រថយន្ត
អន្តរជាតិ
រថយន្ត Google មួយគ្រឿងនៅបារាំង ដែលបង្ហាញផ្លូវគេ បែរជាជួបគ្រោះចរាចរណ៍
× រថយន្ត Google ដ៏ល្បីល្បាញ បានជួបគ្រោះថ្នាក់ចរាចរណ៍កាលពីពេលថ្មីៗកន្លងមកនេះ នៅក្រុង Chalesmes តំបន់ Jura ប្រទេសបារាំង។ យោងតាមការផ្សាយរបស់ Le Progrès រថយន្តនេះ បានបើកបរតាម GPS របស់ខ្លួន ជាមួយល្បឿនធម្មតា ហើយបានបុកជាមួយរថយន្តមួយគ្រឿងទៀត។
របាយការណ៍បានឲ្យដឹងថា គ្មានអ្នករបួសនោះឡើយ ប៉ុន្តែសម្ភារ និងរថយន្តទាំងសងខាងសុទ្ធតែរងការខូចខាត។ ក្នុងហេតុការណ៍នេះ អ្នកបើកបររថយន្ត Google គ្រាន់តែរបួសជង្គង់ស្រាលប៉ុណ្ណោះ រីឯភាគីម្ខាងទៀត មិនមានបញ្ហាអ្វីនោះទេ។
ថ្វីត្បិតតែជាករណីគ្រោះថ្នាក់ចរាចរណ៍ធម្មតា ដែលកើតឡើងនៅលើផ្លូវឯកជនក៏ដោយ ប៉ុន្តែអ្នកលេងអ៊ីនធ័រណិតជាច្រើន បាននាំគ្នាសើចចំអកឲ្យក្រុមហ៊ុន Google ដែលមានតួនាទីជាអ្នកត្រួសត្រាយផ្លូវ តែបែរជាមានបញ្ហាដោយខ្លួនឯង ពោលគឺមិនបានដឹងឧបសគ្គនៅចំពោះមុខ តាមរយៈបច្ចេកវិទ្យាទំនើបរបស់ខ្លួន។
ជាមួយគ្នានេះ មនុស្សមួយចំនួនបានលើកយកពីករណី Google Map ដែលកន្លងមក មានការបើកបរខុសផ្លូវ ទៅតាមការត្រួសត្រាយរបស់ក្រុមហ៊ុនបច្ចេកវិទ្យាយក្សមួយនេះ។ អ្នកបើកបររថយន្តប្រមាណ១០០នាក់នៅរដ្ឋ Colorado សហរដ្ឋអាមេរិក បាននាំគ្នាជិះរថយន្តតាមការត្រួសត្រាយរបស់ Google Maps ដើម្បីបញ្ចៀសចរាចរណ៍ដ៏កកស្ទះមួយ ប៉ុន្តែបច្ចេកវិទ្យាក៏មិនសុក្រឹត្យទាំងអស់នោះឡើយ អ្នកបើកបរទាំងអស់នោះ បែរជាទៅកកស្ទះបន្តកន្ទុយគ្នាតាមវាលស្រែទៅវិញ៕
© រក្សាសិទ្ធិដោយ thmeythmey.com