ជប៉ុនផ្តល់ទឹកប្រាក់ជិត២០ម៉ឺនដុល្លារ ដល់អង្គការក្រៅរាជរដ្ឋាភិបាលសម្រាប់បង្កើតកម្មវិធីអប់រំបរិស្ថាន

ជាតិ

សង្គមជាតិ

ជប៉ុនផ្តល់ទឹកប្រាក់ជិត២០ម៉ឺនដុល្លារ ដល់អង្គការក្រៅរាជរដ្ឋាភិបាលសម្រាប់បង្កើតកម្មវិធីអប់រំបរិស្ថាន

19, Nov 2019 , 7:19 am

រូបភាព

លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជា ចុះហត្ថលេខាផ្តល់ថវិកាដល់លោកស្រី អ៊ីវ៉ាម៉ា មីយ៉ូកុ នាយិកាអង្គការ Nature Center Risen កាលពីថ្ងៃទី១៨ ខែវិច្ឆិកា

ដោយ:

ភ្នំពេញ៖ ទឹកប្រាក់ជិត២០ម៉ឺនដុល្លារ ត្រូវបានរាជរដ្ឋាភិបាលជប៉ុន ផ្តល់ឲ្យអង្គការ Nature Center Risen សម្រាប់យកទៅអភិវឌ្ឍវិទ្យាសា្ថនគរុកោសល្យរាជធានីភ្នំពេញ និងប្រចាំខេត្តបាត់ដំបង បង្កើតជាកម្មវិធីអប់រំបរិស្ថាន។ លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជា និងលោកស្រី អ៊ីវ៉ាម៉ា មីយ៉ូកុ តំណាងអង្គការ Nature Center Risen បានចុះហត្ថលេខារួមគ្នា លើកិច្ចព្រមព្រៀងស្តីពីជំនួយឥតសំណងនេះ កាលពីថ្ងៃទី១៨ ខែវិច្ឆិកា។

លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំកម្ពុជា បានបញ្ជាក់ថា ថវិកាដែលជប៉ុនផ្តល់ទៅវិទ្យាស្ថានគរុកោសល្យរាជធានីភ្នំពេញ និងខេត្តបាត់ដំបងនោះ គឺសម្រាប់ឲ្យសាលាគរុកោសល្យទាំងពីរ អនុវត្តការអប់រំបរិស្ថានធម្មជាតិ។ លោកឯកអគ្គរាជទូតជប៉ុនប្រចាំកម្ពុជា សង្ឃឹមថាជំនួយឥតសំណងនេះ នឹងអាចជួយលើកកម្ពស់ការយល់ដឹងរបស់ប្រជាជនកម្ពុជា ក្នុងការអភិរក្សបរិស្ថាន និងអភិរក្សធម្មជាតិ។

លោកស្រី អ៊ីវ៉ាម៉ា មីយ៉ូកុ នាយិកាអង្គការ Nature Center Risen បាននិយាយថា អង្គការរបស់លោកស្រី នឹងយកថវិកានោះ សម្រាប់បង្កើតជាកម្មវិធីសិក្សា បោះពុម្ពជាសៀវភៅអប់រំបរិស្ថានសម្រាប់សិស្សបឋមសិក្សា និងមធ្យមសិក្សា និងបំពាក់សម្ភារសិក្សាប្រើប្រាស់ក្នុងការបង្រៀន។ ជាពិសេសសម្រាប់ផ្តល់ជាជំនួយក្នុងការបណ្តុះបណ្តាលគ្រូឧទ្ទេសទទួលបន្ទុកអប់រំបរិស្ថាន។

សូមបញ្ជាក់ថា មកដល់បច្ចុប្បន្ន រាជរដ្ឋាភិបាលជប៉ុនបានផ្តល់ថវិកាមកកម្ពុជាជាង៣៧លានដុល្លារហើយ សម្រាប់អនុវត្តគម្រោងចំនួន ១២១ ដែលផ្តោតសំខាន់លើការអប់រំនៅកម្រិតមូលដ្ឋាន វិស័យសុខាភិបាល វិស័យកសិកម្ម និងសកម្មភាពសំអាតមីននៅកម្ពុជា៕