នាកយរដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ត្រូវបានរដ្ឋអាជ្ញាសម្រេចចោទប្រកាន់ជាផ្លូវការលើសំណុំរឿងពុករលួយ ។ ការចោទប្រកាន់នេះ អាចជះឥទ្ធិពលធំធេងដល់អនាគតនយោបាយរបស់លោកមេដឹកនាំរូបនេះ។
លោករដ្ឋអាជ្ញាអ៊ីស្រាអែល Avichai Mandelblit បានសម្រេចចិត្តចោទប្រកាន់ប្រឆាំងលោកនាយករដ្ឋមន្ត្រី ណេតាន់យ៉ាហ៊ូ លើបទល្មើសដូចជា ទទួលសំណូក, កេងបន្លំ និងរំលោភទំនុកចិត្ត។ នេះបើយោងតាមសេចក្តីថ្លែងការណ៍របស់ក្រសួងយុត្តិធម៌អ៊ីស្រាអែលចុះថ្ងៃព្រហស្បតិ៍ ទី២១ ខែវិច្ឆិកា។
លោក ណេតាន់យ៉ាហ៊ូ ដែលបដិសេធរាល់ការចោទប្រកាន់ទាំងអស់នេះ ក្លាយជានាយករដ្ឋមន្ត្រីអ៊ីស្រាអែលទីមួយ ដែលត្រូវបានរដ្ឋអាជ្ញាសម្រេចចោទប្រកាន់ជាផ្លូវការ ខណៈកំពុងកាន់តំណែង។ អ្នកនយោបាយស្តាំនិយមរូបនេះ ដែលបានកាន់អំណាចតាំងពីឆ្នាំ២០០៩មក គឺជានាយករដ្ឋមន្ត្រីដែលកាន់តំណែងយូរជាងគេបង្អស់របស់អ៊ីស្រាអែល និងមានឥទ្ធិពលខ្លាំងក្លាលើឆាកនយោបាយ។
ទោះរងការចោទប្រកាន់ក៏ដោយក្តី លោក ណេតានយ៉ាហ៊ូ ពុំទាន់តម្រូវតាមច្បាប់ឲ្យលាលែងពីតំណែងជានាយករដ្ឋមន្ត្រីនៅឡើយទេ ពោលគឺរហូតដល់លោកត្រូវបានផ្ដន្ទាទោស ហើយសម្រេចឈប់ដាក់បណ្ដឹងឧទ្ធរណ៍។ ក៏ប៉ុន្តែសម្ពាធនយោបាយ ទំនងជាកាន់តែតានតឹង។ ខណៈនេះ មេដឹកនាំវ័យ៧០ឆ្នាំរូបនេះ ប្រហែលកំពុងស្នើសុំទៅសភាអ៊ីស្រាអែលដើម្បីផ្តល់នូវអភ័យឯកសិទ្ធិ ពីការកាត់ទោស។
បទចោទប្រកាន់ប្រឆាំងលោកនាយករដ្ឋមន្ត្រី ណេតាន់យ៉ាហ៊ូ គឺរាប់ចាប់ពី ការទទួលយកអំណោយដែលគិតជាទឹកប្រាក់រាប់ពាន់ដុល្លារពីអ្នកជំនួញមានៗដែលស្និទ្ធិនឹងលោក ព្រមទាំងការបង្កើតកិច្ចព្រមព្រៀងមួយដើម្បីផ្លាស់ប្តូរខ្លឹមសារនីតិបញ្ញត្តិផ្គាប់ចិត្តក្រុមហ៊ុនប្រព័ន្ធផ្សព្វផ្សាយមួយ ជាថ្នូរនឹងការឲ្យពួកគេចេញផ្សាយព័ត៌មានល្អៗអំពីរដ្ឋបាលលោក។
តាមការចុះផ្សាយរបស់ទីភ្នាក់ងារព័ត៌មាន AFP លោករដ្ឋអាជ្ញា Mandelblit បញ្ជាក់ឲ្យដឹងថា វាគឺជាថ្ងៃដ៏សោកសៅនិងលំបាកសម្រាប់អ៊ីស្រាអែលក្នុងការចោទប្រកាន់មេដឹកនាំ ក៏ប៉ុន្តែវាមានសារសំខាន់ ព្រោះថា វាបានបង្ហាញថា គ្មានប្រជាជនអ៊ីស្រាអែលណាម្នាក់ ឈរនៅលើច្បាប់នោះឡើយ។ លោក សង្ក់តធ្ងន់ថា៖«ការអនុវត្តច្បាប់ ពុំមែនជាជម្រើសឡើយ។ វាពុំខ្វល់ថានរណាជាអ្នកនយោបាយឆ្វេងឬស្តាំនិយមឡើយ។ ហើយវាក៏ពុំមែនជារឿងនយោបាយផងដែរ»។ យ៉ាងណាក៏ដោយ លោក អះអាងថា លោក ណេតាន់យ៉ាហ៊ូ នៅតែជាមនុស្សគ្មានកំហុស រហូតដល់រកឃើញថាលោកពិតជាប្រព្រឹត្តិកំហុសមែន។
ក្នុងសុន្ទរកថាតាមរយៈកញ្ចក់ទូរទស្សន៍ លោកនាយករដ្ឋមន្ត្រី បានចាត់ទុកការចោទប្រកាន់នេះថាគឺជា «ការប៉ុនប៉ងធ្វើរដ្ឋប្រហារ» ។ លោក លើកឡើងថា អាជ្ញាធរ ពុំបានធ្វើការដើម្បីស្វែងរកការពិតឡើយ។ គោលដៅពួកគេ គឺតាមលោកតែម្តង។ ត្រង់នេះ លោកបានស្នើឲ្យមានការស៊ើបអង្កេតលើអ្នកស៊ើបអង្កេត។
មែនទែនទៅ ជំហានបន្ទាប់ក្នុងដំណើរការនេះ ពុំទាន់ច្បាស់លាស់នៅឡើយ ដោយអាជ្ញាធរពុំទាន់កំណត់កាលបរិច្ឆេទសម្រាប់ការបើកសវនាការ។ ប្រទេសអ៊ីស្រាអែល ដឹកនាំដោយគ្មានរដ្ឋាភិបាលអស់រយៈពេលជិតមួយឆ្នាំទៅហើយ ខណៈលោក ណេតាន់យ៉ាហ៊ូ ជានាយករដ្ឋមន្ត្រីក្នុងអំណាចជាស្តីទី ។
សូមបញ្ជាក់ថា ការចោទប្រកាន់របស់រដ្ឋអាជ្ញាលើលោកនាយករដ្ឋមន្ត្រី ណេតាន់យ៉ាហ៊ូ កើតឡើងខណៈដែលអ៊ីស្រាអែលកំពុងប្រឈមមុខនឹងលទ្ធភាពនៃរៀបចំការបោះឆ្នោតជាលើកទី៣ ក្នុងរយៈពេលត្រឹមតែ១ឆ្នាំប៉ុណ្ណោះ ក្រោយពីទាំងលោក ណេតាន់យ៉ាហ៊ូ និងគូប្រជែងនយោបាយសំខាន់លោក គឺលោក Benny Gantz សុទ្ធតែមិនអាចបង្កើតរដ្ឋាភិបាលមួយបាន។ ទាក់ទិននឹងការជាប់គាំងនយោបាយនេះ លោកប្រធានាធិបតីអ៊ីស្រាអែល Reuven Rivlin នៅថ្ងៃព្រហស្បតិ៍ ២១វិច្ឆិកា បានស្នើឲ្យសមាជិកសភាព្រមព្រៀងគ្នាលើបេក្ខជនម្នាក់សម្រាប់តំណែងនាយករដ្ឋមន្ត្រីក្នុងពេល២១ថ្ងៃ ហើយបញ្ចៀសការរៀបចំការបោះឆ្នោតជាលើកទី៣ក្នុងរយៈពេល១ឆ្នាំ៕