ជាតិ
លោក ស៊ី ជិនភីង៖ ព្រះរៀម បុប្ផាទេវី បានលះបង់ព្រះកាយពលធំធេង ដើម្បីមិត្តភាពកម្ពុជា-ចិន
រូបពីហ្វេសប៊ុក Royal Du Cambodge
×![]()
ដោយ: ធឿន បញ្ញាឬទិ្ធ
ភ្នំពេញ៖ ព្រះរៀម បុប្ផាទេវី បានលះបង់ព្រះកាយពល ដើម្បីទំនាក់ទំនងមិត្តភាពកម្ពុជា-ចិន។ នេះជាការលើកឡើងរបស់លោក ស៊ី ជិនភីង ប្រធានាធិបតីចិន ដែលបានថ្វាយសារលិខិត ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា ដើម្បីចូលរួមរំលែកព្រះមរណទុក្ខ ចំពោះការយាងសោយព្រះពិរាល័យ នៃសម្តេចរាជបុត្រីព្រះរៀម នរោត្តម បុប្ផាទេវី «ទេពនាដវដ្ដីឯក»។
ហ្វេសប៊ុកស្ថានទូតចិនប្រចាំកម្ពុជា ដែលបានស្រង់ខ្លឹមសាររបស់លោក ស៊ី ជិនភីង ប្រធានាធិបតីចិន ដូច្នេះថា៖«ខ្ញុំមានអារម្មណ៍ក្តុកក្តួលក្រៃលែងដោយទទួលដំណឹងថា សម្តេចរាជបុត្រី ព្រះរៀម នរោត្តម បុប្ផាទេវី បានយាងសោយព្រះពិរាល័យ។ សម្តេចរាជបុត្រីព្រះរៀម នរោត្តម បុប្ផាទេវី ទ្រង់ជាមិត្តចាស់នៃប្រជាជនចិន បានលះបង់ព្រះកាយពលយ៉ាងធំធេងនិងសកម្ម ដើម្បីកិច្ចទំនាក់ទំនងមិត្តភាពរវាងចិន និងកម្ពុជា។ ខ្ញុំសូមចូលរួមរំលែកព្រះមរណទុក្ខយ៉ាងក្រៀមក្រំបំផុតចំពោះការយាងសោយព្រះពិរាល័យរបស់សម្តេចព្រះរៀម»។
សារលិខិតនេះ ត្រូវបានលោក វ៉ាង វិនធាន ឯកអគ្គរដ្ឋទូតចិនប្រចាំកម្ពុជា ថ្វាយសម្តេចរាជបុត្រីព្រះអនុជ នរោត្តម អរុណរស្មី ឧត្តមប្រឹក្សាផ្ទាល់ព្រះមហាក្សត្រ នាថ្ងៃទី២១ ខែវិចិ្ឆកា ឆ្នាំ២០១៩។ លោក វ៉ាង វិនធាន ក៏បានចូលរួមក្នុងពិធីគោរពព្រះវិញ្ញាណក្ខន្ធសម្តេចព្រះរៀមផងដែរ។
ចំណែកព្រះករុណា ព្រះបាទសម្តេច មហាវិជ្ជរ៉ាឡុងកន ព្រះមហាក្សត្រថៃ ក៏បានថ្វាយព្រះរាជសាររំលែកទុក្ខថ្វាយព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជាផងដែរ។ រីឯសម្តេចព្រះទេពមហាចក្រី សុរិនថន បានថ្វាយកម្រងផ្កាថ្វាយព្រះសពសម្តេចរាជបុត្រីព្រះរៀម នរោត្តម បុប្ផាទេវី «ទេពនាដវដ្តីឯក» តាមរយៈលោក Panyarak Poolthup ឯកអគ្គរាជទូតថៃប្រចាំកម្ពុជា កាលពីថ្ងៃទី១៨ ខែវិច្ឆិកា ឆ្នាំ២០១៩ ។
ព្រះសពសម្ដេចរាជបុត្រីព្រះរៀម នរោត្តម បុប្ផាទេវី «ទេពនាដវដ្តីឯក» នឹងត្រូវបូជា នៅថ្ងៃទី២៥ វិច្ឆិកា។ នេះបើតាមគណៈកម្មាធិការជាតិរៀបចំបុណ្យជាតិ-អន្តរជាតិ ដែលរៀបចំពិធីថ្វាយព្រះកុសល ព្រះវិញ្ញាណក្ខន្ធព្រះសពទ្រង់ ចាប់ពីថ្ងៃទី១៩ រហូតដល់ថ្ងៃទី២៥ វិច្ឆិកា ឆ្នាំ២០១៩៕
Tag:
បុប្ផាទេវី
ស៊ី ជីងភីង
របាំព្រះរាជទ្រព្យ
© រក្សាសិទ្ធិដោយ thmeythmey.com
