ជាតិ
សង្គមជាតិ
ធុងសំរាម និងកញ្ឆេ ជាង២,៧០០ ត្រូវបានដាក់ពង្រាយនៅបរិវេណរៀបចំបុណ្យអុំទូក សកម្មភាពការពង្រាយធុងសំរាមនៅតាមគោលដៅដែលប្រារព្ធពិធីបុណ្យអុំទូកនាថ្ងៃទី៩ ខែវិច្ឆិកា រូបភាពពីមន្ទីរសាធារការ និងដឹកជញ្ជូនរាជធានីភ្នំពេញ
× ភ្នំពេញ៖ធុងសំរាមចំនួន ១,៥៥៦ធុង និងកញ្ឆេ ចំនួន ១,២០០ ត្រូវបានសាលារាជធានីភ្នំពេញ សហការជាមួយក្រុមហ៊ុន ស៊ីនទ្រី ដាក់ពង្រាយនៅតាមគោលដៅសំខាន់នានា ក្នុងពិធីបុណ្យអុំទូក។ ចាប់ពីថ្ងៃទី១០-១២ វិច្ឆិកានេះ ក្រុមហ៊ុនស៊ីនទ្រី ក៏បានត្រៀមឡានដឹកសំរាម និងកម្មករប្រមូលសំរាមចំនួន ៥១២នាក់ ផងដែរ។
លោក អ៊ិត ចាន់ដា ប្រធានការិយាល័យអតិថិជន និងសំអាតក្រុងរបស់ក្រុមហ៊ុនស៊ិនទ្រី បានប្រាប់សារព័ត៌មានថ្មីៗថា កញ្ឆេទាំង១២០០ ដែលត្រូវបានដាក់ពង្រាយនោះ មាន២ទំហំ ដោយទំហំមួយ អាចផ្ទុកសំរាមចំនួន២០០ ទៅ៣០០គីឡូក្រាម និងទំហំមួយទៀត អាចផ្ទុកសំរាមបាន ២០ ទៅ៣០គីឡូក្រាម។
ក្រៅពីដាក់ពង្រាយធុង និងកញ្ឆេដាក់សំរាម ស៊ីនទ្រី ក៏ត្រៀមអ្នកបោសសំអាតសំរាមចំនួន៥១២ នាក់ ដើម្បីសំអាត និងប្រមូលសំរាម នៅក្នុងអំឡុងប្រារព្ធពិធីបុណ្យអុំទូកនេះដែរ។ នេះបើតាមលោក អ៊ិត ចាន់ដា ដោយលោកបន្តថា ការសំអាត និងប្រមូលសំរាម នឹងចែកជា ២វេន។ វេនទី១ សំអាតចាប់ពីម៉ោង១យប់ ដល់ម៉ោង៤រសៀល និងវេនទី២ ចាប់ពីម៉ោង៥ល្ងាច ដល់ម៉ោង១២យប់។
ទោះជាមានធុងសំរាម និងកញ្ឆេច្រើនជាង ២,៥០០ ត្រូវបានដាក់ពង្រាយយ៉ាងនេះក្តី ប៉ុន្តែរដ្ឋបាលរាជធានីភ្នំពេញ នៅតែអំពាវនាវឲ្យប្រជាពលរដ្ឋដែលចូលកម្សាន្តក្នុងពិធីបុណ្យអុំទូកនេះ ទុកដាក់សំរាមឲ្យបានត្រឹមត្រូវ កុំបោះចោលសំរាមពាលវាលពាសកាល ដែលនាំឲ្យខូចសណ្តាប់ធ្នាប់ និងសោភណភាពរាជធានី។
លោក ម៉េត មាសភក្តី អ្នកនាំពាក្យរដ្ឋបាលក្រុងរាជធានីភ្នំពេញ បានប្រាប់ដល់អ្នកសារព័ត៌មានថ្មីៗតាមទូរសព្ទថា៖«ដើម្បីសោភ័ណភាព,ផាសុកភាព និងដើម្បីកិត្តិយសប្រទេស គឺត្រូវតែមានការចូលរួមពីប្រជាពលរដ្ឋ។ ពេលយើងមើលឃើញពីស្រុកគេស្អាត ចេះតែចង់បាន និងសរសើរ។ យើងមិនមែនថាមិនអាចធ្វើបានដូចគ្នាណា យើងក៏អាចធ្វើបានដែរ។ វាអត់មានអីពិបាកទេ សំខាន់យើងឲ្យតម្លៃប្រទេសជាតិយើងអត់។ វាអត់ពិបាកធ្វើទេ គឺចោលតែសំរាមក្នុងធុងឲ្យបានត្រឹមត្រូវទៅ ដើម្បីឲ្យពលរដ្ឋយើងមានភាពថ្លៃថ្នូរ និងប្រទេសជាតិមានកិត្តិនាម»។
ក្រៅពីបុគ្គលិកក្រុមហ៊ុន ស៊ីនទ្រី ដែលមានតួនាទី សំអាតនិងប្រមូលសំរាម ក្នុងអំឡុងបុណ្យអុំទូកនេះ ក៏នឹងមានយុវជនពីក្រសួងបរិស្ថាន ក្រុមយុវជនសុឆន្ទៈ និងយុវជនដទៃទៀត សរុបប្រមាណ ១ពាន់នាក់ នឹងប្រមូលផ្តុំគ្នារើសសំរាម នៅតាមបរិវេណនៃការប្រារព្ធពិធីអុំទូករយៈពេល៣ថ្ងៃនេះដែរ។
សូមជម្រាបថា ក្នុងឆ្នាំកន្លងទៅ មានសំរាមប្រមាណ ពី៧០ ទៅ៨០តោនក្នុងមួយថ្ងៃ ត្រូវបានប្រមូលចេញពីបរិវេណរៀបចំពិធីបុណ្យអុំទូក។ នេះបើតាមលោក អ៊ិត ចាន់ដា ប្រធានការិយាល័យអតិថិជន និងសំអាតក្រុងរបស់ក្រុមហ៊ុនស៊ិនទ្រី៕
Tag:
ស៊ីនទ្រី
កញ្ឆេ
អុំទូក
សំរាម
អ៊ិត ចាន់ដា
© រក្សាសិទ្ធិដោយ thmeythmey.com