អចលនទ្រព្យ
អត្ថបទពាណិជ្ជកម្ម
ក្រសួងសាធារណការ៖ ការស្ថាបនាផ្លូវក្រវាត់ក្រុងទី៣ អាចបញ្ចប់មុនពេលកំណត់
× ផ្លូវក្រវាត់ក្រុងទី៣ ដែលត្រូវបានសាងសង់ដោយក្រុមហ៊ុនចិន ត្រូវបានរំពឹងថា នឹងបញ្ចប់មុនផែនការដែលបានគ្រោងទុក ខណៈពេលនេះ ការស្ថាបនាបានសម្រេចលទ្ធផលប្រមាណ ៤០ ភាគរយហើយ។
រាជរដ្ឋាភិបាលកម្ពុជា បានរំពឹងថាផ្លូវក្រវាត់ក្រុងទី៣នេះ នឹងបញ្ចប់មុនផែនការដែលបានគ្រោងទុក ដោយសារមានការជំរុញពីសំណាក់របស់រដ្ឋាភិបាល និងពីក្រសួងសាធារណការ និងដឹកជញ្ជូន ដោយធ្វើយ៉ាងណាធ្វើឱ្យបានលឿនតាមផែនការ ឬមុនផែនការ។ នេះបើតាមអ្នកនាំពាក្យក្រសួងសាធារណការ និងដឹកជញ្ជូន លោក គង់ វិមាន ថ្លែងប្រាប់សារព័ត៌មាននៅក្នុងស្រុក កាលពីពេលថ្មីៗនេះ។
លោកបានឱ្យដឹងបន្តថា គម្រោងផ្លូវក្រវាត់ក្រុងទី៣នេះ ត្រូវបានចំណាយថវិកាសរុបប្រមាណ ២៧៣ លានដុល្លារអាមេរិក ដែលជាហិរញ្ញប្បទានសម្បទានពីរដ្ឋាភិបាលចិន ហើយរាជរដ្ឋាភិបាលកម្ពុជា ចូលរួមថវិកាបដិភាគសម្រាប់ការដោះស្រាយផលប៉ះពាល់ ការបោសសម្អាតមីន និងយុទ្ធភ័ណ្ឌមិនទាន់ផ្ទុះ ពន្ធ និងសួយសារអាករ។ ការស្ថាបនា នឹងប្រើរយៈពេល ៤២ ខែ ដែលគ្រោងបញ្ចប់នៅខែធ្នូ ឆ្នាំ២០២១។
គួរបញ្ជាក់ផងដែរថា ផ្លូវក្រវាត់ក្រុងទី៣ ត្រូវបានបើកការដ្ឋានសាងសង់ នៅថ្ងៃទី១៤ ខែមករា ឆ្នាំ២០១៩ ក្រោមអធិបតីភាពសម្តេច ហ៊ុន សែន នាយករដ្ឋមន្ត្រីកម្ពុជា និងឯកអគ្គរដ្ឋ ទូតចិន ប្រចាំនៅកម្ពុជា។ ផ្លូវនេះ មានប្រវែងជាង ៥០ គីឡូម៉ែត្រ សាងសង់ឡើងក្នុងបំណងកាត់បន្ថយការកកស្ទះចរាចរណ៍ក្នុងទីក្រុង និងការធ្វើសមាហរណកម្មផ្ទៃក្នុង សម្រួលដល់ការធ្វើដំណើរ និងការដឹកជញ្ជូន និងអាចកាត់បន្ថយរយៈពេលក្នុងការធ្វើដំណើរផងដែរ៕
© រក្សាសិទ្ធិដោយ thmeythmey.com