មូលហេតុសំខាន់ៗដែលត្រូវឧស្សាហ៍ញ៉ាំ “ផ្លែមង្ឃុត”

ពីនេះ ពីនោះ

ព័ត៍មានសុខភាព

មូលហេតុសំខាន់ៗដែលត្រូវឧស្សាហ៍ញ៉ាំ “ផ្លែមង្ឃុត”

11, Nov 2019 , 6:59 am

រូបភាព

ដោយ: ថ្មីៗ

មង្ឃុតជាផ្លែឈើត្រូពិចមួយប្រភេទដែលមានរសជាតិជូរអែម និងសម្បូរណាស់ដែរក្នុងប្រទេសកម្ពុជា។ ទោះបីជាចូលចិត្ត ឬឧស្សាហ៍ទទួលទានយ៉ាងណាក៏ដោយ ក៏ភាគច្រើននៃពួកយើងប្រហែលជាមិនធ្លាប់ចាប់អារម្មណ៍ដឹងទេថាផ្លែឈើនេះមានប្រសិទ្ធភាពប្រយុទ្ធប្រឆាំងទប់ស្កាត់បញ្ហាសុខភាពផ្សេងៗបានយ៉ាងប្រសើរ។

ថ្ងៃនេះយើង នឹងបង្ហាញឱ្យដឹងពីឥទ្ធិពលដ៏ប្រសើរនៃការទទួលទានផ្លែមង្ឃុត ៖

១. លក្ខណៈសម្បត្តិប្រឆាំងការរលាកក្នុងរាងកាយ

ផ្លែមង្ឃុតមានផ្ទុកនូវសារធាតុប្រឆាំងការរលាក និងប្រតិកម្មអាឡែកស៊ីផងដែរ។ លើសពីនេះទៅទៀត មង្ឃុត ក៏ជួយរារាំងការបញ្ចេញនូវសារធាតុ prostaglandin និង histamine ដែលសារធាតុទាំងពីរនេះមានទំនាក់ទំនងផ្សារភ្ជាប់នឹងការរលាកផ្សេងៗក្នុងរាងកាយ។

២. សុខភាពខួរក្បាល

ផ្លែមង្ឃុតក៏ជាប្រភពដ៏ប្រសើរនៃជាតិ folate ប៉ូតាស្យូម និងសារធាតុប្រឆាំងអុកស៊ីតកម្មចាំបាច់មួយចំនួនទៀតដែលល្អសម្រាប់សុខភាពខួរក្បាល និងប្រព័ន្ធប្រសាទ។ ជាតិ folate ជួយក្នុងការកាត់បន្ថយបញ្ហាខ្សោយខួរក្បាល រួមទាំងហានិភ័យនៃជំងឺភ្លេចភ្លាំង។ រីឯជាតិប៉ូតាស្យូមវិញមានប្រសិទ្ធភាពជួយបង្កើនលំហូរឈាមទៅកាន់ខួរក្បាល, ជំរុញការផ្ដោតអារម្មណ៍ ឬការគិតកាន់តែប្រសើរ និងថែមទាំងបង្កើនភាពសកម្មនៃសរសៃប្រសាទផងដែរ។

៣. បង្កើនថាមពលបន្ថែម

មង្ឃុតមានផ្ទុកបរិមាណកាបូអ៊ីដ្រាតខ្ពស់ដែលជួយផ្ដល់ឱ្យរាងកាយនូវថាមពលបន្ថែមភ្លាមៗ។ វាក៏ជាប្រភពដ៏ល្អនៃសារធាតុ riboflavin ដែលជួយបង្កើនការដុតរំលាយជាតិខ្លាញ់ កាបូអ៊ីដ្រាត និងប្រូតេអ៊ីនដែលបង្កើនកម្រិតនៃថាមពលផងដែរ។

៤. គ្រប់គ្រងសម្ពាធឈាម

មង្ឃុតមានផ្ទុកសម្បូរទៅដោយជាតិរ៉ែសំខាន់ៗដូចជាប៉ូតាស្យូម ម៉ង់កាណែស ម៉ាញ៉េស្យូម និងជាតិទង់ដែង ដែលសុទ្ធសឹងតែជាសារធាតុចាំបាច់ជួយគ្រប់គ្រងជាតិរាវក្នុងរាងកាយ សម្ពាធឈាម ក៏ដូចជាអត្រានៃចង្វាក់បេះដូងផងដែរ។ លើសពីនេះទៅទៀត ប៉ូតាស្យូមជួយគ្រប់គ្រងភាពប្រក្រតីនៃសម្ពាធឈាមទប់ស្កាត់ជំងឺសរសៃឈាមបេះដូងនិងជំងឺដាច់សរសៃឈាមខួរក្បាល។

៥. ពង្រឹងសុខភាពបេះដូង

ការទទួលទានផ្លែមង្ឃុតអាចជួយកាត់បន្ថយហានិភ័យនៃបញ្ហាគាំងបេះដូងគួរឱ្យកត់សម្គាល់តាមរយៈការរក្សាអត្រាចង្វាក់បេះដូងប្រក្រតី។ ការទទួលទានផ្លែមង្ឃុតក៏ជួយកាត់បន្ថយកម្រិតនៃកូឡេស្តេរ៉ូលមិនល្អក្នុងរាងកាយដែលនេះជួយទប់ស្កាត់ជំងឺបេះដូងបានយ៉ាងប្រសើរផងដែរ។

៦. កាត់បន្ថយហានិភ័យនៃជំងឺទឹកនោមផ្អែម

មង្ឃុត គឺជាជម្រើសនៃផ្លែឈើដ៏ប្រសើរមួយសម្រាប់អ្នកជំងឺទឹកនោមផ្អែម ដោយសារវាមានប្រសិទ្ធភាពគ្រប់គ្រង និងរក្សាភាពប្រក្រតីនៃកម្រិតជាតិស្ករក្នុងឈាម។ លើសពីនេះទៅទៀត ផ្លែមង្ឃុត សម្បូរទៅដោយសារធាតុប្រឆាំងអុកស៊ីតកម្មជួយគ្រប់គ្រងការបំប្លែងសារជាតិគ្លុយកូស ឬជាតិស្ករក្នុងឈាម ហើយថែមទាំងកម្រិតភាពប្រក្រតីនៃអាំងស៊ុយលីនក្នុងរាងកាយផងដែរ។

៧. ទប់ស្កាត់ជំងឺមហារីក

មង្ឃុតជាប្រភពនៃសារធាតុប្រឆាំងអុកស៊ីតកម្មដ៏មានឥទ្ធិពលមួយហៅថា xanthones ។ សារធាតុប្រឆាំងអុកស៊ីតកម្មនេះមានសមត្ថភាពខ្ពស់ក្នុងការស្រូបយក ក៏ដូចជាកម្ចាត់នូវរ៉ាឌីកាល់សេរីដែលបំផ្លាញកោសិកាផ្សេងៗក្នុងរាងកាយ ហើយជំនួសមកវិញដោយការជួសជុលរាល់កោសិកាដែលខូចខាត។ មង្ឃុត ក៏មានផ្ទុកនូវវីតាមីន C ដែលជាសារធាតុប្រឆាំងអុកស៊ីតកម្មមួយផ្សេងទៀតដែលជួយការពាររាងកាយពីរ៉ាឌីកាល់សេរី។ ការរួមគ្នានៃវីតាមីន C និង xanthone ធ្វើអោយមង្ឃុតក្លាយជាផ្លែឈើប្រសើរបំផុតមួយជួយទប់ស្កាត់កាត់បន្ថយហានិភ័យនៃជំងឺមហារីក។

៨. សុខភាពប្រព័ន្ធរំលាយអាហារ

បរិមាណនៃជាតិសរសៃក្នុងផ្លែមង្ឃុតធ្វើអោយវាក្លាយជាជម្រើសនៃផ្លែឈើដ៏ប្រសើរសម្រាប់សុខភាពប្រព័ន្ធរំលាយអាហារជួយទប់ស្កាត់ជំងឺមហារីកពោះវៀនធំ បញ្ហាទល់លាមកដោយសម្រួលចលនាពោះវៀន។

៩. ជួយឱ្យស្រកទម្ងន់

មង្ឃុតជាផ្លែឈើដែលមានផ្ទុកកាឡូរីទាប ប៉ុន្តែជាតិសរសៃខ្ពស់ដែលល្អសម្រាប់អ្នកចង់ស្រកទម្ងន់។

១០. សុខភាពស្បែក

មង្ឃុតមានផ្ទុកលក្ខណៈសម្បត្តិប្រឆាំងមេរោគបាក់តេរី និងការរលាក។ ការទទួលទានផ្លែមង្ឃុតជួយរក្សាសំណើមនៃស្បែកនិងទប់ស្កាត់បញ្ហាស្បែកផ្សេងៗ៕

ត្រួតពិនិត្យដោយ www.health.com.kh