ក្រុមប៉េតង់នារីកម្ពុជាទី១ វាយបកយកឈ្នះបារាំង ១០-៨ ដើម្បីឡើងទៅវគ្គ១/៨

កីឡាជាតិ

ជាតិ

ក្រុមប៉េតង់នារីកម្ពុជាទី១ វាយបកយកឈ្នះបារាំង ១០-៨ ដើម្បីឡើងទៅវគ្គ១/៨

21, Nov 2019 , 5:15 pm

រូបភាព

ដោយ:

ក្រុមកីឡាការិនីប៉េតង់ទី១របស់កម្ពុជាបានឈ្នះកៅអីឡើងទៅវគ្គ១៦ក្រុមចុងក្រោយ(១/៨)នៃព្រឹត្តិការណ៍ប្រកួតជើងឯកពិភពលោកយុវជននិងស្ត្រីនៅកម្ពុជា ក្រោយវាយបកយកឈ្នះបារាំងក្នុងការប្រកួតជុំទី៥នៅរសៀលថ្ងៃទី២១ វិច្ឆិកា ឆ្នាំ២០១៩នេះ។ ក្រុមនារីកម្ពុជាទី២ និងយុវជនទី២ ក៏ទទួលបានកៅអីឡើងប្រកួតនៅវគ្គនេះផងដែរ។

ក្រុមកីឡាការិនីប៉េតង់ទី១ដែលមានកីឡាការិនី កែ ឡេង, អ៊ុក ស្រីមុំ, អ៊ុន ស្រីយ៉ា និង កែវ សុវណ្ណា បានវាយបកយកឈ្នះបារាំងក្នុងលទ្ធផល ១០-៨ ក្រោយដល់ម៉ោងកំណត់១ម៉ោង។ ជ័យជន្នះនេះ ជួយឲ្យក្រុមកីឡាការិនីប៉េតង់ទី១ ក្លាយជាក្រុមទី៣របស់កម្ពុជា ដែលទទួលបានកៅអីឡើងទៅវគ្គ១៦ក្រុមចុងក្រោយនៃព្រឹត្តិការណ៍ប្រកួតជើងឯកពិភពលោក Junior & Women Petanque World Championship ដែលកម្ពុជាធ្វើជាម្ចាស់ផ្ទះ។

ក្រុមនារីទី១កម្ពុជាធ្វើបានយ៉ាងល្អដោយបានយកឈ្នះក្រុមឡេតូនីក្នុងលទ្ធផល ១៣-៣ នៅជុំទី១, ឈ្នះមីយ៉ាន់ម៉ា ១៣-៤, ឈ្នះទុយនីស៊ី ១៣-៦ តែចាញ់ថៃ ១២-៧។ នៅក្នុងវគ្គ១៦ក្រុមចុងក្រោយនេះ ក្រុមនារីទី១កម្ពុជាអាចជួបជាមួយអ៊ីតាលី ឬហ្វាំងឡង់ ។

ក្រុមនារីកម្ពុជាទី២ដែលមានកីឡាការិនី ស្រ៊ាង សុរ៉ាឃីម, ឃួន យ៉ារី, ដួង ឌីណា និង វង ចន្ថា ក៏ទទួលបានកៅអីឡើងទៅវគ្គ៨ក្រុមចុងក្រោយផងដែរ បន្ទាប់ពីយកឈ្នះតួកគី ១៣-១ ក្នុងជំនួបបើកឆាក ក្រោយវាយបកយកឈ្នះម៉ាដាហ្គាស្កា ១៣-១២, ឈ្នះឡាវ ១៣-២, ឈ្នះអេស្ប៉ាញ ១៣-៣ និងឈ្នះម៉ាឡេស៊ី ១០-៩។ ក្រុមនារីទី២កម្ពុជាអាចប៉ះជាមួយញូកាឡេដូនៀ ឬចិន។

ជាមួយគ្នានេះក្រុមយុវជនទី២ដែលមានកីឡាករ ឃួន លីហ៊, ភាព វ៉ាឃីម, កុយ សុភ័ក្ត្រា និង គង់ កែវសុខាន់ ក៏ឡើងទៅវគ្គ១/៨ដែរ ក្រោយយកឈ្នះក្រុមឡេតូនី ១៣-០, ឈ្នះស្វីស ១៣-១០, ឈ្នះអេស្ប៉ាញ ១០-៧ និងឈ្នះឡាវ ៩-៨ តែចាញ់ថៃ ១៣-១១។ ក្រុមយុវជនកម្ពុជាត្រូវប្រជែងជាមួយក្រុមមកពីសាធារណរដ្ឋឆែក។

ក្រៅពីក្រុមទាំងបីកីឡាការិនី កែ ឡេង និងយុវជន ឃួន លីហ៊ ក៏បានឈ្នះកៅអីឡើងទៅវគ្គ៨នាក់ចុងក្រោយលើវិញ្ញាសាវាយយកពិន្ទុផងដែរ។ កីឡាការិនី កែ ឡេង ត្រូវប្រជែងជាមួយកីឡាការិនីន័រវែស Homnaim Ranu, Bivilak Thepphakan របស់ឡាវ, Khin Cherry Thet របស់មីយ៉ាន់ម៉ា, Streel Laura របស់បែលហ្ស៊ិក, Fueangsanit Nantawan របស់ថៃ, Wang Yon Jin របស់ចិន និងកីឡាការិនីកាណាដា Bergeron Maryse។

ចំណែកយុវជនមកពីខេត្តតាកែវត្រូវប្រជែងជាមួយកីឡាករ Rakotoarivelina Larot របស់ម៉ាដាហ្គាស្កា, Buche Jean Philippe មកពីម៉ូណាកូ, Caporgno Davide មកពីអ៊ីតាលី, Kallionpaa Sebastain មកពីស៊ុយអែត, Rinkeaw Peempod មកពីថៃ, Casale Joe មកពីបារាំង និង Justin Neu មកពីអាល្លឺម៉ង់៕