស គឺជាបញ្ហាសកលលំបាក និងស្មុគស្មាញ គឺជាបទល្មើសឆ្លងដែនខុសច្បាប់ និងជាឧក្រិដ្ឋកម្ម ដែលមានវិសាលភាពទាំងក្នុងតំបន់អាស៊ាន និងសកលលោក។ ហើយដើម្បីដោះស្រាយបញ្ហាសកលនេះឱ្យបានទាន់ពេលវេលា បណ្ដាប្រទេសសមាជិកអាស៊ាន- ចិន ត្រូវមានគោលការណ៍រួមមួយ ឯកភាពគ្នា សហការគ្នាយ៉ាងជិតស្និទ្ធ ប្រកបដោយប្រសិទ្ធភាព និងតម្លាភាព។ ក្នុងនោះ អគ្គព្រះរាជអាជ្ញាអាស៊ាន-ចិន ត្រូវរួមគ្នាធ្វើកិច្ចសហប្រតិបត្តិការឱ្យបានជិតស្និទ្ធជាមួយបណ្ដាស្ថាប័ន និងប្រទេសពាក់ព័ន្ធនឹងអំពើជួញដូរមនុស្ស។ ជាពិសេសនៅក្នុងប្រទេសឆ្លងកាត់ និងប្រទេសគោលដៅ ដើម្បីឆ្លើយតបនិងដោះស្រាយឱ្យបានទាន់ពេលកំណត់ ប្រកបដោយប្រសិទ្ធភាព និងតម្លាភាព»។
បើតាមប្រមុខរដ្ឋាភិបាល អគ្គព្រះរាជអាជ្ញាអាស៊ាន-ចិន ត្រូវរួមគ្នាពិនិត្យ និងវាយតម្លៃបញ្ហា អំពើជួញដូរមនុស្ស តាមរយៈស្មារតីទទួលខុសត្រូវខ្ពស់ ប្រកបដោយគុណភាព និងប្រសិទ្ធភាពជាមួយប្រទេស និងស្ថាប័នពាក់ព័ន្ធ ដូចមានចែងក្នុងកិច្ចព្រមព្រៀង ឬ អនុស្សរណៈនៃការយោគយល់គ្នាដែលបានចុះហត្ថលេខាកន្លងមក។
បច្ចុប្បន្នរដ្ឋាភិបាល បានចាត់វិធានការបង្ការ ទប់ស្កាត់ និងបង្ក្រាបបទល្មើសជួញដូរមនុស្សជាច្រើនករណីមកហើយ តាមរយៈការពង្រឹងច្បាប់ ,ការអនុវត្តនូវគោលនយោបាយការពារជនរងគ្រោះ អមជាមួយការអនុវត្តច្បាប់ព្រហ្មទណ្ឌ ដោយមានកិច្ចសហការល្អ រវាងគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស និងស្ថាប័នពាក់ព័ន្ធ។ នេះបើតាមការអះអាងរបស់ សម្តេច ហ៊ុន សែន៕
Tag:
ជួញដូរមនុសុ្ស
កម្លាំងពលកម្ម
© រក្សាសិទ្ធិដោយ thmeythmey.com