ពីនេះ ពីនោះ
ដើម្បីដាំសណ្ដែកកួរលូតលាស់ល្អ តើកសិករគួរធ្វើដូចម្ដេច?
× ភ្នំពេញ៖ ដំណាំសណ្ដែកកួរ ជាដំណាំដែលមានការពេញនិយមបរិភោគ និងមានទីផ្សារ។ ដើម្បីដាំដំណាំសណ្ដែកកួរ ទទួលបានទិន្នផលល្អ កសិករក៏ត្រូវដឹងពីវិធីសាស្ត្រខ្លះៗ ដូចជាការជ្រើសរើសពូជ និងសម្អាតគ្រាប់សម្រាប់ដាំ ការរៀបចំដី និងការធ្វើរងដាំ រួមទាំងការថែទាំជាដើម។
ក្នុងការជ្រើសរើសពូជសម្រាប់សណ្ដែកកួរ កសិករគួររកទិញសណ្ដែកពូជក្បាលកោះ។ ក្នុងនោះ មុនពេលដាំ កសិករគួរយកគ្រាប់ពូជសណ្ដែកទាំងនោះទៅហាលថ្ងៃរយៈពេល៣០នាទី ចាប់ពីម៉ោង៩ព្រឹក។ បន្ទាប់ពីហាលរួច កសិករត្រូវទុកគ្រាប់ពូជឲ្យត្រជាក់ ហើយត្រូវរើសគ្រាប់ណាដែលមានខ្មូតស៊ីចេញ។ ក្រោយមកទៀត កសិករ ត្រូវយកតែគ្រាប់ដែលស្អាតល្អទៅត្រាំក្នុងទឹករយៈពេល៥០នាទី ទើបអាចយកទៅដាំបាន។
មុនពេលដាំកសិករត្រូវភ្ជួរដី ៣ដង ដោយលើកទី១ និងទី២ ត្រូវរាស់ពង្រាបដីឲ្យស្មើ និងរក្សាដីទុករយៈពេល៧ថ្ងៃឲ្យស្មៅរលួយ និងលើកទី៣ ត្រូវធ្វើរង។ ដំណាំសណ្ដែកកួរ កសិករគួរប្រើជីកំប៉ុស្តគោកសម្រាប់ទ្រាប់បាត ហើយក្នុង១រង គួរដាក់៣ធុង ដោយច្របល់ជាមួយដីទុក៣ថ្ងៃទើបដាំ។ កសិករត្រូវដាក់គ្រាប់១ទៅ២គ្រាប់ក្នុង១រណ្ដៅ ចន្លោះគុម្ព ៥តឹក ដោយមួយរងដាំ២ជួរ បន្ទាប់ពីដាំហើយត្រូវគ្របចំបើង ដើម្បីការពារសំណើម និងស្រោចទឹក២ដងក្នុង១ថ្ងៃ។
សម្រាប់ការថែទាំវិញ ពេលដាំបាន៧ថ្ងៃ កសិករត្រូវដាក់ទ្រើងពីឫស្សីឲ្យសណ្ដែកវារឡើង។ កសិករត្រូវចាប់ផ្ដើមដាក់ជីកំប៉ុស្តទឹក ១លីត្រ លាយជាមួយទឹកធម្មតា ១៥លីត្រ ក្រោយ១៥ថ្ងៃត្រូវស្រោចម្ដងទៀត(ស្រោចជីកំប៉ុស្តទឹក) ឲ្យដល់៣៥ថ្ងៃ ប្រើជីកំប៉ុស្តគោក ក្នុងមួយរង ១ធុងកន្លះ។ បន្ថែមលើនេះ រយៈពេល១៥ថ្ងៃគិតចាប់ពីថ្ងៃដាំមក ត្រូវស្រោចទឹក២ដង ក្នុង១ថ្ងៃ ពេលព្រឹក និងពេលល្ងាច។ ក្រោយពីនេះកសិករ អាចស្រោចទឹក១ដងក្នុង១ថ្ងៃនៅពេលព្រឹក គ្របគល់ដោយចំបើង និងត្រូវបោចស្មៅចេញ។
ចំពោះសត្វល្អិតដែលបំផ្លាញ កសិករត្រូវចេះការពារដំណាំដោយប្រើថ្នាំពុលតាមបែបធម្មជាតិ និងមិនមានផលប៉ះពាល់ដល់ដំណាំ។ ក្នុងការធ្វើថ្នាំពុលធម្មជាតិ កសិករត្រូវមានគ្រឿងផ្សំដូចជា បណ្ដូលពេជ្រ ២គីឡូក្រាម, រំដេង ២គីឡូក្រាម, ស្លឹកនិងសំបកក្រូច ២គីឡូក្រាម, ទឹក១៥លីត្រ ដោយត្រាំចូលគ្នាទុករយៈពេល ៣០ថ្ងៃទើបប្រើបាន។ ក្នុងការប្រើ កសិករត្រូវយកថ្នាំពុលលាយជាមួយទឹក ១៥លីត្រ ស្រោចនៅពេលល្ងាច ហើយនៅពេលព្រឹក ត្រូវលាងដោយស្រោចទឹកធម្មតា ប្រើក្នុងដំណាក់កាលលូតលាស់។ ក្នុងករណី មានកើតចៃ ត្រូវបាញ់ថ្នាំពុលធម្មជាតិតាមជាក់ស្ដែង ថ្នាំពុល១លីត្រលាយជាមួយទឹកធម្មតា ១៥លីត្រ បាញ់រាល់ពេលល្ងាចរហូតដល់អស់ចៃ៕
(សារព័ត៌មានថ្មីៗ ដកស្រង់ចេញពីសៀវភៅកសិករជោគជ័យ នៃមជ្ឍមណ្ឌលសិក្សា និងអភិវឌ្ឍន៍កសិកម្មកម្ពុជា)
© រក្សាសិទ្ធិដោយ thmeythmey.com