កីឡាជាតិ
ជាតិ
×![]()
ភ្នំពេញ៖ កិត្តិនាម និងកិត្តិសព្ទដ៏ល្បីល្បាញនៅលើឆាកអន្តរជាតិបានធ្វើឲ្យវីរកីឡាការិនី កែ ឡេង ក្លាយជាមនុស្សម្នាក់ដ៏គួរឲ្យខ្លាចរអាក្នុងវិស័យកីឡាប៉េតង់ ដែលគូប្រកួតគ្រប់គ្នាមិនចង់ជួប។ ការវាយចំគោលដៅច្បាស់ៗ ជួយឲ្យកីឡាការិនីរូបនេះ ក្លាយជាចំណែកមួយមិនអាចខ្វះបាន ពេលប្រកួតលក្ខណៈអន្តរជាតិ ទោះបីមានវ័យរាងជ្រេបន្តិចក៏ដោយ។ ជាក់ស្តែង ម្ចាស់មេដាយមាស៣ជំនាន់រូបនេះ កំពុងប្រជែងក្នុងព្រឹត្តិការណ៍ 17th Juniors & Women Petanque World Championship នៅកម្ពុជា។
កីឡាការិនី អ៊ុន ស្រីយ៉ា ម្ចាស់ពាន Trophee L’Equipe ឆ្នាំ២០១៩ នៅប្រទេសបារាំង បានប្រៀបធៀបសមត្ថភាពរបស់វីរកីឡាការិនី កែ ឡេង ម្ចាស់មេដាយមាសពិភពលោក៣ជំនាន់ ទៅនឹងសត្វខ្លា។ ព្រោះនាងសង្កេតឃើញថា គូប្រកួតតែងតែមានការភ័យខ្លាច ពេលមានវត្តមានរបស់កីឡាការិនីរូបនេះ ក្នុងការប្រកួតម្តងៗ។ កត្តាដែលធ្វើឲ្យគូប្រកួតខ្លាចរអា គឺដោយសារសមត្ថភាពវាយ ចំគោលដៅច្បាស់ៗ និងដាំនៅនឹងមួយកន្លែង។
«បើនិយាយឲ្យអស់ទៅគាត់ (វីរកីឡាការិនី កែ ឡេង) ប្រៀបបានដូចខ្លា ព្រោះមេដាយមាស៣ជំនាន់មិនងាយនោះទេ គ្រាន់តែគេ (គូប្រកួត) ឃើញគាត់ចូលលេង គឺរអាតែម្តង ដោយសារប៊ូលគាត់ ឲ្យតែវាយចំគឺអុក (ដាំនៅនឹងមួយកន្លែង)។ យើងក៏ដូចគ្នា បើសិនឃើញគូប្រកួតមិនសូវចេះវាយ គឺមានអារម្មណ៍ធូរស្បើយ ពេលចូលប៊ូលមានអារម្មណ៍ធម្មតា មិនប្រឹង មិនភ័យ»។ កីឡាការិនី អ៊ុន ស្រីយ៉ា លើកឡើងដូច្នេះ ក្រោយយកឈ្នះក្រុមឡេតូនី ក្នុងលទ្ធផល ១៣-៣ នាការប្រកួតជើងឯកពិភពលោកស្ត្រី និងយុវជនប្រចាំឆ្នាំ២០១៩ នៅទីលានប៉េតង់ក្នុងពហុកីឡដ្ឋានជាតិ នៅថ្ងៃទី១៩ វិច្ឆិកា។
ជ័យជម្នះក្នុងជំនួបបើកឆាក លើវិញ្ញាសា៣នាក់ ទល់៣នាក់នេះ មានការរួមចំណែកយ៉ាងធំធេង ពីវីរកីឡាការិនី កែ ឡេង តាមរយៈការវាយច្បាស់ៗ ចំគោលដៅ ទៅលើគ្រាប់ប៊ូល ដែលចូលយ៉ាងល្អរបស់កីឡាការិនីឡេតូនី។ វាយដ៏អស្ចារ្យនេះ បានធ្វើឲ្យកីឡាការិនីទាំង៣រូប រួមជាមួយថ្នាក់ដឹកនាំកីឡារបស់ឡេតូនី គ្រវីក្បាល និងសរសើរ ពីសមត្ថភាពរបស់លោកស្រី។ សម្លេងទ្រហឹងអើងកង ពីអ្នកគាំទ្រ ក៏បានបន្លឺឡើងផងដែរ ក្រោយកីឡាការិនី កែ ឡេង វាយប៊ូលចំគោលដៅម្តងៗ។
កត្តាខាងលើ បានធ្វើឲ្យម្ចាស់មេដាយមាសពិភពលោក៣ជំនាន់ជាប់គ្នា លើវិញ្ញាសា វាយយកពិន្ទុរូបនេះ ក្លាយជាចំណែកមួយដែលមិនអាចខ្វះបាន ក្នុងក្រុមជម្រើសជាតិ ពេលប្រកួតតំណាងឲ្យជាតិនៅលើឆាកអន្តរជាតិម្តងៗ។ ជាក់ស្តែងនៅក្នុងការប្រកួតជាមួយក្រុមឡេតូនី កីឡាការិនី កែ ឡេង ដែលគ្រូបង្វឹក លោក សុខ ម៉ុង ដាក់ឲ្យអង្គុយកៅអីបម្រុងក្នុងសិតទី១ ដើម្បីទុកកម្លាំងប្រកួតលើវិញ្ញាសាវាយយកពិន្ទុ ត្រូវបានប្តូរចូលជំនួសកីឡាការិនី កែវ វណ្ណា នៅសិតទី២ ក្រោយឡេតូនីនាំមុខ ៣-០។
អ្វីដែលគួរឲ្យកត់សម្គាល់ ក្រោយការចូលលេងរបស់កីឡាការិនី កែ ឡេង ក្រុមប៉េតង់ឡេតូនី គ្មានពិន្ទុកើតឡើងឡើយ ដោយកម្ពុជា បានយកឈ្នះក្នុងលទ្ធផល ១៣-៣។ កត្តានេះហើយ ទើបធ្វើឲ្យកីឡាការិនី អ៊ុន ស្រីយ៉ា ប្រៀបធៀបសមត្ថភាពរបស់លោកស្រី កែ ឡេង ទៅនឹងសត្វខ្លា និងជាចំណែកមួយដែលមិនអាចខ្វះបាន។
ជ័យជម្នះ នៅក្នុងជំនួបបើកឆាកនេះធ្វើឲ្យកម្ពុជាមានរំពឹងខ្ពស់ក្នុងការឈានទៅវគ្គបន្តលើវិញ្ញាសា៣នាក់ទល់៣នាក់នារី។ មិនត្រឹមតែរួមចំណែកយ៉ាងធំធេងក្នុងវិញ្ញាសា៣នាក់ទល់៣នាក់នារីនោះទេ កីឡាការិនី កែ ឡេង ធ្វើបានយ៉ាងល្អក្នុងការប្រកួតវិញ្ញាសាវាយយកពិន្ទុ ដែលជាវិញ្ញាសាសក្តានុពលរបស់ខ្លួន គឺលោកស្រីឈរលំដាប់លេខ១ក្នុងចំណោមកីឡាការិនី៤២រូបក្រោយធ្វើបាន៣៨ពិន្ទុ។
គួររំលឹកថា ការប្រកួតប៉េតង់ជ្រើសរើសជើងឯកពិភពលោក 17th Juniors & Women Petanque World Championship ដែលកម្ពុជាធ្វើម្ចាស់ផ្ទះមាន៤៩ប្រទេសចូលរួម។ ការប្រកួតដែលប្រព្រឹត្តទៅចាប់ពីថ្ងៃទី១៩-២៣ ខែវិច្ឆិកា មួយនេះបានបើកការប្រកួតជាផ្លូវការនៅរសៀលថ្ងៃទី១៩ វិច្ឆិកា ក្រោមវត្តមានថ្នាក់ដឹកនាំ កីឡាករកីឡាការិនី និងអ្នកគាំទ្រជាតិនិងអន្តរជាតិយ៉ាងច្រើនកុះករ៕
Tag:
ប៉េតង់
អ៊ុន ស្រីយ៉ា
កែ ឡេង
Juniors & Women Petanque World Championship
© រក្សាសិទ្ធិដោយ thmeythmey.com
