អន្តរជាតិ
សភាថៃ កោះហៅលោក ប្រាយុទ្ធ ទៅបំភ្លឺរឿងធ្វើសច្ចាប្រណិធានមិនពេញលេញ លោកប្រាយុទ្ធ ចន្ទអូចា នាយករដ្ឋមន្ត្រីថៃ (AFP)
× គណៈកម្មធិការអចិន្ត្រៃយ៍នៃរដ្ឋសភាថៃ បានបញ្ជាក់ថា លោកនាយករដ្ឋមន្ត្រីថៃ ប្រាយុទ្ធ ចន្ទអូចា ត្រូវតែទៅផ្តល់សក្ខីកម្មដោយផ្ទាល់នៅចំពោះមុខគណៈកម្មាធិការសភា ជុំវិញរឿងការធ្វើសច្ចាប្រណិធានមិនបានពេញលេញ។ លោកឧបនាយករដ្ឋមន្ត្រីថៃ ប្រាវីត វង្សសុវណ្ណ ក៏ត្រូវបានសភាកោះហៅផងដែរក្នុងសំណុំរឿងនេះ។
តាមការចុះផ្សាយរបស់កាសែត បាងកកប៉ុស្តិ៍ លោក Sereepisuth Temeeyaves ដែលមានតួនាទីជាប្រធានគណៈកម្មាធិការសភាថៃនេះ នៅថ្ងៃពុធទី១៣ វិច្ឆិកា បានបញ្ជាក់ឲ្យដឹងថា គណៈកម្មធិការ បានបោះឆ្នោតអនុម័តសេចក្តីសម្រេចនេះក្នុងសំឡេង៦ទល់នឹង៣។
ការសម្រេចចិត្តរបស់សភាថៃបែបនេះ ធ្វើឡើងក្រោយពីលោក Sereepisuth ដែលជាមេដឹកនាំគណបក្សសេរីនិយមថៃ បានបដិសេធក្នុងការអនុញ្ញាតឲ្យអ្នកតំណាងរបស់លោក ប្រាយុទ្ធ ចន្ទអូចា និងលោក ប្រាវីត វង្សសុវណ្ណ បង្ហាញនូវការបំភ្លឺជាលាយលក្ខណ៍អក្សរ។ ត្រង់នេះ លោកសង្កត់ធ្ងន់ថា អ្នកនយោបាយទាំងពីរនេះ នឹងតម្រូវឲ្យទៅឆ្លើយបំភ្លឺដោយផ្ទាល់នៅមុខគណៈកម្មាធិការសភា នាថ្ងៃពុធ ២០ វិច្ឆិកាខាងមុខ។
«គ្មាននរណាម្នាក់ ត្រូវអនុញ្ញាតតាមច្បាប់ឲ្យផ្តល់សក្ខីកម្ម ដោយមានអ្នកទៅឆ្លើយជំនួសពួកគេឡើយ»។ លោកប្រធានគណៈកម្មធិការអចិន្ត្រៃយ៍នៃរដ្ឋសភាថៃទទួលបន្ទុកអំពើពុករលួយរូបនេះ បញ្ជាក់បែបនេះ ក្រោយពីអនុរដ្ឋមន្ត្រីការពារជាតិ ត្រូវបានតែងតាំងឲ្យជំនួសលោ កប្រាយុទ្ធ ខណៈលោកប្រាវីតបានចាត់ឲ្យជំនួយការផ្ទាល់ខ្លួនទៅឆ្លើយជំនួស។
ឆ្លើយនឹងសំណួរអ្នកកាសែតពាក់ព័ន្ធនឹងការគំរាមរបស់គណៈកម្មាធិការសភាថៃក្នុងការចាត់វិធានការផ្លូវច្បាប់ប្រឆាំងលោក និងលោកប្រាវីត ប្រសិនបើលោកមិនបង្ហាញខ្លួនទៅតាមការកោះហៅទេនោះ លោក ប្រាយុទ្ធ អះអាងថា គណៈកម្មាធិការ មានសេរីភាពក្នុងការធ្វើបែបនេះ។ ហើយលោក មិនច្បាស់ទេថា លោកនឹងមានពេលទំនេរទៅបំភ្លឺនាថ្ងៃពុធសប្តាហ៍ក្រោយនេះ។
សូមបញ្ជាក់ថា អំឡុងពិធីចូលកាន់តំណែងជានាយករដ្ឋមន្ត្រី កាលពីខែកក្កដា កន្លងទៅ លោកប្រាយុទ្ធ ត្រូវបានគេចោទប្រកាន់ថា ធ្វើសច្ចាប្រណិធានមិនបានពេញលេញ។ នោះគឺដោយសារតែលោកពុំបាននិយាយឃ្លាចុងក្រោយនៃមាត្រា ១៦១ នៃរដ្ឋធម្មនុញថៃ ដែលតម្រូវឲ្យអ្នកធ្វើសច្ចាប្រណិធានគោរពនិងប្រកាន់ខ្ជាប់នូវរដ្ឋធម្មនុញ។ ការណ៍នេះហើយ បង្កជាសំណួរជាច្រើនពាក់ព័ន្ធនឹងភាពត្រឹមត្រូវតាមច្បាប់នៃភាពជានាយករដ្ឋមន្ត្រីរបស់លោក៕
Tag:
ថៃ
សភា
ប្រាយុទ្ធចន្ទអូចា
© រក្សាសិទ្ធិដោយ thmeythmey.com