សៀមរាប៖ ស្ទឹងសៀមរាប ជាសរសៃឈាមដ៏សំខាន់របស់ខេត្តសៀមរាប។ ជាស្ទឹងប្រវត្តិសាស្ដ្រ ស្ទឹងនេះមានប្រភពទឹកចេញពីភ្នំគូលែន ហូរកាត់កណ្ដាលក្រុងសៀមរាប ឆ្ពោះទៅទន្លេសាប។ បច្ចុប្បន្ន ផ្នែកខាងក្រោមនៃស្ទឹងនេះ គ្របដណ្ដប់ដោយសំរាមចម្រុះ ពិសេសសំរាមប្លាស្ទិក។ អាជ្ញាធរសង្កាត់សៀមរាបដែលមានសមត្ថកិច្ចគ្រប់គ្រងស្ទឹងនេះនៅផ្នែកខាងក្រោម បានធ្វើកម្មវិធីសម្អាតបរិស្ថាន ដោយបានបារសំរាមចេញពីស្ទឹងនេះបំណងឱ្យមានសោភ័ណភាពឡើងវិញ។ ចៅសង្កាត់សៀមរាបបេ្ដជ្ញាថា នឹងរៀបចំបរិស្ថានក្នុងស្ទឹងសៀមរាបមិនឲ្យមានសំរាមតទៅទៀត។
ព័ត៌មានពិស្ដារ សូមស្ដាប់បទយកការណ៍ដែលរៀបរៀងដោយអ្នកនាង អ៊ីសា រ៉ហានី ពីខេត្តសៀមរាបដូចតទៅ៖
សំរាមបានក្លាយជាបញ្ហាស្មុគស្មាញនៅលើសាកលលោក ពិសេសសំរាមប្លាស្ទិកដែលកំពុងបំផ្លាញសុខភាពមនុស្ស និងប្រព័ន្ធជីវចម្រុះ។ ការអភិវឌ្ឍបានបង្កើតនូវសម្ភារប្រើប្រាស់ទំនើបៗ មានភាពងាយស្រួល ពិសេសការផលិតសម្ភាសពីប្លាស្ទិក ហើយកាកសំណល់ទាំងនោះ ត្រូវប្រើពេលរាប់រយឆ្នាំដើម្បីរលាយភពផែនដី។
សម្រាប់ប្រជាពលរដ្ឋរស់នៅខេត្តសៀមរាប បានចាត់ទុកទឹកដែលមានប្រភពពីភ្នំគូលែនថាទឹកដ៏ពិសិដ្ឋ។ យ៉ាងណា ក៏បំពុលដោយសារសំរាម បានធ្វើឱ្យទឹកស្ទឹងមានភាពកខ្វក់ និងមានក្លិនមិនល្អ។ បញ្ហានេះ បានបង្កើតជាមេរោគដល់ប្រជាពលរដ្ឋដែលកំពុងរស់នៅតំបន់ទាំងនោះ និងដែលកំពុងប្រើប្រាស់ទឹកស្ទឹង។
ដោយមើលឃើញបញ្ហានេះ ចៅសង្កាត់សៀមរាប ក្នុងក្រុងសៀមរាប ដោយមានកិច្ចសហការជាមួយអង្គការទំពាំងស្នងឫស្សី បានរៀបចំកម្មវិធីសម្អាតបរិស្ថាន ដោយការប្រើទូកចុះបារសម្អាត។ ចៅសង្កាត់សៀមរាប លោក ម៉ៃ សាម៉េត បានឱ្យដឹងថា យុទ្ធនាការសម្អាតបរិស្ថានដែលរៀបចំនៅថ្ងៃទី៧ វិច្ឆិកា ដើម្បីរួមចំណែកជាមួយរដ្ឋបាលខេត្តក្នុងការធ្វើឱ្យខេត្តទេសចរណ៍នេះមានសោភ័ណភាពស្អាត។ ការសម្អាតនេះ គឺប្រើទូកចំនួន១៥គ្រឿង និងមានអ្នកចូលរួមជាង១០០នាក់ ដោយកំណត់ព្រំប្រទល់សង្កាត់ចាប់ពីស្ពានក្រវ៉ាត់ក្រុង ចុះបារសម្អាតសំរាមពីក្នុងទឹក និងតាមដងស្ទឹង រហូតដល់ព្រំប្រទល់សង្កាត់នៅផ្នែកខាងក្រោម។
សំរាមដែលត្រូវបានបារចេញពីស្ទឹងនៅពេលនោះមានច្រើនប្រភេទ មានសំរាមធម្មជាតិ ដូចជាកំប្លោក ស្លឹកឈើ និងប្លាស្ទិក។ ប្លាស្ទិកមានចំនួនច្រើនជាងគេដែលអណ្ដែតសក្បុសលើផ្ទៃទឹក។ អាជ្ញាធរបានញែកសំរាមទាំងនោះដាច់ដោយឡែកដើម្បីងាយគ្រប់គ្រង ដោយសំរាមប្លាស្ទិកអាជ្ញាធរទុកដោយឡែកសម្រាប់យកទៅកែច្នៃ ឯសំរាមធម្មជាតិគេទុកឱ្យវារលាយឬធ្វើជី។
យុទ្ធនាការសម្អាតសំរាមនៅក្នុងស្ទឹងសៀមរាប ទទួលបានលទ្ធផលគួរឱ្យកត់សម្គាល់ ក្នុងនោះទីតាំងធំៗដែលកកស្ទះដោយសំរាម ត្រូវបានបារឬដួសចេញពីទឹក បង្កើតមាត់ទឹកធ្វើឱ្យមានចរន្តលំហូរឡើងវិញ។ លោក ម៉ៃ សាម៉េត បានបង្ហាញអារម្មណ៍រីករាយ និងតាំងចិត្តខ្ពស់លើបញ្ហាដ៏រសើបនេះ។ លោកបានប្ដេជ្ញាថា នឹងបន្តធ្វើសកម្មភាពនានា សំដៅធ្វើយ៉ាងណាសង្គ្រោះស្ទឹងសៀមរាបមិនឱ្យមានសំរាមនាពេលឆាប់ខាងមុខ។
ប្រធានអង្គការទំពាំងស្នងឫស្សី លោក ស៊ា សុផល ដែលបានធ្វើកិច្ចការជាច្រើនទាក់ទងនឹងបឹងទន្លេសាបពន្យល់ថា ស្ទឹងសៀមរាបកំពុងប្រឈមនឹងបញ្ហាធ្ងន់ធ្ងរដែលបណ្ដាលមកពីការបំពុលដោយសំរាមប្លាស្ទិក។ គម្រោងរបស់លោក គឺផ្តោតយកចិត្តទុកដាក់សំខាន់លើទឹកទន្លេសាប ហើយស្ទឹងសៀមរាបក៏ជាប្រភពទឹកដែលហូរចូលទៅបឹងដ៏ធំរបស់កម្ពុជានេះដែរ។ លោកពន្យល់យ៉ាងដូច្នេះថា៖«...សំរាមដែលច្រើនបំផុតហូរចាក់ទៅបឹងទន្លេសាប មិនមែនសំរាមកើតនៅទន្លេសាបទេ គឺកើតពីលើមក ចឹងមានន័យថាគឺស្ទឹង ស្ទឹងសៀមរាបគឺហូរចាក់ទៅទន្លេសាប បើយើងមិនប្រមូលនៅពេលនេះទេ ចុងក្រោយវានឹងហូរាក់ទៅក្នុងទន្លេសាប...នឹងវាបំផ្លាញប្រព័ន្ធជីវចម្រុះមានត្រី សត្វ និងប្រជាសហគមន៍នេសាទ»។
«អ្នកប្រយុទ្ធដើម្បីបរិស្ថាន» គឺជាពាក្យដែលលោក សុផល ដាក់ឱ្យអ្នកចូលរួមសម្អាតបរិស្ថាននៅក្នុងយុទ្ធនាការសម្អាតបរិស្ថានសង្កាត់សៀមរាប ។ សំរាមដែលប្រមូលពេលនោះមាន៣ប្រភេទ គឺមានប្រភេទសិរីរាង្គ សំរាមអេតចាយ និងសំរាមប្លាស្ទិក ហើយសំរាមប្លាស្ទិកគឺជាអ្វីដែលយុទ្ធនាការនៅពេលនោះផ្តោតសំខាន់។
ក្នុងគម្រោងសម្អាតបរិស្ថាននៅក្នុងបឹងទន្លេសាប អង្គការទំពាំងស្នងឫស្សីរបស់លោក ស៊ា សុផល បានធ្វើការជាច្រើនដូចជាយុទ្ធនាការសម្អាតទឹកទន្លេសាបក្នុងមួយឆ្នាំ២ដង គឺយុទ្ធនាការរដូវទឹកសម្រក និងរដូវទឹកឡើង។ យុទ្ធនាការនេះមានអ្នកចូលរួមច្រើន ដើម្បីបំផុសចលនាឲ្យប្រជាសហគមន៍នេសាទទាំងអស់ឱ្យមានរបៀបរស់នៅ និងយល់ពីការបំពុលប្រព័ន្ធជីវចម្រុះដែលជាធនធានសំខាន់សម្រាប់សហគមន៍នៅទីនោះ។
ក្រុមប្រជាពលរដ្ឋដែលមានកាន់ដង ទំពក់ ចាប់យកសំរាម ខ្លះប្រើសំណាញ់អូស បានបង្ហាញនូវស្មារតីចូលរួមក្នុងបុព្វហេតុឱ្យទឹកស្ទឹងសៀមរាបមានសោភ័ណល្អឡើងវិញ។ ចៅសង្កាត់សៀមរាប លោក ម៉ៃ សាម៉េត ប្រាប់ថាពលរដ្ឋបានបញ្ចេញនូវកម្លាំងពលកម្មខ្លាំង ដើម្បីប្រយុទ្ធនឹងសំរាមដែលជាកាកសំណល់កខ្វក់ និងដែលត្រូវប្រជាពលរដ្ឋមួយចំនួនខ្វះការយល់ដឹងយកមកទម្លាក់ចោល។ លោក សាម៉េត ថា យុទ្ធនាការនេះ ជាសារទៅដល់ពលរដ្ឋទាំងនោះឱ្យភ្ញាក់រឭកឡើងវិញ ឈប់ចោលសំរាមក្នុងស្ទឹង និងមានទម្លាប់ល្អក្នុងការវេចខ្ចប់សំរាម បង្កភាពងាយស្រួលដល់ការដឹកជញ្ជូនចេញពីទីក្រុង។ ការបន្តធ្វើអាកប្បកិរិយាមិនសមរម្យរបស់ពលរដ្ឋទាំងនោះ នឹងជះឥទ្ធិពលអាក្រក់ទៅពួកគេវិញ ដូចជាបង្កជាមេរោគឬជំងឺផ្សេងៗដល់ពលរដ្ឋដែលរស់នៅតំបន់ក្បែរស្ទឹង ឬកំពុងប្រើប្រាស់ទឹកស្ទឹងនេះជាដើម៕