បុណ្យអុំទូកឆ្នាំនេះ មានទូកចំនួន២៩៧ទូក មកពី១៩ខេត្តក្រុង ចូលរួមប្រណាំង

ជាតិ

បុណ្យអុំទូក

សង្គមជាតិ

បុណ្យអុំទូកឆ្នាំនេះ មានទូកចំនួន២៩៧ទូក មកពី១៩ខេត្តក្រុង ចូលរួមប្រណាំង

10, Nov 2019 , 8:59 am

រូបភាព

ដោយ:

ភ្នំពេញ៖ ទូក«ង»ចំនួន២៩៧ទូក ដែលមានចំណុះទូកសរុបជិត២ម៉ឺននាក់ នឹងចូលរួមប្រកួតគ្នា ក្នុងព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នៅថ្ងៃទី១០-១២ ខែវិច្ឆិកានេះ នៅទន្លេចតុម្មុខ រាជធានីភ្នំពេញ។ ចំនួនទូកចូលរួមប្រកួតឆ្នាំ២០១៩នេះ កើនឡើងតែចំនួន២ទូកប៉ុណ្ណោះ បើធៀបនឹងឆ្នាំ២០១៨។

លោក ប៊ូ ជុំសេរី គណៈកម្មាការបច្ចេកទេសរៀបចំបុណ្យជាតិ បានបញ្ជាក់ប្រាប់សារព័ត៌មានថ្មីៗថា ក្នុងចំណោមទូកចំនួន២៩៧ ដែលនឹងប្រកួតគ្នារយៈពេល៣ថ្ងៃ ក្នុងពិធីបុណ្យអុំទូកនេះ មានទូកអុំផ្នែកបុរសចំនួន១៦៧ទូក , ទូកអុំនារីមាន១ទូក ទូកចែវបុរសមាន៣០ទូក ទូកចែវនារីចំនួន២ទូក និងទូកអន្តរជាតិចំនួន ៩៥ ក្នុងនោះមានទូកនារីចំនួន២ទូក។

នៅឆ្នាំនេះ មានកីឡាករសរុបជិត២ម៉ឺននាក់ ក្នុងនោះនារីមានចំនួន ១៨៤នាក់។ ជាមួយគ្នានេះ ក៏មានកីឡាករត្រៀមចំនួន៣,៤៧០នាក់ផងដែរ ក្នុងនោះមានកីឡាករនារី ចំនួន៨៩នាក់។ នេះបើតាមលោក ប៊ូ ជុំសេរី ដែលបន្តឲ្យដឹងថា កីឡាករទាំងនោះ មកពី១៩ខេត្តក្រុង និងមកពីស្ថាប័នរដ្ឋាភិបាលមួយចំនួន ដូចជា ទីស្តីការគណៈរដ្ឋមន្ត្រី ក្រសួងការពារជាតិ,ក្រសួងមហាផ្ទៃ,កងកម្លាំងរាជអាវុធហត្ថ,ប៉ូលិសបេអ៊ឹម, កងទ័ពជើងទឹក,និងវត្តព្រែកប្រាំង។

បើតាមលោក ប៊ូ ជុំសេរី ចំពោះកីឡាករដែលចូលរួមអុំទូករយៈពេល៣ថ្ងៃនេះ ក្នុងម្នាក់ៗទទួលបានថវិកាឧត្ថម្ភចំនួន៣ម៉ឺនរៀល សម្រាប់ថ្លៃស្នាក់នៅ និងហូបចុក។ ចំពោះទូកដែលទទួលបានជ័យលាភីលេខ១ នឹងទទួលបានថវិកាចំនួន ៣៥ម៉ឺនរៀល, លេខ២ ទទួលបានថវិកា៣០ម៉ឺនរៀល និងលេខ៣ នឹងទទួលបានថវិកាចំនួន ២៥ម៉ឺនរៀល។

រង្វង់មូលគល់ស្ពានជ្រោយចង្វារខាងកើត គឺជាកន្លែងស្នាក់នៅរបស់កីឡាករអុំទូក ហើយគណៈកម្មាការបច្ចេកទេសរៀបចំបុណ្យជាតិ ក៏បានត្រៀមរួចជាស្រេច ដោយដាក់ពង្រាយគ្រូពេទ្យ សម្រាប់សង្គ្រោះកីឡាករ និងពលរដ្ឋទូទៅ។ លោក ប៊ូ ជុំសេរី បញ្ជាក់ដូច្នេះ។

សូមរម្លឹកថា នៅពិធីបុណ្យអុំទូក អកអំបុក សំពះព្រះខែ និងបណ្តែតប្រទីបកាលពីឆ្នាំ២០១៨ មានទូកចំនួន២៩៥ទូក និងមានកីឡាករចំនួន ១៩,០១៧នាក់៕