កីឡាអន្តរជាតិ
អន្តរជាតិ
Euro 2020៖ អាល្លឺម៉ង់បង្ហាញខ្លួន១៣ដងជាប់គ្នា ឯហ្វាំងឡង់បានកៅអីលើកដំបូងក្នុងប្រវត្តិសាស្ត្រ
× ក្រុមកីឡាបាល់ទាត់ជម្រើសជាតិអាល្លឺម៉ង់ជាក្រុមដំបូងគេបង្អស់ដែលអាចបង្ហាញខ្លួនក្នុងប្រកួតពានរង្វាន់តំបន់អឺរ៉ុប UEFA Euro ជាលើកទី១៣ជាប់គ្នា ពោលគឺបន្ទាប់ពីបានកៅអីទៅកាន់វគ្គផ្តាច់ព្រ័ត្រសម្រាប់ឆ្នាំ២០២០។ ហ្វាំងឡង់ ក៏បានបង្កើតកំណត់ត្រាថ្មីក្នុងប្រវត្តិសាស្ត្របាល់ទាត់អឺរ៉ុប ក្រោយឆ្លងផុតវគ្គជម្រុះ ដើម្បីបន្តទៅវគ្គផ្តាច់ព្រ័ត្រ Euro 2020 ជាលើកដំបូង។
ជ័យជម្នះ ៤-០ លើក្រុមបេឡរុស បានជួយឲ្យក្រុមឥន្ទ្រីដែកអាល្លឺម៉ង់មានពិន្ទុគ្រប់គ្រាន់ដើម្បីឆ្លងទៅ Euro 2020 ដោយស្វ័យប្រវត្តិបើទោះនៅសល់១ប្រកួតទៀតក្តី។ អាល្លឺម៉ង់ឈរកំពូលតារាងពូល C មាន១៨ពិន្ទុ ក្រោយឆ្លងកាត់ការប្រកួត៧លើក នាំមុខហូឡង់ដែលឈរលេខ២ ចំនួន២ពិន្ទុ និងនាំមុខដាច់លើក្រុមអៀរឡង់ខាងជើងរហូត៥ពិន្ទុ។
ក្នុងពូល C នេះ អាល្លឺម៉ង់ និងហូឡង់បានកៅអីទៅវគ្គបន្ត ខណៈអៀរឡង់ខាងជើងដែលឈលេខ៣មាន១៣ពិន្ទុ រួមទាំងបេឡារុស និងអ៊ីស្តូនីអស់សិទ្ធិ។ តាមពិតទៅហូឡង់នាំមុខ អៀរឡង់ខាងជើងចំនួន៣ពិន្ទុហើយនៅសល់មួយប្រកួតដូចគ្នា ប៉ុន្តែអ្វីៗត្រូវកាត់សេចក្តីត្រឹមនេះ ដ្បិតមានគម្លាតគ្រាប់បាល់ស៊ុតបញ្ចូលទីរបស់ហូឡើងលើសដល់ទៅ១១គ្រាប់។
អាល្លឺម៉ង់ដែលឈ្នះពានអឺរ៉ុបនេះ៣ដង (១៩៧២, ១៩៨០ និង១៩៩៦) បានបង្ហាញខ្លួនចំនួន១២ដងជាប់ៗគ្នារូចមកហើយ ចាប់តាំងពីឆ្នាំ១៩៧២មក ខណៈដែលពាន UEFA Euro កកើតឡើង១៥លើករួចមកហើយ ក្នុងឆ្នាំ១៩៦០។
ដោយឡែក ហ្វាំងឡង់ បានធ្វើឲ្យពិភពលោកភ្ញាក់ផ្អើល បន្ទាប់ពីពួកគេដណ្តើមបានកៅអីទៅកាន់វគ្គផ្តាច់ព្រ័ត្រពានរង្វាន់អឺរ៉ុបជាលើកដំបូងក្នុងប្រវត្តិសាស្ត្រ ក្រោយរយៈពេល ៥៩ឆ្នាំ នៃការកកើតពាននេះ។
ហ្វាំងឡង់ ទទួលបានចំណាត់ថ្នាក់ទី២ ពូល J ក្រោយប្រកួត៩លើកមាន១៨ពិន្ទុ នាំមុខក្រិកចំនួន៧ពិន្ទុ ខណៈការប្រកួតសល់មួយលើកប៉ុណ្ណោះ។ ក្នុងពូលនេះ អ៊ីតាលីនៅកំពូលតារាងមាន២៧ពិន្ទុ។
គិតត្រឹមពេល គេរកឃើញក្រុមចំនួន១៧ហើយ ដែលកក់កៅអីទៅកាន់ Euro 2020 ក្នុងនោះរួមមាន អង់គ្លេស ឆែក អ៊ុយក្រែន អេស្ប៉ាញ ស៊ុយអែត ប៉ូឡូញ បារាំង តួកគី បែលហ្ស៊ិក រុស្ស៊ី អ៊ីតាលី ហ្វាំងឡង់ ក្រូអាស៊ី ហូឡង់ អូទ្រីស អាល្លឺម៉ង់ និងម្ចាស់ជើងឯកព័រទុយហ្គាល់៕
© រក្សាសិទ្ធិដោយ thmeythmey.com