ព្រះសពព្រះរៀម បុប្ផាទេវី «ទេពនាដវដ្តីឯក» នឹងត្រូវបូជា នៅថ្ងៃទី២៥ វិច្ឆិកា

ជាតិ

ព្រះសពព្រះរៀម បុប្ផាទេវី «ទេពនាដវដ្តីឯក» នឹងត្រូវបូជា នៅថ្ងៃទី២៥ វិច្ឆិកា

20, Nov 2019 , 3:13 pm

រូបភាព

រូបថត៖ ព្រះករុណា ព្រះបាទ ព្រះបរមនាថ នរោត្តម សីហមុនី និងសម្តេចម៉ែ នរោត្តម មុនិនាថ សីហនុ យាងគោរពព្រះវិញ្ញាណក្ខន្ធសម្ដេចព្រះរៀម នរោត្តម បុប្ផាទេវី នៅថ្ងៃទី២០ វិច្ឆិកា ឆ្នាំ២០១៩

ដោយ: ថ្មីៗ

ភ្នំពេញ៖ ព្រះសពសម្ដេចរាជបុត្រីព្រះរៀម នរោត្តម បុប្ផាទេវី «ទេពនាដវដ្តីឯក» នឹងត្រូវបូជា នៅថ្ងៃទី២៥ វិច្ឆិកា។ នេះបើតាមគណៈកម្មាធិការជាតិរៀបចំបុណ្យជាតិ-អន្តរជាតិ ដែលរៀបចំពិធីថ្វាយព្រះកុសល ព្រះវិញ្ញាណក្ខន្ធព្រះសពទ្រង់ ចាប់ពីថ្ងៃទី១៩ រហូតដល់ថ្ងៃទី២៥ វិច្ឆិកា ឆ្នាំ២០១៩។

ព្រះសពសម្តេចរាជបុត្រី ព្រះរៀម នរោត្តម បុប្ផាទេវី ដែលជាឧត្តមប្រឹក្សាផ្ទាល់ព្រះមហាក្សត្រ និងជាសមាជិកាក្រុមប្រឹក្សាធម្មនុញ្ញា ត្រូវបានតម្កល់នៅវត្តបុទុមវតី កាលពីថ្ងៃទី១៩ ខែវិច្ឆិកា ។ សម្រាប់កម្មវិធីថ្វាយព្រះកុសល ព្រះវិញ្ញាណក្ខន្ធព្រះសពព្រះរៀម បុប្ផាទេវី «ទេពនាដវដ្តីឯក» ចាប់ពីថ្ងៃទី២០ ដល់ ២៤ វិច្ឆិកានេះ គឺគណៈកម្មាធិការរៀបចំបុណ្យ និមន្តព្រះសង្ឃ៧អង្គទទួលយាគូ នៅម៉ោង ៦ព្រឹក ។ ដោយឡែកពិធីគោរពព្រះវិញ្ញាណក្ខន្ធវិញ នឹងត្រូវប្រារព្វធ្វើរៀងរាល់ម៉ោង៨ព្រឹក និងម៉ោង២រសៀល។ ចំណែកម៉ោង១០៖៣០ព្រឹក និងម៉ោង៥ល្ងាច មានការនិមន្តព្រះសង្ឃ៧អង្គទាំងពីរគណៈ នមស្សការព្រះរតនត្រ័យសមាទានសីល ,មតកភត្ត និងស្វាធ្យាយព្រះបរិត្ត ព្រមទាំងមានការសម្តែងព្រះធម្មទេសនាទៀតផង។

លុះដល់ម៉ោង៨យប់នៃពិធីថ្វាយព្រះកុសលព្រះវិញ្ញាណក្ខន្ធព្រះសពសម្តេចរាជបុត្រី ព្រះរៀម នរោត្តម បុប្ផាទេវី មាននិមន្តព្រះសង្ឃ៨អង្គ ស្វាធ្យាយព្រះអភិធម្មបែបស្មូត និងភ្លេងពិណពាទ្យប្រគំកំដរទល់ភ្លឺ កងកិតិ្តយសឈរអមមញ្ជូសាជាអន្ត្រៃយ៍។ នេះបើតាមកម្មវិធីរបស់គណៈកម្មាធិការរៀបចំបុណ្យជាតិ និងអន្តរជាតិ។

ពិធីថ្វាយព្រះកុសលព្រះវិញ្ញាណក្ខន្ធព្រះសពសម្តេចរាជបុត្រី ព្រះរៀម នរោត្តម បុប្ផាទេវី នឹងត្រូវបញ្ចប់នៅព្រឹកថ្ងៃទី២៥ វិច្ឆិកា។ ថ្ងៃបញ្ចប់កម្មវិធីនេះ នឹងមានពិធីសាសនា ពិធីខមាទោស ព្រះសពជាលើកចុងក្រោយ ដោយបុត្រា-បុត្រី រួមទាំងនិមន្តសម្តេចព្រះសង្ឃរាជទាំងពីរគណៈ សម្តេចព្រះសង្ឃនិងព្រះរាជាគណៈចំនួន១០ព្រះអង្គ ស្វាធ្យាយព្រះសត្តប្បករណាភិធម៌ នៅម៉ោង៦ ព្រឹក។ ដោយឡែកម៉ោងជាង៧ព្រឹក ព្រះសព នឹងត្រូវរំកិលឡើងលើទីនាំងរថយន្តបុស្បុក(កងកិតិ្តយសថ្វាយព្រះវន្ទនកិច្ច និងភ្លេងក្លងខែកប្រគំ) ដោយដង្ហែចេញពីសាលាព្រះធម្មសភា ឆ្ពោះទៅកាន់និងឡើងព្រះមេរុមុខវត្តបទុមវតី ដើម្បីធ្វើពិធីបូជាព្រះសព «ទេពនាដវដ្តីឯក» នៅម៉ោង៨ព្រឹក៕