ជាតិ
សេដ្ឋកិច្ច
ឆ្នាំ២០២០ កម្ពុជានៅតែខ្វះអគ្គិសនីប្រើប្រាស់ ខណៈរដ្ឋាភិបាលកំពុងដំឡើងម៉ាស៊ីនភ្លើងតម្លៃជិត៤០០លានដុល្លារ
× ភ្នំពេញ៖ កម្ពុជា នៅតែបន្តខ្វះអគ្គិសនីប្រើប្រាស់នៅក្នុងឆ្នាំ២០២០។ ដើម្បីដោះស្រាយកង្វះខាតអគ្គិសនីនេះ រដ្ឋាភិបាលកំពុងរៀបចំឡើងម៉ាស៊ីនភ្លើង ចំនួន២គ្រឿង ដែលបានទិញពីប្រទេសអាល្លឺម៉ង់ និងហ្វាំងឡង់។ ការដំឡើងម៉ាស៊ីនភ្លើងទាំង២គ្រឿងនោះ គឺអស់ជិត៤០០លានដុល្លារ។
សម្តេច ហ៊ុន សែន បានសុំការអភ័យទោសទុកមុនពីពលរដ្ឋ និងពាណិជ្ជករ ចំពោះកង្វះអគ្គិសនី ដែលអាចកើតមាននាពេលខាងមុខ ព្រោះការផលិតថាមពលដោយវារីអគ្គិសនី អាចនឹងជួបបញ្ហា ដោយសារកម្រិតទឹកកាន់តែទាបទៅៗ។ ការថ្លែងដូច្នេះរបស់សម្តេចនាយករដ្ឋមន្ត្រី ធ្វើឡើងនៅក្នុងពិធីប្រកាសផ្សព្វផ្សាយឱ្យប្រើប្រាស់ជាផ្លូវការ នូវផែនការយុទ្ធសាស្ត្រអភិវឌ្ឍន៍ជាតិឆ្នាំ២០១៩-២០២៣ នៅសណ្ឋាគារសុខាភ្នំពេញ នាព្រឹកថ្ងៃទី៧វិច្ឆិកា ឆ្នាំ២០១៩។
សម្តេច មានប្រសាសន៍ដូច្នេះ៖«វារីអគ្គិសនីគឺត្រូវការទឹក។ រីឯសូឡា (solar) គឺត្រូវការពន្លឺព្រះអាទិត្យ។ ជាក់ស្តែងរបាយការណ៍ នៃការផលិតអគ្គិសនី ពីក្រសួងរ៉ែ និងថាមពល កាលពីថ្ងៃទី៦ វិច្ឆិកា ការផលិតថាមពលអគ្គិសនី ដើរដោយកម្លាំងទឹកដែលមានកម្លាំង ១,៣២៨មេហ្គាវ៉ាត់ បានធ្លាក់ចុះមកត្រឹម ១៨៤-១៨៧ មេហ្គាវ៉ាត់តែប៉ុណ្ណោះ។ ការធ្លាក់ចុះនេះ គឺមិនទាន់ដល់រដូវប្រាំងផង។ ដូច្នេះយើងអាចនឹងប្រឈមបញ្ហាក្នុងការផលិតអគ្គិសនី»។
ដើម្បីឆ្លើយតបនឹងកង្វះថាមអគ្គិសនីប្រើប្រាស់នាពេលខាងមុខនេះ កម្ពុជាបានបញ្ជាទិញថាមពលអគ្គិសនីប្រមាណ ២០០ មេហ្គាវ៉ាត់ ពីប្រទេសឡាវ។ ជាមួយគ្នានេះ រាជរដ្ឋាភិបាល នឹងពន្លឿនការដំឡើងម៉ាស៊ីនផលិតថាមពលអគ្គិសនីទាំង២គ្រឿង ដែលបានទិញពីអាល្លឺម៉ង់ និងហ្វាងឡង់។ សម្តេច ហ៊ុន សែន សង្ឃឹមថាការរៀបចំដំឡើងម៉ាស៊ីនភ្លើងទាំង២គ្រឿង ក្នុងស្រុកល្វាឯម ខេត្តកណ្តាលនោះ នឹងរួចរាល់ ក្នុងខែមេសា ឬឧសភា ឆ្នាំ២០២០។ ប្រមុខរដ្ឋាភិបាល ឲ្យដឹងទៀតថា ម៉ាស៊ីនភ្លើងទាំង២នោះ អាចផលិតកម្លាំងអគ្គិសនីបាន ៤០០ មេហ្គាវ៉ាត់ ក្នុងមួយថ្ងៃ ដើម្បីដោះស្រាយកង្វះអគ្គិសនី នៅរាជធានីភ្នំពេញ។
សូមជម្រាបថា កាលពីខែកញ្ញាឆ្នាំ២០១៩ រដ្ឋាភិបាល អនុម័តទិញអគ្គិសនីចំនួន ២,៤០០ មេហ្គាវ៉ាត់ពីឡាវ ក្នុងរយៈពេល៣០ឆ្នាំ លើទំហំទឹកប្រាក់ជិត ៥ពាន់លានដុល្លារ៕
Tag:
អគ្គិសនី
ម៉ាស៊ីនភ្លើង
© រក្សាសិទ្ធិដោយ thmeythmey.com