ជាតិ
អចលនទ្រព្យ
អត្ថបទពាណិជ្ជកម្ម
×![]()
ដោយ: ថ្មីៗ
លំនៅដ្ឋាននៅក្នុងប្រទេសកម្ពុជា បានបន្តកើនឡើងយ៉ាងខ្លាំង ដើម្បីបំពេញតម្រូវការរបស់ប្រជាពលរដ្ឋ ដែលបានកើនឡើងយ៉ាងខ្លាំង នៅក្នុងទីក្រុងសំខាន់ៗ។ ផ្ទះនៅក្នុងបុរី គឺជាប្រភេទលំនៅដ្ឋានមានការពេញនិយមបំផុត និងមានតំលៃសមរម្យ សមទៅនឹងលក្ខខណ្ឌនៃជីវភាពរស់នៅរបស់ប្រជាជនកម្ពុជា ដែលមានជីវភាពមធ្យម និងលើមធ្យម។ ក្នុងនោះដែរ លំនៅដ្ឋានប្រមាណ ១០,០០០ខ្នង បានគេរំពឹងថា នឹងត្រូវផ្គត់ផ្គង់ទៅឱ្យអ្នកទិញជារៀងរាល់ឆ្នាំ។ ខណៈដែលតម្រូវការនៅតែមានច្រើន គម្រោងអភិវឌ្ឍន៍ថ្មីៗកំពុងរីកលូតលាស់យ៉ាងឆាប់រហ័ស។
ដូច្នេះមុនពេលទិញផ្ទះក្នុងបុរីមួយនៅក្នុងប្រទេសកម្ពុជា ចំណុចសំខាន់ អ្នកត្រូវស្វែងយល់ពីគន្លឹះមួយចំនួន មិនថាអ្នកទិញនៅក្នុងរយៈ ពេលខ្លី ឬរយៈពេលវែង សម្រាប់រស់នៅ ឬការវិនិយោគនោះទេ។
តើបុរីមានផ្ទះប្រភេទអ្វីខ្លះ និងមានសេវាកម្មអ្វីខ្លះ?
គម្រោងអភិវឌ្ឍន៍បុរី ត្រូវបានគេស្គាល់ជាទូទៅថាជាបណ្តុំនៃផ្ទះជាច្រើន ក្នុងសហគមន៍ ឬតំបន់មួយ។ គម្រោងបុរី មានប្រភេទលំនៅដ្ឋានដូចជា៖ ផ្ទះវីឡាទោល វីឡាភ្លោះ វីឡាកូនកាត់ ផ្ទះអាជីវកម្ម និងផ្ទះល្វែង។ ការអភិវឌ្ឍន៍បុរីមានប្រភេទអចលនទ្រព្យផ្សេងៗគ្នា ទៅតាមទំហំចំនួននៃបន្ទប់គេង និងតម្លៃ ដើម្បីបម្រើទៅតាមសេចក្តីត្រូវការ និងការរស់នៅជា លលក្ខណៈឯកជន ជាបុគ្គល និងក្រុមគ្រួសារ ឬអាជីវកម្មជាដើម។
នៅក្នុងតំបន់ក្នុងគម្រោងមួយចំនួន ជាពិសេសគម្រោងល្បីៗ បានអភិវឌ្ឍន៍ជាសួនកុមារ សួនច្បារ ទីផ្សារ ហាងទំនិញ សន្តិសុខយាម និងប្រព័ន្ធត្រួតពិនិត្យសន្តិសុខ ដ៏មានសុវត្ថិភាព។
តើមានបុរីនៅកន្លែងណាខ្លះ នៅក្នុងប្រទេសកម្ពុជា?
ភាគច្រើននៃអ្នកទិញផ្ទះ បាននាំគ្នាទៅរស់នៅ និងទិញផ្ទះរបស់ខ្លួន នៅក្នុងទីក្រុងភ្នំពេញ ដោយសារតែការអភិវឌ្ឍន៍បុរីភាគច្រើន មាននៅក្នុងរាជធានីភ្នំពេញ។ ទោះជាយ៉ាងណាបច្ចុប្បន្ន គេក៏អាចទិញផ្ទះបុរី នៅក្នុងខេត្តគោលដៅផ្សេងទៀត ខេត្ត៖ សៀមរាប ខេត្តព្រះសីហនុ និងកំពង់ស្ពឺ ក៏ចាប់ផ្តើមមានបុរីដែរ។
ភ្នំពេញ គឺជាទីតាំងដែលពេញនិយមបំផុត ក្នុងការទិញបុរីសម្រាប់ទាំងការរស់នៅ និងការវិនិយោគ។ គម្រោងបុរីនៅទីនេះ មានចាប់ពីគម្រោងខ្នាតតូច ទៅធំ និងស្តង់ដារទាប ទៅប្រភេទ បុរីស្តង់ដារប្រណិត។ គម្រោងបុរីនៅភ្នំពេញ មានដូចជា៖ បុរីមេគង្គរ៉ូយ៉ាល់ បុរី លឹម ឈាងហាក់ បុរីប៉េង ហួត បុរីពិភពថ្មី បុរីភ្នំពេញថ្មី បុរីមហាសែនសុខ និងមានផ្សេងច្រើនទៀត។
សូមមើលគម្រោងបុរីល្បីៗនៅរាជធានីភ្នំពេញ!
ខេត្តសៀមរាប គឺជាគោលដៅទេសចរណ៍ដ៏ល្បីរបស់ពិភពលោក ដែលត្រូវបានគេស្គាល់ថាជាខេត្តដែលមានប្រាសាទអង្គរវត្ត ដ៏អស្ចារ្យនៅទីនោះ។ ប្រាសាទបុរាណ បានដើរតួនាទីយ៉ាងសំខាន់ ក្នុងការទាក់ទាញភ្ញៀវទេសចររាប់លាននាក់ ជារៀងរាល់ឆ្នាំ។ ហេតុនេះហើយ បានជាមានគម្រោងអភិវឌ្ឍន៍មួយចំនួន បានជ្រើសរើសខេត្តដ៏ស្រស់ស្អាតមួយនេះ។ ក្នុងនោះគម្រោងបុរី នៅក្នុងតំបន់នេះរួមមាន បុរី Angkor Palace, បុរី Nagara និងបុរីប្រិមប្រិយជាដើម។
ទន្ទឹមនឹងនេះដែរ កំពង់សោម ឬក្រុងព្រះសីហនុ ត្រូវបានគេស្គាល់ថា ជាទីក្រុងកំពង់ផែធំជាងគេ។ ក៏ជាតំបន់គោលដៅទេសចរណ៍ធំមួយ ដែលត្រូវបានគេមើលឃើញថា មានកំណើនការសាងសង់ ទាំងការអភិវឌ្ឍន៍ផ្នែកពាណិជ្ជកម្ម និងលំនៅដ្ឋានក្នុងឆ្នាំកន្លងមកនេះ។ គម្រោងបុរី មួយចំនួននៅកំពង់ សោមដូចជា បុរី BS បុរី Pearl City និងបុរី Hillton។
ខេត្តកំពង់ស្ពឺ ក៏បានចាប់ផ្តើមលេចឡើងនូវការអភិវឌ្ឍន៍ គម្រោងបុរីមួយចំនួន ដោយសារខេត្តនេះ នៅមិនឆ្ងាយពីទីក្រុង ហើយម្យ៉ាង ដើម្បីបំពេញតាមតម្រូវការនៃអ្នកទិញក្នុងស្រុកនៅក្នុងតំបន់នេះ។ បុរីផ្សារថ្មីខេត្តកំពង់ស្ពឺគឺជាគម្រោងថ្មីបំផុត នៅក្នុងខេត្តនេះ។
តើចំណុចអ្វី ដែលធ្វើឲ្យតម្លៃផ្ទះក្នុងបុរី មានភាពខុសប្លែកគ្នា?
គម្រោងផ្សេងគ្នា មានតម្លៃផ្សេងគ្នា ដោយសារតែហេតុផលមួយចំនួន ហើយទីតាំងគឺជាហេតុផលមួយ ក្នុងចំណោមទាំងនេះ។ ប្រសិនបើអ្នកចង់បានផ្ទះនៅតំបន់សំខាន់ មានសក្តានុពលនោះ តម្លៃគឺពិតជាខ្ពស់។ ទោះជាយ៉ាងណា វាមិនមានន័យថា ការទិញផ្ទះមួយនៅក្នុងទីក្រុង គឺតែងតែមានតម្លៃថ្លៃ ជាងការទិញនៅក្នុងខេត្តនោះទេ។ ពេលខ្លះ វាក៏អាស្រ័យលើគម្រោងដែលអ្នកទិញ។ ហើយកត្តាផ្សេងៗទៀតរួមមាន៖ អ្នកអភិវឌ្ឍន៍រចនាផ្ទៃខាងក្នុង ទំហំនៃយូនីត គុណភាពនៃសំណង់របស់គម្រោង និងសេវាកម្មផ្សេងៗនៅក្នុងគម្រោង។
ឧទាហរណ៍ដូចជា បុរីប៉េងហួត និងបុរីពិភពថ្មី គឺមានតម្លៃប្រហាក់ប្រហែលគ្នា ចាប់ពី ៦០,០០០ ដុល្លារ ខណៈពេលបុរីផ្សារថ្មីខេត្តកំពង់ស្ពឺ មានតម្លៃចាប់ពី ៣៥,០០០ដុល្លារ ក្នុងមួយយូនីត។ ចំណែកបុរីនៅ កំពង់សោម និងខេត្តសៀមរាប ក៏មានតម្លៃចាប់ពី ៦០,០០០ ដុល្លារផងដែរ។ តម្លៃទាំងនេះ គឺសម្រាប់ផ្ទះល្វែង ឬផ្ទះអាជីវកម្ម ប៉ុន្តែសម្រាប់ផ្ទះវីឡាវិញតម្លៃគឺកាន់តែខ្ពស់ជាងនេះទៅទៀត។
ច្បាប់ពន្ធសម្រាប់បុរី នៅក្នុងប្រទេសកម្ពុជា
សម្រាប់រាល់ប្រភេទនៃអចលនទ្រព្យ ជាមួយប្លង់កម្មសិទ្ធិស្របច្បាប់/ប្លង់រឹងនៅកម្ពុជា មិនថាអ្នកក្នុងស្រុក ឬជនបរទេសនោះទេ ការផ្ទេរប្លង់កម្មសិទ្ធិ គឺត្រូវតែបង់ពន្ធ ពន្ធលើការផ្ទេរកម្មសិទ្ធិនេះ គឺ៤ភាគរយ នៃតម្លៃអចលនទ្រព្យសរុប។
ប្រសិនបើអ្នកជាម្ចាស់អចលនទ្រព្យណាមួយ នៅក្នុងប្រទេសកម្ពុជា អ្នកត្រូវបង់ពន្ធលើអចលនទ្រព្យនោះ។ វាជាពន្ធប្រចាំឆ្នាំ ដែលម្ចាស់ត្រូវបង់ប្រាក់ប្រចាំឆ្នាំ នៅថ្ងៃទី ៣០ ខែកញ្ញាពន្ធនេះ សម្រាប់ទាំងជនជាតិខ្មែរ និងជនបរទេស។ ប៉ុន្តែទាល់តែអចលនទ្រព្យដែលមានតម្លៃ ចាប់ពី ២៥,០០០ដុល្លារ និងលើសពីនេះ ទើបត្រូវបង់ពន្ធ។
ពន្ធលើអចលនទ្រព្យ ត្រូវបានគណនាដោយយក ៨០% នៃតម្លៃអចលនទ្រព្យសរុប ដកនឹង ២៥,០០០ដុល្លារ គុណនឹង ០.១ ភាគរយ។ នេះបើតាមការលើកឡើង របស់លោក Anthony Galliano នាយកប្រតិបត្តិរបស់ក្រុមហ៊ុន Cambodia Investment Management។
តើជនបរទេស មានសិទ្ធិកាន់កាប់បុរីនៅក្នុងប្រទេសកម្ពុជាដែរឬទេ?
ច្បាប់ស្តីពីកម្មសិទ្ធិជនបរទេសនៅក្នុងប្រទេសកម្ពុជា ដែលត្រូវបានប្រកាសឱ្យប្រើនៅថ្ងៃទី២៤ ខែឧសភាឆ្នាំ ២០១០ លើកឡើងថា ជនបរទេសអាចកាន់កាប់លើយូនីតឯកជន នៃអគារសហកម្មសិទ្ធិ។ ដូច្នេះមានតែប្លង់កម្មសិទ្ធិរួមប៉ុណ្ណោះ ដែលអាចប្រើសម្រាប់ជនបរទេស។
នៅក្នុងមាត្រា៨ នៃច្បាប់ភូមិបាលបានចែងថា «ជនបរទេសដែលបានក្លែងបន្លំប័ណ្ណសញ្ជាតិដើម្បីទទួលបានកម្មសិទ្ធិលើដីនៅកម្ពុជា នឹងត្រូវផ្ដន្ទាទោសដូចមានចែងក្នុងមាត្រា២៥១ នៃច្បាប់។ រាល់អចលនទ្រព្យទ្រព្យណា ដែលបានមកក្នុងលក្ខខណ្ឌនេះ ត្រូវរឹបអូស យកទុកជាសម្បត្តិរដ្ឋ ដោយគ្មានសំណងពីរដ្ឋឡើយ។ នេះមានន័យថា ជនបរទេសមិនត្រូវបានអនុញ្ញាត ធ្វើជាម្ចាស់ផ្ទះបុរី និងគ្រប់អចលនទ្រព្យ ទាំងអស់ដែលជាប់ជាមួយដី នៅក្នុងប្រទេសកម្ពុជា។
ទោះយ៉ាងណា មានវិធីផ្សេងទៀតសម្រាប់ជនបរទេស ក្នុងការទិញបុរីក្នុងប្រទេសកម្ពុជា គឺទិញតាមរយៈភាគីតំណាង ជាមួយជនជាតិខ្មែរ។
ស្វែងយល់បន្ថែមអំពីការទិញផ្ទះបុរីតាមរយៈភាគីតំណាង!
តើមានកម្មសិទ្ធិកាន់កាប់អ្វីខ្លះ សម្រាប់បុរីនៅក្នុងប្រទេសកម្ពុជា?
កម្ពុជាប្រើប្រាស់ប្លង់កម្មសិទ្ធិបីប្រភេទ។ មានប្លង់ទន់ ប្លងរឹង ប្លង់ប្រព័ន្ធLMAP - ប្លង់ប្រព័ន្ធLMAPជាប្រភេទប្លង់រឹង ដែលមានសុវត្ថិភាពបំផុត។
ដូច្នេះ ប្រសិនបើអ្នកទិញផ្ទះពីបុរីណាមួយ យកល្អ អ្នកត្រូវសួរម្ចាស់គម្រោងរកប្លង់រឹងប្រភេទ LMAP ដើម្បីធានាសុវត្ថិភាពល្អបំផុត សម្រាប់អចលនទ្រព្យរបស់អ្នកនាពេលអនាគតទ្រព្យ។
ស្វែងយល់បន្ថែមអំពីប័ណ្ណកម្មសិទ្ធិនៅក្នុងប្រទេសកម្ពុជា!
តើអ្នកត្រូវពិនិត្យអ្វីខ្លះ នៅពេលទិញបុរីនៅក្នុងប្រទេសកម្ពុជា?
គម្រោងអភិវឌ្ឍន៍បុរីមួយចំនួន មិនមានបំណងគេពីផ្លូវច្បាប់ទេ។ នៅពេលថ្មីៗនេះ ក្រសួងសេដ្ឋកិច្ច និងហិរញ្ញវត្ថុ និងក្រសួងរៀបចំដែនដីនគរូបនីយកម្ម និងសំណង់ បានរំលឹកអ្នកទិញផ្ទះ ឲ្យមានការប្រុងប្រយ័ត្ន មុនពេលសម្រេចចិត្ត។ ក្នុងពេលជាមួយគ្នានោះ ក្រសួងបានប្រកាសផងដែរ អំពីគម្រោងមួយចំនួន ដែលមិនមានអាជ្ញាប័ណ្ណសាងសង់ផ្លូវច្បាប់។
ចំណុចមួយទៀត ដើម្បីឱ្យប្រាកដថា អ្នកនឹងមិនទិញគម្រោងអភិវឌ្ឍន៍ខុសច្បាប់ គឺការត្រូតពិនិត្យមើលឯកសារស្របច្បាប់សំខាន់ៗ ចំនួន៥។ ឯកសារទាំងនេះ មានដូចជា៖ ប្លង់រឹង ឬប្លង់រឹង LMAP ការចុះបញ្ជីរបស់ក្រុមហ៊ុន ផែនការមេដែលបានទទួលស្គាល់ដោយក្រសួង អាជ្ញាប័ណ្ណសាងសង់ និងអាជ្ញាប័ណ្ណបុរី។
តើការទិញបុរីនៅក្នុងប្រទេសកម្ពុជា ជាការវិនិយោគ ល្អដែរឬទេ?
មនុស្សគ្រប់រូប ចាំបាច់ត្រូវមានផ្ទះមួយ។ ទីផ្សារលំនៅដ្ឋានរបស់ប្រទេសកម្ពុជា មានសក្តានុពល ទាំងពេលបច្ចុប្បន្ន និងអនាគត មិនថាអ្នកគ្រាន់តែចង់បានផ្ទះល្អមួយ សម្រាប់រស់នៅ ឬអ្នកចង់ទិញដោយចេតនា ចង់បានផលចំណេញត្រឡប់មកវិញ នៅក្នុងឆ្នាំបន្ទាប់។ វាហាក់ពិតជាមានលក្ខណៈប្រាកដណាស់ថា តម្លៃអចលនទ្រព្យ នឹងបន្តកើនឡើងថែមទៀត។
ជាក់ស្តែង ដូចជាបុរីពិភពថ្មីនៅកំបូល នៅតាមបណ្តោយផ្លូវជាតិលេខ៤ នៅភ្នំពេញ គម្រោងបានទៅដល់តំបន់នេះ បានប្រហែលពីរឆ្នាំ រហូតដល់ពេលនេះ។ បច្ចុប្បន្ននេះ តម្លៃយូនីតរបស់គម្រោងនេះ បានកើនឡើងយ៉ាងខ្លាំង។ លើសពីនេះទៅទៀត នៅពេលដែលគម្រោងនេះត្រូវបានបញ្ចប់សកម្មភាពសេដ្ឋកិច្ច បានការរីកលូតលាស់យ៉ាងច្រើន។
កត្តានេះបានធ្វើឱ្យការទិញផ្ទះបុរី មានឱកាសល្អជានិច្ច ដើម្បីទទួលបានផលចំណេញ ត្រឡប់មកវិញនៅថ្ងៃអនាគត។
តើអ្នកបង់ប្រាក់សម្រាប់បុរីនៅក្នុងប្រទេសកម្ពុជា យ៉ាងដូចម្តេច?
ប្រសិនបើអ្នកមានប្រាក់គ្រប់គ្រាន់សម្រាប់បង់ដាច់ អ្នកនឹងទទួលបានការបញ្ចុះតម្លៃបន្ថែមទៀត។ ប៉ុន្តែប្រសិនបើអ្នកមិនចង់បង់ដាច់ទេ ឬអ្នកមិនមានថវិកាគ្រប់គ្រាន់ អ្នកមានជម្រើសផ្សេងទៀត ដូចជាការបង់រំលស់រយៈពេលវែង បង់រំលស់ជាដំណាក់កាល និងយកកម្ចីពីធនាគារ ដែលអាចមានរយៈ ពេលវែង ១៥ ឬ ២០ឆ្នាំ។
ប្រសិនបើអ្នកចង់ទិញផ្ទះជាមួយកម្ចីធនាគារ អ្នកអាចទទួលស្វែងរកជាមួយធនាគារមួយចំនួន នៅក្នុងប្រទេសកម្ពុជាមានដូចជា៖ ធនាគារ កាណាឌីយ៉ា អេស៊ីលីដា ធនាគារ ANZ Royal ធនាគារ Hong Leong Bank ធនាគារ ABA ធនាគារវឌ្ឍនៈ និងមានជាច្រើនទៀត។ ដើម្បីទទួលបានប្រាក់កម្ចីពីធនាគារមួយ អ្នកត្រូវមានប្រាក់ចំណូលទៀងទាត់ប្រចាំខែ មានទ្រព្យបញ្ចាំ មានប្លង់រឹង និងមានអ្នកធានា។ មុននឹងធនាគារផ្តល់ប្រាក់កម្ចី នឹងមានការសិក្សា យ៉ាងល្អិតល្អន់ លើលទ្ធភាពនៃការសងប្រាក់ត្រលប់ ទៅធនាគារវិញ។ ប្រសិនបើអ្នកចង់ដឹងពីព័ត៌មាន នៃប្រាក់កម្ចីទិញផ្ទះណាមួយ សូមចុចទីនេះ!
អ្នកគួរតែទិញផ្ទះដែលលក់មុនគម្រោង ជាមួយគម្រោងបុរី នៅក្នុងប្រទេសកម្ពុជាដែរឬទេ?
គម្រោងអភិវឌ្ឍន៍ជាច្រើននៅក្នុងប្រទេសកម្ពុជា បានកើនឡើង និងបានប្រើប្រាស់ជាមួយយុទ្ធសាស្ត្រលក់ថ្មីមួយ គឺការលក់មុនគម្រោង។ ការលក់មុនគម្រោងមានន័យថា ម្ចាស់គម្រោង លក់គម្រោងរបស់ពួកគេ មុនពេលចាប់ផ្តើម និងក្នុងអំឡុងពេលការសាងសង់គម្រោងនោះ។
ការទិញយូនីតនៅមុនគម្រោង អាចទទួលបានគុណសម្បត្តិជាច្រើន។ អ្នកអាចទទួលបានការបញ្ចុះតម្លៃពិសេស អ្នកអាចជ្រើសរើសយកយូនីត នៅក្នុងគម្រោងមុនអ្នកផ្សេងទៀត និងមានការផ្តល់ជូនពិសេសជាច្រើនទៀតផងដែរ។ ទោះជាយ៉ាងណា ប្រសិនបើអ្នកទិញអចលនទ្រព្យ មុនគម្រោង អ្នកត្រូវសិក្សាពីប្រវត្តិក្រុមហ៊ុនឲ្យបានច្បាស់លាស់ មុនពេលព្រមព្រៀងទិញ៕
© រក្សាសិទ្ធិដោយ thmeythmey.com
