បណ្តាំ«ទេពនាដវដ្តីឯក»សម្តេចរាជបុត្រី ព្រះរៀម នរោត្តម បុប្ផាទេវី

ជាតិ

សិល្បះ

បណ្តាំ«ទេពនាដវដ្តីឯក»សម្តេចរាជបុត្រី ព្រះរៀម នរោត្តម បុប្ផាទេវី

19, Nov 2019 , 6:29 am

រូបភាព

ដោយ: ថ្មីៗ

ពេញមួយព្រះជន្ម នៃសម្តេចរាជបុត្រី ព្រះរៀម នរោត្តម បុប្ផាទេវី ព្រះអង្គ ថែរក្សា ផ្សព្វផ្សាយលើកតម្កើងវិស័យវប្បធម៌ខ្មែរ ជាពិសេសរបាំព្រះរាជទ្រព្យ ឲ្យមានភាពរីកចម្រើនល្បីរន្ទឺ និងមានការទទួលស្គាល់លើសកលលោក។

ការបាត់បង់ សម្តេចរាជបុត្រី ព្រះរៀម នរោត្តម បុប្ផាទេវី គឺជាការបាត់បង់ដ៏ធំធេងបំផុត នៃមរតកមនុស្សរស់ ចំពោះប្រជាជាតិ និងប្រជាជនកម្ពុជា នូវតួអង្គដ៏សំខាន់ក្នុងវិស័យវប្បធម៌និងអរិយធម៌ជាតិខ្មែរ។ កាលពីថ្ងៃទី១ ខែសីហា ពោលគឺកាលពីជាងបីខែ មុនពេលដែលព្រះអង្គទ្រង់ព្រះសុគតក្នុងព្រះជន្ម៧៧ព្រះវស្សា ទេពនាដវដ្តីឯក បានដឹកនាំក្នុងពិធីសំពះគ្រូ ដើម្បីចងក្រងស្រាវជ្រាវថតទុកជាឯកសារផ្លូវការ នូវរបាំក្បាច់បុរាណខ្មែរ សម្រាប់ទុកជាមរតកអោយកូនចៅជំនាន់ក្រោយ និងបួងសួងរម្លឹកគុណថ្វាយសម្ដេច ព្រះមហាក្សត្រីយានី «ស៊ីសុវត្ថិ មុនីវង្ស កុសុមៈ នារីរតន៍ សេរីវឌ្ឍនា» ព្រះមាតាសិល្បៈ នៃរបាំព្រះរាជទ្រព្យ នៅមុខព្រះបរមចេតិយក្នុងព្រះបរមរាជវាំង។

នាពេលនោះ សម្តេចរាជបុត្រី ព្រះរៀម នរោត្តម បុប្ផាទេវី បានមានព្រះបណ្តាំជាច្រើនដល់កូនចៅជំនាន់ ឲ្យនាំគ្នាថែរក្សាការពារសិល្បៈបុរាណខ្មែរ ជាពិសេសរបាំព្រះរាជទ្រព្យ ដែលត្រូវបានចុះក្នុងបញ្ជីបេតិកភណ្ឌអរូបីយូណេស្កូ កាលពីឆ្នាំ២០០៣។ សម្តេចបានក្រើនរំលឹកដល់យុវជនទាំងអស់ ទាំងសិល្បករ សិល្បការិនី និងអ្នកដែលមិនមានអាជីពសិល្បៈ ឲ្យខិតរួមគ្នាដើម្បីថែរក្សា ការពាររបាំបុរាណឲ្យគង់វង្សទៅមុខទៀត៕