ជាតិ
នយោបាយជាតិ
សម្ដេច ហ៊ុន សែន ប្រាប់ឱ្យអ្នករៀបចំកម្មវិធីទាំងអស់ ត្រូវរៀបអាសនៈសង្ឃទាំងពីរគណៈឱ្យបានត្រឹមត្រូវ
× ភ្នំពេញ៖ ការរៀបចំកៅអីអាសនរបស់ព្រះសង្ឃ នៅតែមិនទាន់ត្រឹមត្រូវ ក្នុងកម្មវិធីមួយចំនួន។ សម្ដេច ហ៊ុន សែន លើកឡើងបែបនេះ ដោយសារតែសម្ដេចមើលឃើញផ្ទាល់ពីបញ្ហារៀបចំអាសនៈសង្ឃ នៅក្នុងកម្មវិធីសម្ពោធរោងចក្រផលិតស៊ីម៉ង់តិ៍ «ថៃ ប៊ុនរ៉ុង» នាព្រឹកថ្ងៃទី១៤ វិច្ឆិកា។
នៅក្នុងកម្មវិធីសម្ពោធរោងចក្រនេះ សម្ដេច ហ៊ុន សែន មើលឃើញកំហុសអ្នករៀបចំកម្មវិធី ដែលបានរៀបអាសនឱ្យព្រះសង្ឃគណៈមហានិកាយ គង់នៅខាងមុខ ហើយព្រះសង្ឃគណៈធម្មយុត្តិកនិកាយ គង់នៅខាងក្រោយ។ សម្រាប់សម្ដេច ហ៊ុន សែន ការរៀបចំបែបនេះ វាមិនត្រឹមត្រូវតាមក្បួនឡើយ។ បើតាមសម្ដេច គណៈសង្ឃទាំងពីរ គឺត្រូវរៀបចំកៅអីអាសនស្មើគ្នា ពោលគឺគ្មានការបែងចែកឡើយ។
ក្នុងន័យនេះប្រមុខរដ្ឋាភិបាលកម្ពុជា បកស្រាយដោយយោងតាមរដ្ឋធម្មនុញ្ញកម្ពុជា ត្រង់មាត្រា១៣ថ្មី ស្តីអំពីព្រះមហាក្សត្រ ដែលចែងពីសមាសភាពនៃក្រុមប្រឹក្សារាជសម្បត្តិ ដោយក្នុងនោះ រួមមានប្រធានព្រឹទ្ធសភា និងអនុប្រធានពីររូប, ប្រធានរដ្ឋសភា និងអនុប្រធានពីររូប, នាយករដ្ឋមន្ត្រី និងសម្ដេចព្រះសង្ឃរាជ្យ គណៈមហានិកាយ និងគណៈធម្មយុត្តិកនិកាយ។
នាយករដ្ឋមន្ត្រីកម្ពុជា បានអត្ថាធិប្បាយយ៉ាងដូច្នេះថា៖ «ន័យត្រង់នេះ(មាត្រា១៣ថ្មី) គ្រប់គ្រាន់ឱ្យបានដឹងថា អាសនក្រមគឺនៅស្មើគ្នា ដូច្នេះគ្រប់ទីកន្លែងទាំងអស់បើនិមន្តតែមហានិកាយ គឺដាក់មហានិកាយនៅខាងមុខចុះ។ ប៉ុន្តែបើនិមន្តទាំងពីរអង្គ(គណៈមហានិកាយ និងគណៈធម្មយុត្តិកនិកាយ) មកហើយ ត្រូវរៀបចំឱ្យស្មើគ្នា កៅអីឱ្យស្មើគ្នា»។
បើតាមសម្ដេច ហ៊ុន សែន រដ្ឋធម្មនុញ្ញកម្ពុជា មិនបានចែងថា ព្រះសង្ឃទាំងពីរគណៈ មានសិទ្ធិស្មើគ្នាទេ ប៉ុន្តែគេមើលទៅលើសមាសភាពនៃក្រុមប្រឹក្សារាជសម្បត្តិ។ «អ៊ីចឹងទេ បានសេចក្តីថា ព្រះសង្ឃរាជទាំងពីរគណៈ យាងចូលរួម គឺត្រូវនៅកៅអីស្មើគ្នា»។ នេះជាការអះអាងរបស់នាយករដ្ឋមន្ត្រីកម្ពុជា ដែលបានបន្ថែមថា ព្រះមេគុណ និងអនុគុណ ក៏ត្រូវរៀបចំកៅអីស្មើគ្នា រួមទាំងព្រះចៅអធិការវត្តផងដែរ៕
Tag:
ហ៊ុន សែន
ពុទ្ធសាសនា
នយោបាយ
© រក្សាសិទ្ធិដោយ thmeythmey.com