ភ្នំពេញ៖ លោក ជាម យៀប តំណាងរាស្ត្រមណ្ឌលព្រៃវែងនៃគណបក្សប្រជាជនកម្ពុជា និងជាប្រធានគណៈកម្មការទី២នៃរដ្ឋសភា ទទួលបានគោរមងារកិត្តិយស នៃរាជបណ្ឌិត្យសភាកម្ពុជា ជា«កិត្តិសេដ្ឋាបណ្ឌិត»។ ចំណែកលោក អ៊ឹម ឈុនលឹម ប្រធានក្រុមប្រឹក្សាធម្មនុញ្ញ ទទួលបានគោរមងារកិត្តិយស នៃរាជបណ្ឌិត្យសភាកម្ពុជា ជា«កិត្តិនីតិកោសលបណ្ឌិត» ក្រោមការត្រាស់បង្គាប់របស់ព្រះមហាក្រត្ស នរោត្តម សីហមុនី។ នេះបើតាមព្រះរាជក្រឹត្យចុះហត្ថលេខាដោយព្រះមហាក្រត្សនៅថ្ងៃទី៩ វិច្ឆិកា ឆ្នាំ២០១៩។
មុននឹងនិយាយពីគោរមងារកិត្តិយសនេះ យើងគួរស្វែងយល់ពីពាក្យថា «កិត្តិសេដ្ឋាបណ្ឌិត» មកពីពាក្យថា កិត្តិ + សេដ្ឋា + បណ្ឌិត។
កិត្តិ «បា.; សំ» ( ន. ) (កិរ្តិ ) សេចក្ដីសរសើរ, សេចក្ដីថ្កុំថ្កើង, រុងរឿង, ល្បីល្បាញ ។
សេដ្ឋ ឬ សេដ្ឋា «បា.; សំ» ( គុ. ) ប្រសើរផុត, ប្រសើរលើសលុប, ឧដុង្គឧត្តម, ខ្ពង់ខ្ពស់។
បណ្ឌិត «បា» ( ន. ) ជនអ្នកមានប្រាជ្ញា, ជនប្រព្រឹត្តល្អ គឺអ្នកកាន់សុចរិត ១០ ប្រការ, ឬដោយពិស្ដារ, ជនប្រកាន់សុចរិត ៤០ ប្រការដោយខ្ជាប់ខ្ជួនហ្មត់ចត់ជានិច្ច; អ្នកប្រាជ្ញខាងផ្លូវសុចរិតយុត្តិធម៌
ដូច្នេះគោរមងា«កិត្តិសេដ្ឋាបណ្ឌិត» ដែលលោក ជាម យៀប តំណាងមណ្ឌលព្រៃវែងរូបនេះ ទទួលបានពីព្រះមហាក្សត្រ មានន័យថា បណ្ឌិតដ៏ប្រសើរឬដ៏ឧដុង្គឧត្តម និងប្រកបដោយកិត្តិយស។
ងាកមកលោក អ៊ឹម ឈុនលឹម ប្រធានក្រុមប្រឹក្សាធម្មនុញ្ញ ដែលទទួលបានគោរមងារកិត្តិយស នៃរាជបណ្ឌិត្យសភាកម្ពុជា ជា«កិត្តិនីតិកោសលបណ្ឌិត» ក្រោមការត្រាស់បង្គាប់ពីព្រះមហាក្រត្យ នរោត្តម សីហមុនី វិញ។
ពាក្យថា «កិត្តិនីតិកោសលបណ្ឌិត» មកពីពាក្យ កិត្តិ + នីតិ + កោសល + បណ្ឌិត។
នីតិ ប្រែថា ច្បាប់, ឧបាយជាគ្រឿងណែនាំ; បែបផែន; ទំនឹមទំនៀម, ប្រពៃណី ។
កោសល ឬកុសល ប្រែថា ល្អ, ប្រពៃ, បុណ្យ តែក្នុងទីនេះ អាចសំដៅថា ប៉ិនប្រសប់, ឈ្លាសវាងវៃ។
ដូច្នេះពាក្យថា «កិត្តិនីតិកោសលបណ្ឌិត» ដែលលោក អ៊ឹម ឈុនលឹម ទទួលបាននេះ មានន័យថា បណ្ឌិត ដែលប្រកបទៅដោយកិត្តិយស និងមានភាពឈ្លាសវៃ ឬមានជំនាញខ្ពស់ផ្នែកច្បាប់។
គោរមងារ«កិត្តិសេដ្ឋាបណ្ឌិត» និង«កិត្តិនីតិកោសលបណ្ឌិត» ដែលបានច្របាច់បញ្ចូលគ្នានេះ គឺជាពាក្យបំបែក និងញែកពីគ្នា ដែលមានការពន្យល់ទៅតាមពាក្យនីមួយៗ នៅក្នុងវចនានុក្រមរបស់សម្ដេចព្រះសង្ឃរាជ ជួន ណាត។ ប៉ុន្តែសម្រាប់ពាក្យទាំងមូលតែម្ដង គឺគ្មាននៅក្នុងវចនានុក្រមសម្ដេចសង្ឃឡើយ៕