កីឡាអន្តរជាតិ
អន្តរជាតិ
អតីតប្រធានក្លិប Real ថា Bale គួរទៅចូលរួមជាមួយ Mourinho នៅ Spurs
× លោក Ramon Calderon អតីតប្រធានក្លិប Real Madrid ជឿជាក់ថាការវិលត្រឡប់ទៅកាន់ក្រុម Tottenham Hotspur នឹងក្លាយជាដំណោះស្រាយល្អបំផុតសម្រាប់ Gareth Bale ខណៈរូបគេហាក់កំពុងមានបញ្ហាជាថ្មីជាមួយក្លិបយកអេស្ប៉ាញមួយនេះ។
លោក Calderon យល់ឃើញថា Bale នឹងមិនពេញចិត្តក្នុងការស្នាក់នៅ Bernabeu បន្តទៀតឡើយ បន្ទាប់ពីខ្សែប្រយុទ្ធវ័យ៣០ឆ្នាំរូបនេះ បានអបអរសាទរដែលជម្រើសជាតិវេលស៍ឈានទៅ Euro 2020 ដោយបានកាន់ទង់ជាតិប្រទេសខ្លួនដែលបង្ហាញឈ្មោះ វេលស៍នៅលំដាប់ទី១ កីឡាកូនគោលទី២ និងចុងក្រោយ Real Madrid។
ការបង្ហាញទង់ជាតិដោយដាក់ឈ្មោះ Real Madrid ចុងក្រោយ កីឡាកូនគោលទៀតនោះ ត្រូវបានគេយល់ឃើញថា Bale បានចាត់ទុកក្រុមដែលខ្លួនកំពុងប្រកបអាជីពសព្វថ្ងៃស្ថិតក្នុងជម្រើសក្រោយកីឡាកូនគោលទៅទៀត។
ករណីខាងលើនេះ លោក Calderon សញ្ជាតិអេស្ប៉ាញ និយាយថា Bale ប្រាកដជាដឹងច្បាស់ពីអ្វីដែលបានសរសេរនៅលើទង់ជាតិនោះមិនខាន។ អតីតប្រធានក្លិបស្តេចស វ័យ៦៨ឆ្នាំបន្ថែមថា៖«Bale ផ្លាស់ទៅ Spurs គឺជាដំណោះស្រាយល្អបំផុតសម្រាប់ភាគីទាំងសងខាង»។
ស្របពេលអតីតអ្នកចាត់ការ Real Madrid លោក Jose Mourinho បានទៅជំនួសតំណែងលោក Mauricio Pochettino នៅ Spurs លោក Calderon ជឿជាក់ថា Bale អាចវិលត្រឡប់ទៅកាន់ទឹកដីអង់គ្លេសវិញមិនខាន។ Bale បានចំណាយពេល៦រដូវជាមួយក្លិបក្នុងក្រុងឡុងដ៏ មុនពេលផ្លាស់ទៅ Real ក្នុងតម្លៃកំណត់ត្រាពិភពលោកកាលពីឆ្នាំ ២០១៣។
Calderon បានប្រាប់ BBC ទៀត ថា៖«ជាការពិត Mourinho ចូលចិត្តកីឡាកររូបនេះណាស់។ កាលពីឆ្នាំ ២០១៧ អ្នកចាត់ការសញ្ជាតិព័រទុយហ្គាល់រូបនេះធ្លាប់ព្យាយាមទិញ Bale ទៅចូលរួម Manchester United ប៉ុន្តែត្រូវ Real Madrid បដិសេធ»៕
Tag:
Tottenham Hotspur
Gareth Bale
Jose Mourinho
© រក្សាសិទ្ធិដោយ thmeythmey.com