ជាតិ
រដ្ឋមន្ត្រីសុខាភិបាលប្រាប់មន្ត្រីឲ្យត្រៀមជួយពលរដ្ឋដែលមានបញ្ហាសុខភាពនៅរដូវរងា រូបភាពផ្ដល់សិទ្ធិដោយ លោក ពិសិដ្ឋ (Piseth)
× ភ្នំពេញ៖ ក្រសួងសុខាភិបាលបានអំពាវនាវដល់ប្រជាពលរដ្ឋ ពិសេសអ្នកដែលរស់នៅភូមិភាគឦសាន និងតំបន់នៅតាមព្រំប្រទល់ ឲ្យថែទាំសុខភាពផ្ទាល់ខ្លួន និងក្រុមគ្រួសារឲ្យបានល្អ ដើម្បីជៀសផុតពីជំងឺនានា ដែលអាចកើតឡើងដោយសារអាកាសធាតុចុះត្រជាក់នៅចន្លោះខែវិច្ឆិកាដល់ខែកុម្ភៈ។
ជំងឺដែលជួបប្រទះក្នុងអំឡុងពេលរដូវរងា ឫពេលអាកាសធាតុចុះត្រជាក់ គឺភាគច្រើនមានជំងឺផ្ដាសាយ អាល់លែហ្ស៉ី និងជំងឺផ្លូវដង្ហើមផ្នែកលើបណ្ដាលមកពីវីរុស និងមេរោគស្ត្រិតកូក ។ មេរោគនេះនឹងបង្កឲ្យមានរោគសញ្ញាដូចជា គ្រុនផ្ដាសាយហៀរសំបោរ រលាកបំពង់កឬច្រមុះ ក្អក និងរលាកក្រពះពោះវៀនដោយពពួកវីរុស ជំងឺហឺត ជំងឺភ្នែកក្រហម រមាស់ស្បែក ជំងឺថប់អារម្មណ៍ និងជំងឺគាំងបេះដូងជាដើម។ នេះបើតាមសេចក្ដីណែនាំរបស់ក្រសួងសុខាភិបាលនាថ្ងៃទី១៥ ខែវិច្ឆិកា។
សេចក្ដីណែនាំរបស់ក្រសួងសុខាភិបាល បានដកស្រង់សំដីលោក ម៉ម ប៊ុនហេង រដ្ឋមន្ត្រីក្រសួងសុខាភិបាល យ៉ាងដូច្នេះថា៖« គ្រប់ៗគ្នាត្រូវយកចិត្តទុកដាក់និងមានការប្រុងប្រយ័ត្នខ្ពស់នូវផលប៉ះពាល់សុខភាពនៅពេលដែលមានអាកាសធាតុចុះត្រជាក់ ជាពិសេសទារក កុមារនិងមនុស្សវ័យចំណាស់។ ត្រូវពិសារទឹកឲ្យបានញឹកញប់ ដើម្បីជៀសវាងការបាត់បង់ជាតិទឹក នូវពេលសេរីរាង្គខិតខំទប់ទល់ទៅនឹងភាពត្រជាក់»។
ជាមួយគ្នានេះ ក្រសួងសុខាភិបាលបានណែនាំឲ្យមន្ទីរសុខាភិបាលរាជធានី-ខេត្តទាំងអស់ឲ្យត្រៀមនូវឱសថ-បរិក្ខារពេទ្យ ព្រមទាំងត្រៀមក្រុមគ្រូពេទ្យប្រចាំការ២៤ម៉ោងលើ២៤ម៉ោង នៅតាមបណ្ដាមូលដ្ឋានសុខាភិបាលសាធារណះទាំងអស់ ដើម្បីជួយពិនិត្យព្យាបាលជូនប្រជាពលរដ្ឋឲ្យបានទាន់ពេលវេលា៕
Tag:
សុខាភិបាល
សុខភាព
រដូវរងា
© រក្សាសិទ្ធិដោយ thmeythmey.com