FIFA
កីឡាអន្តរជាតិ
អន្តរជាតិ
World Cup៖ Lippi លាលែងពីតំណែងលើកទី២ ក្រោយចិនឃ្លាតពីកៅអីស្វ័យប្រវត្តិទៅវគ្គបន្ត
× លោក Marcello Lippi បានលាឈប់ពីតំណែងគ្រូបង្វឹកក្រុមជម្រើសជាតិចិន បន្ទាប់ពីដឹកនាំក្រុមចាញ់ស៊ីរី ២-១ ក្នុងការប្រកួតវគ្គជម្រុះ World Cup 2020 ជុំទី២។ ជ័យជម្នះរបស់ស៊ីរី ដែលធ្វើឡើងនៅទឹកដីកណ្តាលក្នុងក្រុងឌូបៃ ប្រទេសអេមីរ៉ាតអារ៉ាប់រួមនៅថ្ងៃទី១៤ ខែវិច្ឆិកា បានបង្កើនគម្លាតពិន្ទុលើសចិនដល់ទៅ៥ពិន្ទុ។
បរាជ័យលើកដំបូងរបស់ចិនក្នុងពូល A ជាជ័យជម្នះរបស់ស៊ីរីគ្រប់ការប្រកួតក្នុងវគ្គជម្រុះតាមពូលនៅតំបន់អាស៊ីនេះ។ បើទោះត្រូវលេងនៅទឹកដីកណ្តាល ដ្បិតប្រទេសជួបវិបត្តិនយោបាយ ស៊ីរីនៅតែអាចរក្សាភាពឈ្នះរបស់ខ្លួនជាលើកទី៤ ដោយទទួលបានពិន្ទុសរុប១២ពិន្ទុពេញ។ ចិន ដែលប្រកួតឈ្នះ២ ស្មើ១ និងចាញ់១ ឈរលេខរៀងទី២ មាន៧ពិន្ទុ តាមពីក្រោយដោយហ្វីលីពីនដែលមាន៧ពិន្ទុដូចគ្នាតែចាញ់គ្រាប់ស៊ុត។ ហ្វីលីពីន យកឈ្នះម៉ាល់ឌីវ ២-១ ក្នុងជំនួបទី៤ របស់ខ្លួន។
គម្លាតរហូតដល់៥ពិន្ទុនេះ បានធ្វើឲ្យគ្រូសញ្ជាតិអ៊ីតាលី Lippi សម្រេចចុះចេញពីកៅអីគ្រូបង្វឹកចិនជាលើកទី២ បន្ទាប់ពីឡើងទៅដឹកនាំជាថ្មីបានត្រឹមរយៈពេល៦ខែ ពោលគឺកាលពីខែឧសភាកន្លងទៅ។
បុរសវ័យ ៧១ឆ្នាំ ដែលជួយជម្រើសជាតិអ៊ីតាលីឈ្នះពាន World Cup ឆ្នាំ២០០៦ ក្លាយជាគ្រូចិនលើកដំបូងក្នុងខែវិច្ឆិកា ឆ្នាំ ២០១៦ ហើយលែងលែងពីតំណែងវិញ ក្រោយដឹកនាំចិនធ្លាក់ត្រឹមវគ្គ ១/៤ ផ្តាច់ព្រ័ត្រពានរង្វាន់ Asian Cup និងខកខានជួយក្រុមពីតំបន់អាស៊ីនេះទៅបង្ហាញខ្លួនក្នុងការប្រកួត World Cup នៅរុស្ស៊ីក្នុងឆ្នាំ២០១៨។
«ពួកគេ [ស៊ីរី] លេងបានល្អជាងយើង ហើយសមនឹងទទួលបានជ័យជម្នះនេះ។ ខ្ញុំទទួលខុសត្រូវទាំងស្រុងចំពោះបរាជ័យនេះ ដោយប្រកាសលាលែងពីតំណែងគ្រូបង្វឹកជាផ្លូវការនៅពេលនេះតែម្តង»។ លោក Lippi លើកឡើងបែបនេះនៅក្រុងឌូបៃ នៅក្រោយបញ្ចប់ការប្រកួតភ្លាមៗ។
ចិន ពិតជាចង់ឲ្យវិស័យកីឡាបាល់ទាត់របស់ពួកគេរីកចម្រើនដូចប្រទេសខ្លាំងៗដទៃ ដោយហ៊ានចំណាយប្រាក់ដ៏ច្រើនសន្ធឹកដើម្បីអភិវឍ្ឍតាមរយៈការនាំយកអ្នកដែលមានឈ្មោះល្បីៗទៅបំផុសគំនិតកីឡាកររបស់ពួកគេដើម្បីឈានដល់កម្រិតខ្ពស់មួយ។ តួយ៉ាងដូចជាលោក Lippi នេះគឺចិនត្រូវចំណាយប្រាក់រាប់សិបលានដុល្លារក្នុងមួយឆ្នាំៗ។ អ្វីទាំងអស់នេះ លោក Lippi ពិតជាយល់ច្បាស់រហូតលះបង់តំណែង៕
Tag:
Marcello Lippi
ចិន
World Cup
© រក្សាសិទ្ធិដោយ thmeythmey.com