ជាតិ
សេដ្ឋកិច្ច
សម្តេច ហ៊ុន សែន៖ ត្រូវព្យាយាមកែប្រែទម្លាប់ ទើបទឹកដោះគោខ្មែរ មានអ្នកទិញ
×![]()
ដោយ: ថ្មីៗ
«ទឹកដោះគោ ១ថ្ងៃផលិតដល់ទៅ៨០០លីត្រ ប៉ុន្តែអត់មានអ្នកទិញ»។ បើតាមសម្តេច ហ៊ុន សែន នេះជាបញ្ហាដែលក្រុមអ្នកស្រាវជ្រាវត្រូវគិតគូរ ជាពិសេសការព្យាយាមកែប្រែទម្លាប់របស់ពលរដ្ឋខ្មែរ។ ប្រមុខរដ្ឋាភិបាល បានលើកឡើងយ៉ាងដូច្នេះ នាពិធីសម្ពោធ «អគារឥន្ទ្រទេវី» របស់រាជបណ្ឌិត្យសភាកម្ពុជា នៅព្រឹកថ្ងៃព្រហស្បតិ៍ ទី២១ ខែវិច្ឆិកា។
សម្តេច ហ៊ុន សែន បានលើកឡើងថា ការស្រាវជ្រាវ និងការផ្សារភ្ជាប់គ្នាដើម្បីអនុវត្ត ត្រូវស្ថិតនៅជាមួយគ្នា មិនអាចដាច់ដោយឡែកពីគ្នានោះឡើយ។ ក្រៅពីករណីទឹកដោះគោដែលផលិតដោយរាជបណ្ឌិត្យសភានៅឧទ្យានតេជោសែន ឫស្សីត្រឹប ខេត្តព្រះវិហារ សម្តេចបានរំលឹកក្រុមអ្នកស្រាវជ្រាវថា ពួកគេគប្បីត្រូវព្យាយាមកែប្រែទម្លាប់របស់អ្នកប្រើប្រាស់ ដូចជាម៉ូដែលរថយន្តជាដើម។
សម្តេចបានលើកឧទាហរណ៍ពីរ ទាក់ទងលោក តាំង សារឹម អតីតរដ្ឋមន្ត្រីពាណិជ្ជកម្ម ដែលបាននាំយកវិទ្យុ ទូរទស្សន៍ ពីអតីតសហភាពសូវៀត មកលក់នៅខ្មែរ ប៉ុន្តែលក់មិនដាច់។ សម្តេចបានប្រៀបធៀបថា ពិតជាពិបាកកែប្រែទម្លាប់ខ្លាំងណាស់ ដូចជាការចូលចិត្តប្រើតែនាឡិកាស្វីស ថ្នាំពេទ្យបារាំង និងវិទ្យុ ទូរទស្សន៍ជាដើម។
ការកែប្រែទម្លាប់នេះ ទាមទារឲ្យក្រុមអ្នកស្រាវជ្រាវ ផ្សព្វផ្សាយឲ្យបានទូលំទូលាយដល់ប្រជាជន។ សម្តេចបានលើកឡើងថា បច្ចុប្បន្ន គ្រប់ស្ថាប័នទាំងអស់មានផ្នែកស្រាវជ្រាវ ក្នុងនោះមានផ្នែកស្រាវជ្រាវថ្នាក់ជាតិ ពោលគឺឧត្តមក្រុមប្រឹក្សាសេដ្ឋកិច្ចជាតិជាដើម។
សម្តេច ហ៊ុន សែន ក៏បានបញ្ជាក់ផងដែរថា សម្តេចជាមនុស្សម្នាក់ដែលចូលចិត្តស្រាវជ្រាវ។ កន្លងមក ក្រៅពីតំណែងនាយករដ្ឋមន្ត្រី សម្តេចក៏ដើរតួនាទីជាជំនួយការ ក្នុងការស្រាវជ្រាវសម្រាប់សម្តេច ហេង សំរិន និងសម្តេច ជា ស៊ីម ផងដែរ៕
Tag:
ស្រាវជ្រាវ
ទឹកដោះគោ
© រក្សាសិទ្ធិដោយ thmeythmey.com
