អន្តរជាតិ
មហាធៀ ទាមទារការបកស្រាយរបស់អាមេរិកជុំវិញការទម្លាក់កម្រិតសុវត្ថិភាពអាកាសចរណ៍ម៉ាឡេស៊ី
មហាធៀ មហាម៉ាត់ នាយករដ្ឋមន្ត្រីម៉ាឡេស៊ី
×![]()
ម៉ាឡេស៊ី ទាមទារឲ្យមានការបកស្រាយពីសំណាក់រដ្ឋបាលអាកាសចរណ៍សហព័ន្ធរបស់សហរដ្ឋអាមេរិក (FAA) ពាក់ព័ន្ធការទម្លាក់កម្រិតសុវត្ថិភាពផ្លូវអាកាសរបស់ម៉ាឡេស៊ី ។ លោកនាយករដ្ឋមន្ត្រី មហាធៀ មហាម៉ាត់ បញ្ជាក់បែបនេះ នៅថ្ងៃ១៤ វិច្ឆិកា ។ 
លោក មហាធៀ បញ្ជាក់ថា ការបកស្រាយសម្រាប់ការទម្លាក់ពីប្រភេទទី ១ (Category 1) ទៅកាន់ប្រភេទទី២ (Category 2) គឺមានសារសំខាន់ ខណៈវានឹងអនុញ្ញាតឲ្យប្រទេសម៉ាឡេស៊ីកែលម្អបញ្ហា និងពង្រឹងភាពទន់ខ្សោយ។
«យើងចង់ដឹងមូលហេតុនៅពីក្រោយការទម្លាក់នេះ ដូច្នេះម៉ាឡេស៊ីអាចស្វះស្វែងរកមធ្យោបាយពង្រឹងស្ថានការណ៍។ ប្រសិនបើពួកគេនិយាយថា យើងគ្មានប្រសិទ្ធភាព នោះ ហេតុម្ដេចយើងបានប្រែក្លាយអាកាសយានដ្ឋានអន្តរជាតិគូឡាឡាំពួ (KLIA) ទៅជាអាកាសយានដ្ឋានមួយក្នុងចំណោមអាកាសចរណ៍ធំបំផុតទាំង២០លើពិភពលោក»។ លោក មហាធៀ និយាយបែបនេះ ដោយដកស្រង់ផ្សាយលើទីភ្នាក់ងារព័ត៌មាន Bernama ។
លោកនាយករដ្ឋមន្ត្រីវ័យ៩៤ឆ្នាំរូបនេះ បញ្ជាក់ទៀតថា ម៉ាឡេស៊ី ក៏បានទទួលការអញ្ជើញពីបណ្តាប្រទេសដទៃទៅគ្រប់គ្រងអាកាសយានដ្ឋានពួកគេដែរ។ លោកបន្ថែមថា អ្នកបើកយន្តហោះម៉ាឡេស៊ី ត្រូវបានទទួលឲ្យចូលបម្រើការក្នុងប្រទេសដូចជា ឥណ្ឌូណេស៊ី និងចិន។ លោក អួតទៀតថា ប្រជាពលរដ្ឋម៉ាឡេស៊ី ត្រូវបានគេទទួលស្គាល់ថា ជាមនុស្សមានសមត្ថភាព។
«ប្រសិនបើពលរដ្ឋយើងទៅធ្វើការនៅក្រៅប្រទេស ពួកគេពុំធ្វើការជាពលករគ្មានជំនាញឡើយ ក៏ប៉ុន្តែមានជំនាញច្បាស់លាស់ ដូចជា អ្នកបើកបរយន្តហោះ, វិស្វករ និងអ្នកគូសប្លង់ជាដើម ហើយទទួលបានប្រាក់បៀវត្សដូចអ្នកធ្វើការជំនាញមកពីតំបន់អឺរ៉ុប»។ លោក មហាធៀ លើកឡើងបែបនេះ។
សូមបញ្ជាក់ថា រដ្ឋបាលអាកាសចរណ៍សហព័ន្ធរបស់អាមេរិក បានទម្លាក់អាជ្ញាធរអាកាសចរណ៍ស៊ីវិលម៉ាឡេស៊ី (CAAM) ទៅកាន់ប្រភេទទី២ នៃនិយតករអាកាសចរណ៍ បន្ទាប់ពីមានការត្រួតពិនិត្យពីអាជ្ញាធរអាមេរិកក្នុងខែ មេសា កន្លងទៅ។ ជាលទ្ធផលនៃការទម្លាក់នេះ ក្រុមហ៊ុនអាកាសចរណ៍ ដែលទទួលបានអាជ្ញាបណ្ណពី CAAM ត្រូវបានរាយការណ៍ថា រងការរឹតត្បិតពីការបន្ថែមផ្លូវថ្មីទៅនិងមកពីសហរដ្ឋអាមេរិក៕
Tag:
សហរដ្ឋអាមេរិក
មហាធៀមហាម៉ាត់
© រក្សាសិទ្ធិដោយ thmeythmey.com
