អន្តរជាតិ
លោកស្រីស៊ូជី នឹងឡើងទៅតតាំងរឿងក្តីនៅតុលាការយុត្តិធម៌អន្តរជាតិ ជាមួយប្រទេសហ្គំប៊ី លោកស្រីអ៊ុងសាន ស៊ូជី ទីប្រឹក្សារដ្ឋ និងរដ្ឋមន្រ្តីក្រសួងការបរទេសមីយ៉ាន់ម៉ានៅក្នុងកិច្ចប្រជុំអាស៊ានបូក៣ នាទីក្រុងបាងកក ប្រទេសថៃ, រូបភាព៖ Reuters
× បើសិនគ្មានអ្វីប្រែប្រួលទេ លោកស្រីអ៊ុនស៊ាន ស៊ូជី នឹងឡើងទៅតតាំងរឿងក្តីទាក់ទងបញ្ហារ៉ូហ៊ីងយ៉ា ជាមួយប្រទេសហ្គំប៊ី នៅតុលាការយុត្តិធម៌អន្តរជាតិ នាទីក្រុងឡាអេ ប្រទេសហូឡង់ នៅខែធ្នូខាងមុខ។ នេះបើតាមការលើកឡើងរបស់មន្ត្រីរដ្ឋាភិបាលមីយ៉ាន់ម៉ានៅថ្ងៃទី២០ ខែវិច្ឆិកា។
ជាប្រទេសតូចនៅមួយក្នុងទ្វីបអាហ្វ្រិកភាគខាងលិច ហ្គំប៊ី ដែលតំណាងឲ្យក្រុមប្រទេសកិច្ចសហប្រតិបត្តិការអ៊ីស្លាមទាំង ៥៧ប្រទេស បានដាក់ពាក្យប្តឹងមីយ៉ាន់ម៉ាទៅតុលាការយុត្តិធម៌អន្តរជាតិ នាថ្ងៃទី១១ ខែវិច្ឆិកាទៅតុលាការយុត្តធម៌អន្តរជាតិ ទាក់ទិនទៅនឹងបញ្ហារ៉ូហ៊ីងយ៉ា។
ពាក់ព័ន្ធទៅនឹងបញ្ហានេះ លោកស្រី ស៊ូជី ទីប្រឹក្សារដ្ឋ និងជារដ្ឋមន្ត្រីក្រសួងការបរទេស នឹងដឹកនាំក្រុមទៅតុលាការយុត្តិធម៌អន្តរជាតិ នាទីក្រុងឡាអេ ប្រទេសហូឡង់ ដើម្បីការពារផលប្រយោជន៍ជាតិ។ ចំណែកមេធាវីវិញ មីយ៉ាន់ម៉ាក៏បានត្រៀមរួចរាល់ដែរ សម្រាប់តតាំងជាមួយប្រទេសហ្គំប៊ី ។ នេះបើតាមសរសេរនៅលើបណ្តាញសង្គម Facebook របស់មន្ត្រីក្រសួងទីប្រឹក្សារដ្ឋមីយ៉ានម៉ា។
ជាមួយគ្នានេះដែរ បើតាមអ្នកនាំពាក្យយោធា ឧត្តមសេនីយ៍ត្រី Zaw Min Tun បានប្រាប់ទីភ្នាក់ងារព័ត៌មាន Reuters ថា យោធាមីយ៉ាន់ម៉ា នឹងសហការជាមួយរដ្ឋាភិបាល និងធ្វើតាមការបង្ហាញពីសំណាក់រដ្ឋាភិបាល។ ក្នុងន័យនេះ ក្រុមយោធា នឹងសាមគ្គីជាមួយរដ្ឋាភិបាលទីក្រុងណៃពិដោ ដើម្បីតតាំងជាមួយហ្គំប៊ីនៅតុលាការយុត្តិធម៌អន្តរជាតិ។
បើតាមពាក្យបណ្តឹង ដែលបានដាក់ទៅតុលាការទីក្រុងឡាអេ នាថ្ងៃទី១១ វិច្ឆិកា ហ្គំប៊ី បានស្នើឲ្យតុលាការយុត្តិការធម៌អន្តរជាតិ បញ្ជាឲ្យមីយ៉ាន់ម៉ាទម្លាក់ចោលការប្រព្រឹត្តអំពើប្រល័យពូជសាសន៍ ការដាក់ទណ្ឌកម្មលើឧក្រិដ្ឋជនប្រល័យពូជសាសន៍ និងធ្វើមាតុភូមិនិវត្តន៍ជនជាតិរ៉ូហ៊ីងយ៉ា ត្រលប់មកស្រុកកំណើតវិញ។ ជាពិសេស តុលាការ ដែលមានមូលដ្ឋាននៅទីក្រុងឡាអេមួយនេះ នឹងបើកអង្គសវនការ តាមសំណើប្រទេសហ្គំប៊ី នៅក្នុងខែធ្នូខាងមុខ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
សូមបញ្ជាក់ថា ក្រៅពីពាក្យបណ្តឹងនៅតុលាការយុត្តិធម៌អន្តរជាតិ មីយ៉ាន់ម៉ា បានរងសម្ពាធតាមផ្លូវច្បាប់ពីអន្តរជាតិ ពីរបន្ថែមទៀត។ ក្នុងនោះមានដូចជា ក្រុមសិទ្ធិមនុស្សដាក់ពាក្យប្តឹងលោកស្រីអ៊ុងសាន ស៊ូជី និងក្រុមយោធាមីយ៉ាន់ម៉ា នៅប្រទេសអាហ្សង់ទីនក្រោម«យុត្តិការសកល» និងចុងក្រោយគឺ តុលាការឧក្រិដ្ឋកម្មអន្តរជាតិចេញសេចក្តីសម្រេច បើកការស៊ើបអង្កេតពេញលេញជុំវិញសំណុំរឿងរ៉ូហ៊ីងយ៉ា៕
Tag:
មីយ៉ាន់ម៉ា
អ៊ុងសាន ស៊ូជី
© រក្សាសិទ្ធិដោយ thmeythmey.com