ជាតិ
បុណ្យសមុទ្រ៖ លោក ថោង ខុន ឲ្យម្ចាស់សណ្ឋាគារ ផ្ទះសំណាក់នៅកំពតបើកទទួលការកក់បន្ទប់ លោក ថោង ខុន រដ្ឋមន្ត្រីក្រសួងទេសចរណ៍។ រូបភាពពីក្រសួងទេសចរណ៍
× ម្ចាស់សណ្ឋាគារ ផ្ទះសំណាក់ មួយចំនួននៅខេត្តកំពតមិនទទួលការកក់បន្ទប់ស្នាក់នៅ សម្រាប់ភ្ញៀវនាពិធីបុណ្យសមុទ្រខាងមុខនេះឡើយ ដោយពួកគេចង់ទុកជួលភ្លាមៗ។ រដ្ឋមន្ត្រីក្រសួងទេសចរណ៍ លោក ថោង ខុន បានប្រតិកម្មចំពោះបញ្ហា ដោយលោកបានស្នើឲ្យពួកគេបើកការកក់ឡើងវិញ។
កិច្ចប្រជុំត្រៀមរៀបចំពិធីបុណ្យសមុទ្រលើកទី៨ ជុំទី២ នៅសាលាខេត្តកំពត បានប្រព្រឹត្តកាលពីថ្ងៃទី១៤ ខែវិច្ឆិកា ដោយលោក ថោង ខុន និងមន្ត្រីពាក់ព័ន្ធបានលើកយកបញ្ហាម្ចាស់សណ្ឋាគារ ផ្ទះសំណាក់ ដែលមិនទទួលការកក់បន្ទប់មុន។
តាមសេចក្តីប្រកាសព័ត៌មាននៅលើទំព័រហ្វេសប៊ុករបស់ក្រសួងទេសចរណ៍នាថ្ងៃទី១៥ ខែវិច្ឆិកា រដ្ឋមន្ត្រីក្រសួងទេសចរណ៍ បានអំពាវដល់ម្ចាស់អាជីវកម្មទាំងនោះ បើកការកក់ឡើងវិញ។ ជាមួយគ្នានេះដែរ លោកបានជំរុញឱ្យអនុគណៈកម្មការ ពង្រឹងកិច្ចសហការជាមួយក្រុមហ៊ុននានាក្នុងការផ្ដល់សេវាស្នាក់នៅក្នុងតង់ ដើម្បីជួយសម្រួលដល់ការស្នាក់នៅរបស់ភ្ញៀវទេសចរ ពីព្រោះបន្ទប់ស្នាក់នៅតាមសណ្ឋាគារ ផ្ទះសំណាក់ មិនគ្រប់គ្រាន់នោះឡើយ។
បញ្ហាមិនទទួលយកការកក់មុន ក៏ទទួលរងនូវការរិះគន់ពីសំណាក់ពលរដ្ឋមួយចំនួនផងដែរ ដោយពួកគេបានចោទម្ចាស់អាជីវកម្មសណ្ឋាគារ ផ្ទះសំណាក់ថា ងាយតម្លើងថ្លៃខ្ពស់នៅពេលភ្លាមត្រូវការភ្លាម ខណៈការកក់ទុកមុន គឺស្ថិតក្រោមតម្លៃដែលកំណត់ច្បាស់លាស់។
គួរបញ្ជាក់ថា ពិធីបុណ្យសមុទ្រលើកទី៨ ជុំទី២ នៅខេត្តកំពត នឹងប្រារព្ធធ្វើឡើងរយៈពេល៣ថ្ងៃ ចាប់ពីថ្ងៃទី២០-២២ ខែធ្នូ ។ រដ្ឋមន្ត្រីក្រសួងទេសចរណ៍ក៏បានបង្ហាញការរំពឹងទុកថា ពិធីបុណ្យសមុទ្រនេះនឹងមានភ្ញៀវទេសចរ និងប្រជាពលរដ្ឋចូលរួមច្រើនកុះករ៕
Tag:
ទេសចរ
បុណ្យសមុទ្រ
កំពត
© រក្សាសិទ្ធិដោយ thmeythmey.com