កីឡាអន្តរជាតិ
អន្តរជាតិ
Europa Leageu៖Solskjaer ថាទម្រង់លេងដែល Man Utd ឈ្នះ Partizan ៣-០ ជាគំរូជោគជ័យរដូវកាលនេះ
× លោក Ole Gunnar Solskjaer អ្នកចាត់ការទូទៅ Manchester United ថាក្រុមរបស់លោក បានបង្ហាញរបៀបលេងដ៏ល្អ នៅយប់ថ្ងៃ៧ ខែវិច្ឆិកា ដែលជាគំរូសម្រាប់ពួកគេគួរលេងនារដូវកាលនេះ។ Solskjaer អះអាងបែបនេះ ក្រោយបិសាចក្រហមយកឈ្នះ Partizan Belgrade ៣-០ ដើម្បីធានាបានកៅអី ទៅវគ្គ៣២ក្រុមចុងក្រោយ នៃពានរង្វាន់ UEFA Europa League។
គ្រាប់បាល់ស៊ុតបញ្ចូលទីក្នុងតង់ទីមួយ ពីខ្សែប្រយុទ្ធ Mason Greenwood និង Anthony Martial រួមទាំងមួយគ្រាប់របស់ Marcus Rashford នៅដើមតង់ទី២ បានក្លាយជាជ័យជម្នះក្នុងផ្ទះដ៏ធំបំផុត របស់ Man United ចាប់តាំងពីខែសីហាមក។ លទ្ធផល ៣-០ លើក្រុម Partizan នេះដែរ លោក Solskjaer បានរៀបរាប់ពីទម្រង់លេងរបស់កូនក្រុម នៅតំបន់ប្រយុទ្ធថា«ពិតជាមុតស្រួច»។
ជ័យជម្នះនេះ នាំឲ្យក្រុម Man Utd នៅរក្សាតំណែងកំពូលតារាងពូល L ដោយទទួលបានពិន្ទុសរុប ១០ពិន្ទុ នាំមុខ AZ Alkmaar ពីរពិន្ទុ លើស Partizan Beograd ចំនួន៦ពិន្ទុ។ ដូច្នេះក្រុមលីគកំពូលអង់គ្លេសមួយនេះ ត្រូវការត្រឹមស្មើប៉ុណ្ណោះពេលប៉ះ AZ Alkmaar សម្រាប់ជំនួបលើកទី៥ នៅថ្ងៃទី១២ ខែធ្នូ ដើម្បីទទួលបានកៅអីទៅវគ្គ៣២ក្រុម។
«ច្រើនប្រកួតមកហើយ ដែលយើងឈ្នះត្រឹម ១-០ ប៉ុន្តែជំនួបនេះ កីឡាកររបស់យើងធ្វើបានល្អ ដែលផ្តល់ឲ្យពួកគេ បានឃើញពីរបៀបលេងដ៏មុតស្រួចផងដែរ»។ នេះជាសម្តីលោក Solskjaer ទៅកាន់កូនក្រុមលោក ដោយបន្ថែមថា បើទោះការប្រជែងនេះមិនដូចនៅ Premier League មែន ប៉ុន្តែទម្រង់លេងបែបនេះ នៅតែជាអ្វីដែលក្រុមចង់បាន។
សម្រាប់លទ្ធផលរបស់ក្រុមពីអង់គេ្លសពីរទៀត Wolverhampton Wanderers ក៏ទទួលបានជ័យជម្នះ លើក្រុម Slovan Bratislava ១-០ ហើយ Arsenal ស្មើជាមួយ Vitoria de Guimaraes ១-១។
ជ័យជម្នះ ១-០ នាំឲ្យ Wolves ទទួលបានចំណាត់ថ្នាក់ទី២ ពូល K មាន៩ពិន្ទុ តាមពីក្រោយក្រុមកំពូលតារាង SC Braga ចំនួន១ពិន្ទុ តែនាំមុខ Bratislava ដែលឈរលេខ៣ ចំនួន៥ពិន្ទុ ខណៈ Besiktas នៅបាតតារាង។ ដូច្នេះ Wolves និង Braga មានលទ្ធភាពខ្ពស់ ដើម្បីបន្តទៅវគ្គ៣២ក្រុម ខណៈការប្រកួតសល់ ២លើកទៀត។
ដោយឡែក Arsenal ឯណោះវិញ បើទោះបានត្រឹមស្មើជាមួយ Guimaraes ប៉ុន្តែក្រុមរហស្សនាមកាំភ្លើងធំមានភាគរយច្រើន ដើម្បីឆ្លងទៅកាន់វគ្គ ៣២ក្រុមចុងក្រោយ។ ឆ្លងកាត់ការប្រកួត៤លើក Arsenal នៅរក្សាចំណាត់ថ្នាក់កំពូលតារាងពូល F មាន១០ពិន្ទុ នាំមុខក្រុមលេខ២ Standard Liege ចំនួន៤ពិន្ទុ។ Eintracht Frankfurt មាន៦ពិន្ទុ ស្មើ Standard Liege ខណៈ Guimaraes នៅបាតតារាងមាន១ពិន្ទុ៕
Tag:
UEFA Europa League
Manchester United
Ole Gunnar Solskjaer
© រក្សាសិទ្ធិដោយ thmeythmey.com